Бурдöдысьыд сиктад пыр пыдди пуктана да колана морт. Татшöм думöн пыр олiс-уджалiс Раиса Ивановна Морохина.
1976-öд воын Воркутаса медучилище помалöм бöрын Чилимдiнса нывка воис Кулöмдiн районö, шöр бурдöдчанiнсянь том медсестраöс ыстiсны Лöгинъягö. Участокса бурдöдчанiнын уджалiс вит тöлысь. 1977-öд вося январын вужöдiсны Улыс Вочса яслиö, кöнi 1986-öд воöдз тöждысис дзолюкъяслöн дзоньвидзалун вöсна, вöлi и веськöдлысьöн.
— Челядь вöсна тöждыд – зэв кывкутана удж. Колö кывны, кывзыны, гöгöрвоны быд дзолюкöс. Накöд уджавны зэв кажитчис, — том кадас бергöдчылiс Раиса Ивановна.
1997-öд воын корисны Улыс Вочса фельдшерско-акушерскöй пунктö медсестраöн. Веськöдлысьнас вöлi Татьяна Васильевна Лютоева, пелькöдчис Мария Ивановна Касева. Зимстан участкса бурдöдчанiнö Т.В.Лютоеваöс вуджöдöмöн, кывкутöмыс усис Раиса Ивановна вылö. Сиктыд абу ичöт, помöдзыс висьысьяс дорö ветлiс подöн, Улыс Воч сиктö пырысь дзоля грездъясысь йöзлы отсöг сетлiс ас кадö. Кодöскö ёна кö топöдлiс висьöмыс, машина корлiсны Зимстанса бурдöдчанiнысь, да нёрпалысьöс нулiсны сэтчö либö лэччöдлiсны Кулöмдiнö. Ылысяньыд кор на локтас «тэрыб отсöг сетан» машинаыд, мыйта кад коляс, а тайö морт олöм дон вермас сувтны. А сэсся пöрысь мортыд оз на ырыштчы петны ылi туйяд. Бурдöдысьлы быть тöждысь быдöн вöсна.
2014-öд воын сиктö воис том фельдшер Иван Дмитриевич Катаев, да кыкнад уджалiгöн лоис кокньыдджык. Куим во мысти локтiс Степан Николаевич Гичев, а Раиса Ивановна лоис налы бур туйдысь-велöдысьöн. 2015-öд воын ань петiс шойччöг вылö. Бур уджысь сетлiсны уна почёт грамота, аттьöалан гижöд, эм «Уджвывса ветеран» ним.
Сергей Павлович верöсыскöд быдтiсны куим пиöс: бать-мамлы бур пыкöд. Кыр йылын гозъяöн зымнитöм керкаын найö пыр виччысянаöсь. Тыдаланiнын Раиса Ивановналöн мамöн козьналöм да налöн традиция серти нывъясыслы вуджан чилимдiнса серъяса паськöм да акань. Миян районлöн ылi пельöсö, эськö, волiс роч ныв, да коми верöсöн да йöз пöвстын олöмöн и ачыс дзик комиöн лоис.
Аньлöн лов кыпöданторйыс – дзоридзьяс. Тулыссянь сёр арöдз найö мичмöдöны керка йöр. Быд сикас тусьысь пуö варенньö. Öтсöгласа олöмöн шудаöсь гозъя. Раиса Ивановна и öнi на йöз пöвстын, сьылö «Красная гвоздика» котырын, зiльö олöмаяслöн сиктса котырын.
Людмила Ульдрикас.
Снимок Р.Морохиналöн чукöртöмысь.