«Гортса санаторий»

[ A+ ] /[ A- ]

Буретш татшöм бала пöртсьö олöмö «Арлыда войтыр» федерацияса программа серти республикаын да тшöтш и миян районын. Сiйöс веськöдöма олöма йöзöс да вермытöмъясöс шойччöдöм-ёнмöдöмöн шымыртöм вылö. Кольöм воын олöмаяслöн Кулöмдiнса да Тимшерса котыръяс пырöдчисны тайö уджас. Ышöдiс да отсалiс олöмаяслöн районса котырöн юрнуöдысь Галина Арсеньевна Кравченко.
Олöмаяслöн республикаса котырсянь вичмöдöм сьöм вылö ньöбисны «Алмаг-01», давление мерайтан да ингалятор приборъяс. Но коронавирус ыджыдалöмöн, сiйöс кöвъялöмысь видзчысьöм могысь да гöгöр тупкöм вöсна эз артмы öтувтны олöма йöзöс да збыльмöдны мöвпыштöмторсö. Таво Кулöмдiнын да Тимшерын чукöртiсны дас мортöн.


Кулöмдiнын «Гортса санаторий» восьтiсны йöзöс социальнöй отсöг сетан шöринысь директорöс вежысь Светлана Мамедовна Панюкова да олöмаяслöн районса котырöн юрнуöдысь Галина Арсеньевна Кравченко. Чолöмалiсны воысьясöс да сиисны бура шойччыны, ёнмöдчыны да кыпöдны лов. Дас лун чöж пенсионеръяс быд асыв чукöртчылiсны йöзöс социальнöя доръян шöринö. Медводз мерайтiсны давление, юисны чöскыд туруна чай, чöсмасисны фруктыöн. Г.А.Кравченко юрнуöдöмöн вермысьяс вöчисны зарядка. Быд лун олöмаясöс да вермытöмъясöс чуймöдлiсны выльторйöн. Библиотекаын ворсöдан викторинаын пыдiсянь тöдмöдiсны Коми республикакöд да районкöд. Челядьлöн библиотекаын тöдмöдiсны выльпöлöс лыддьысянторъясöн, мультфильм вöчöмöн, интерактивнöй ворсанторъясöн. Татшöм чуймöданаторъяс бöрад пöчьяс зэв зiля кöсйысисны вайöдны татчö ассьыныс внук-внучканысö. Аддзысьлiсны и медсестракöд, кодi нёль лун чöж велöдiс олöма йöзöс колананог сёйны, кор водны узьны, тöдмöдiс сакара висьöмлöн петкöдчöмъясöн, кыдзи кутны асьтö сiйöн висигöн. Валентин Николаевич Эрдни-Араев велöдiс песны ки-кок. Петкöдлiс, кыдзи да мый позьö вöчны чуньöн туша-мыгöр вылын. Сiдз жö гажöдiс районса культура керкаысь «Красная гвоздика» сьылан котыр. Юргисны йöзкостса да роч сьыланкывъяс Пётр Магометович Гилевлöн баянöн мича ворсöм улö. Велöдчисны тшапитчыны, голя гöгöр мичаа кöртавны шарпъяс. Нöшта журналист Николай Александрович Лютоев висьталiс, кыдзи гижис да лэдзис Сöветскöй Союзса Герой Георгий Фёдорович Тимушев йылысь небöг, петкöдлiс экран вылын.


Пöся аттьöалiсны «Кулöмдiн» овмöдчöминса администрацияын уджалысьясöс. Водительыс, Николай Александрович Кочанов, катыдпомсаясöс öтар-мöдарö новлöдлiс быд лун. Волiс стöч индöм кадö, шаня да лабутнöя сёрнитiс пöчьяскöд. Отсасисны и волонтёръяс, быд лун дежуритiсны кыкöн: мыськалiсны тасьтi-пань, коланторъясла ветлiсны лавкаö, отсалiсны пöрччысьны-пасьтасьны. Татшöм зiль да шань аньясыс Вера Афанасьевна Кузьбожева, Домна Васильевна Напалкова, Анна Михайловна Ляпина, Лидия Николаевна Липина, Мария Егоровна Паршукова, Анна Васильевна Леонова.
Олöмаяслöн юрсиктса котырöн юрнуöдысь В.П.Нестеренко тшöтш волонтёръяс лыдын, быдла удитö, унатор кужö да сяммö öтувтны йöзöс.


— Россияын «Гортса санаторий» баласö олöмö пöртöны кык во нин, а со миян медводдзаысь на. Кутам лача, мый и локтан воясö уджыс мунас водзö, ставыс артмас, — висьталiс Валентина Петровна.


Тимшерсаясöс ёнмöдчöм-шойччöмö öтувтiс олöмаяслöн посёлокса котырöн юрнуöдысь Галина Николаевна Паршукова. Налы жырсö торйöдлiс клуб, сэтчö и тэрмасьлiсны быд асыв. Дзоньвидзалун вöсна тöждысьны отсалöны ньöбöм ингалятор, «Алмаг 01» да давление мерайтан приборъяс, массаж вöчанъяс вайлiсны и гортысь.

Лöсьöдiсны тетрадь да сэтчö луннас некымысь пасйисны давление да сьöктанысö. Витаминъяса да сакартöм чай юöм бöрын Галина Николаевна вöчöдiс зарядка. Водзö олöма аньяскöд уджалiс, выльторйö велöдiс клубса уджалысь. Ворсiсны да ордйысисны. Тимшерса школаысь физкультура велöдысь Павел Михайлович Созонов петкöдлiс лолалан гимнастика вöчанног. Библиотекаса уджалысь слайдъяс петкöдлöмöн висьталiс витаминъяс да наöн ёнмöдчöмлысь, торйöн нин тулысын, коланлун йылысь. Посёлокса бурдöдчанiнысь фельдшер Эдуард Дмитриевич Чувьюров велöдiс, кыдзи да кор колö мерайтны давление, вöдитчыны «Алмаг» приборöн да ингаляторöн. Гöгöрвоана, олöмаяслöн висьö то öтилатi, то мöдлатi, да бурдöдысь дорö налöн вöлi зэв уна юалöм. Гортö мунтöдз бара юисны чай, чöсмасисны йогуртöн, яблöгöн либö мандаринöн.
— Ёна воис сьöлöм выланым. Велöдiсны, кыдзи видзны асьтö, вöчны сьöлöмлы да вир сöнлы колана упражнениеяс. Унатор босьтiм тöд вылö да кутам асьным нин ёнмöдчыны-бурдöдчыны гортын. Аттьöалам Галина Николаевнаöс олöмаяс вöсна ыджыд тöждысь да миянöс öтувтöмысь. Öнi, кор коронавирус вöсна он лысьт петны ылi туйö, ветлыны санаторийö, татшöмторйыд зэв лöсялö ылi сикт-посёлокса олысьяслы, — кыпыд ловкылöмöн сёрнитiс Галина Александровна Созонова.
— Витамина да туруна чай гортöдзныс нуам и вермытöмъяслы. Ньöбöм приборъясыс кольöны миян дорö, да татшöм гортса санаторийтö котыртлам на, шымыртам и мукöдöс, — аскиа лунö видзöдö Галина Николаевна.
Марина Дадашова, Татьяна Чувьюрова.
Снимокъяс Екатерина Фаныгиналöн да Татьяна Чувьюровалöн.

Комментарии:

Добавить комментарий

Свежий выпуск: за 22 апреля