Июль 18-22-öд лунъясö Сочиын мунiсны йöктысьяслöн да сцена вылын ворсысьяслöн конкурс-фестивальяс, кöнi петкöдчис Шöръягса клубысь челядьлöн «Непоседы» йöктан котыр. «А закаты алые» йöктöмöн шедöдiсны медводдза тшупöда диплом да кубок, ставнысö пасйисны медальясöн. «Йöзкостса йöктöм» нимпасын коми кадрильöн босьтiсны мöдöд тщупöда диплом. 
Пасъя, мый конкурсын петкöдчисны Россия пасьтаысь челядь, а республикаысь сöмын ми. Нывкаяс да зонкаяс эз повзьыны уна йöзысь, ыджыд сцена вылö петöмысь да йöктiсны сьöлöмсяньныс. 
Кыдзи ми, ылi пельöсын олысьяс, веськалiм тайö конкурс вылö? 2018-öд вося ноябрын снимайтiм «А закаты алые» йöктöм да ыстiм национальнöй культуралöн да фольклорлöн «Душа народа моего» конкурс вылö, мыйысь шедöдiм коймöд тшупöда диплом. И виччысьтöмтор — «Непоседы» котырöс корисны Сочиö, мед йöктан сямöн вермасьны Россия пасьтаысь енбиа челядькöд. 
Ме, кыдзи котырöн веськöдлысь, бур юöр воöм бöрын чукöртлi челядьлысь бать-мамсö. Найö эз вöвны паныд ылi туйö петöмысь, кöсйысисны и чуктöдны сьöм сэнi олöмысь. А кытысь босьтны сьöм туй вылö? Шыöдчи районса администрацияöн веськöдлысь С.В.Рубан, райсöветса депутат А.А.Кузнецова дорö да найö корсисны сьöмöн отсалысьясöс. Ас, челядь да налöн бать-мам нимсянь висьтала ыджыд аттьö Федерацияса Сöветысь сенатор Д.А.Шатохинлы, Госсöветса депутатъяс В.А.Косовлы да Н.В.Бажуковалы, райсöветса депутат Р.В.Третьяковлы, асшöр уджалысьяс Е.А.Барсуковлы, С.С.Коноваловлы да С.В.Мастюгинлы. 
Конкурс вылö корöмöн шыöдчи асланым районса клубъяслöн котырса директор Александра Ивановна Касева дорö. Сiйö отсалiс: челядьлы вурисны петкöдчан паськöм, ньöбисны кöмъяс. Сёрнитiм и мунöм-локтöм котыртöм йылысь. Аттьö Алёна Владимировна Скрыганюклы, кодi колльöдiс миянöс, пыр вöлi орччöн, «висис» челядь вöсна. Аттьöалам отсöгысь «Дон» овмöдчöминса юралысь Александр Степанович Нехорошевöс. 
Челядь бура шойччисны, гожйöдчисны, пыралiсны Сьöд саридзлöн шоныд ваö. Ветлiм аквапаркö. Аддзылiм унатор. 
Бöркыв вылö кöсъя пасйыны, мый öтувтчöмöн да отсалöмöн артмис ичöт посёлокса йöктысьяслы ветлыны ыджыд концерт вылö. Ыджыд вермöмыс висьталö, кутшöм енбиаöсь миян челядь, да ышöдö водзö зiльны нöшта ёнджыка. Окота, мед эськö районса сьöм кудйö урчитiсны татшöм котыръясыслы петкöдчыны ветлöм вылö сьöм, мед зонпосниöс велöдысьяслы эз ков котравны да корсьысьны. 

Ольга Дорогань, 
Шöръягса клубöн да «Непоседы» котырöн веськöдлысь.