Гулыд кадö

[ A+ ] /[ A- ]


Вöр-валöн тайö гулыд кадыс овлö тулыс пансигöн, март помын. Юрвесьтса пыдöстöм енэжас бальгöдчöма яр шондi. Ни öти кымöртор. Кок улын чорыд лым. Ывлавывса градусник шöрö сибдöма гöрд визьыс. Абу шоныд, но кöдзыдсö сöстöмсьыс сöстöм сынöдсö апалiгöн он кыв. Некымын лун шоныдалыштöм бöрын, колöкö, и кöдзыд зэрöн на пызньытлас — лымйыс вевттьысьлас вель кыз коркаöн, артмывлö чарöм. А ёнлуннас да пукалан кузьтанас быд во торъялö. Овлывлiс, мый сы вывтi тракторöн сиктса войтыр хлыста керъяс петкöдлiсны веськыда вöрсянь горт дорöдзныс дась туй кузяыд. Но медуна нимкодьлун сiйö вайö сиктса челядьлы. Мун кытчö кöсъян — вöрö, видз вылö, ва дорö — быдлаын кок улад едж-ыд веркöса камнитöмин. Кодöс кватитöма вуграсян висьöм — нöбалöны ты-ю бокö палялыштöм кельчи-мык, ёкыш-йöрш лэпталыштны. Мойвиас кö — и гырысьджыксö пысалан. Но медунаöн чукöрмывлöны сикт гöгöрын кöвдумöн шлапкысьöм мыльк-чуркъяс вылö. Весиг версьтö ышмывлöны тайö кадас да сюртчывлöны челядь дорö кодi даддьöн, кодi кöрт ворйöн. Вывтасiнъяс йöлöгаалöны челядьлöн ёсь чилзöмöн, гулыд серамöн да горзöмöн. Кодi мыйöн вермö, сiйöн и тöвзьö горув, лым буссö кыпöдiг: пöв да фанератор вылын, даддьöн-ворйöн-ватрушкаöн, а нинöм кö нин эз сюр ки улö — водан да куртка мыш вылад гурöдан кокъястö вылö чергöдöмöн. Казьтышта да, велöдчысьяскöд некымынысь тайö кадас ворслiм «Зарницаысь». Öти пöрйö пажын бöрас чорыд веркöсыс небзис. А ворсам пыр школаса став уджалысьыскöд. Тешыд вöлi. Кöч кодь кокни табъя челядьтö чарöмыд кыдзкö-мыйкö кутыштö на, а тупльöсджык тушаа верстьöыд бузгыьлiс коскöдзыс. Санитаравны ковмис ставнымлы, медым кыскыны найöс фанераысь вöчöм мишеньяс да танкъяс вылын туй вылöдз. Чарöмыд ылöг — он кö куж виччысьны — налькйö шедан. Кодсюрöлы вежöрас пыр жö и воис «Они сражались за Родину» киноысь юкöн. Чорыд дойяса С.Бондарчук-салдатöс тыш мунанiнысь кыскö пыста кодь ичöт да, буди, гöн кодь кокни санитарка да кыз синваöн бöрдö: «Кодлы сöмын юрас волöма öш кодь тушаа айловъяссö война вылас босьтны?!» Миян татшöмнас лоис школаса зэв нималана велöдысьгижысь.
Владимир Шомысов.
Снимокъяс Елена Игнатовалöн.

Комментарии:

Добавить комментарий

Свежий выпуск: 28 марта

Осторожно — мошенники!