Кулöмдiнысь Андрей Иванович Ефремов зэв кыпыд лола, быд уджö öдйö кыпалысь морт. 2014-öд восянь, Кулöмдiнын «Олимпик» ёнмöдчанiн воссьöм бöрын пырöдчис спортö. Ёнмöдчö сэнi вермытöмъяслöн котырын, кодöн юрнуöдö да сэтчö ветлысьясöс ки-кок песны туйдö Михаил Альбертович Липин. Вын-эбöс содтöны тренажёръяс вылын, гираяс да штангаяс лэпталöмöн. Петкöдчöны ас коддьöмъясыскöд районса да республикаса ордйысьöмъясын. Öнi регыд на ветлiсны Сыктывкарö да шедöдiсны штанга лэпталöм кузя вермöм. Том мортлы вичмöдлiсны нин уна медаль да ошкан грамота, öшалöны стенас, гажöдöны синсö. 
Ветлöдлö сiйö и йöзлы социальнöй отсöг сетан шöринö, кор чукöртлöны вермытöм йöзöс, велöдöны найöс быдсикас кипод уджö. Гортас шкаплöн джаджъяс тырыс нин чукöрмöма сыöн дасьтöмторъясыс, быдсикас материалысь вöчöмторъяс, кытчö, дерт жö, колiс пуктыны зэв ыджыд сям, терпенньö да вын. 
— Андрей зэв радейтö вöчасьнысö, — нимкодьпырысь висьталiс мамыс, Татьяна Ивановна. — Кöть лунтыр оз чеччыв тайö удж сайсьыс. Весиг журналъясысь кö аддзас мыйкö сьöлöм сертиыс, пыр жö босьтчас вöчнысö. 
Андрей Иванович ветлывлö и библиотекаö, кöнi нуöдлöны районса да бокысь локтöм паськыда тöдса йöзкöд аддзысьлöмъяс. Сэтчöс уджалысьяс вермытöм йöзöс тшöкыда нулывлöны сикт-посёлокъясö, тöдмöдöны медтöдчана да мича инъясöн. Том морт ветлывлö радпырысь, сылы зэв интереснö тöдмавны ас район йылысь мыйкö выльтор. Сiйö öдйö кыпалö быд татшöм чукöстöм вылö, кытчö кöть оз корны. Сыкöд пыр орччöн мамыс, Татьяна Ивановна, кодi тöждысьö пиыс вöсна, сылöн дзоньвидзалун вöсна, öд сiйö чужöмсяньыс вермытöм, кытчö кöть сiйö оз мун: «Олимпикö» ёнмöдчыны, ордйысьöмъяс вылö, библиотекаö, районö кöть сы сайö. Тырвыйö олö сылöн олöмöн, öтув юкö сылысь быд сьöкыдлун, вермöм да шудлун. 
Гижöд да снимок Галина Нестеровалöн.