Ноябр 26-öд лунö тырис 20 во, кыдзи Чечняын служитiгöн ассьыс олöмсö сетiс Кырнышаысь зон Владимир Лажанев.
Чужис сiйö 1980-öд вося июнь 18-öд лунö тайö сиктын. Мамыслöн сiйö вöлi öтка пи, олiсны сыкöд кыкöн. Велöдчис Вылыс Ярашъюса школаын, помалiс öкмыс класс, сэсся вуджис Помöсдiнсаö, кöнi öти сайын босьтiс трактористлысь право. Сiйöс ичöтсяньыс кыскис техника дорö. Школа бöрын уджалiс Помöсдiнса видз-му овмöс кооперативын трактористöн, медводз «Владимировец» сэсся «Беларусь» вылын. Уджъёртъясыс ошкисны сiйöс шаньлунсьыс, уджас нырччöмсьыс.
Сöмын на тырис 18 арöс, мöд лунас жö босьтiсны армияö. Колльöдчан рытö волiсны рöдвужыс да ёртъясыс. Быдöн сиисны служитны бура. Локтан лунас колiс лэччыны Кулöмдiнö военкоматö. Кöсйис мунны автобусöн, но сiйö эз сувт. Корсис мöд машина да мунiс сiйöн. Сьöлöм вылас мыйлакö вöлi сьöкыд. Машина вылö сöлöм бöрын бöръяысь синсö чöвтлiс чужан сикт вылас. Дерт, кöнкö, тöдiс, мый армияын служитны абу кокни. Кывлiс, кöнкö, и Чечняын мунысь война йылысь. Сэкжö тöдiс и мог йылысь, кодöс быть колiс пöртны олöмö. Бöръяыс лоысь салдатлысь кыдзкö лöньöдiс сьöлöмсö да сетiс зумыдлун.
Владимир медводдза кадсяньыс веськалiс биа кось мунанiнö — Владикавказö. Чечняын буретш пансис мöд война. Та вылö видзöдтöг коми зон повтöг олöмö пöртiс воинлысь мог. Служба помöдз колис сöмын душ-мöд тöлысь. Дерт, кöнкö, Владимирлöн водзö олöм вылö вöлiны кыпыд мöвпъяс. Но…збыльмöдтöг тай колисны найö. Ноябр 26-öд лунö 25 морта застава кыйöдiс кытшалöм Бамутысь боевикъясöс. Лыйсьöм пансис пажун кадö. Но пуляяс швичкисны эз Бамутладорсянь, а тылö кольöм вöр дiсянь. Салдатъяс чеччыштiсны окопö, восьтiсны воча би. Радöвöй Лажанев, БМД-са наводчик-оператор, котöртiс аслас машина дорö, медым аслас «кöрт вöвсянь» зырöдны вöрöгöс. Öчеред вурыштiс буретш сэк, кор зон кайис нин башня вылö. Чечняса снайпер пыр кежлö орöдiс том мортлысь олöмсö. Та йылысь висьталiс комбат Борисенко, кодi боевöй ёртыскöд Кырнышаö, гортас вайис усьöм салдатлысь шойсö — шуштöм «200-öд номера груз». Пасйис сiйö, мый Владимир Лажанев вöлi збыльысь, повтöм боецöн, бур ёртöн. Сiйö матыссаясыслöн, ёртъясыслöн сьöлöмын пыр кежлö коляс ловъяöн. Мамыслöн шогыс вöлi помтöм, сьöлöмыс доялiс нэм помöдзыс, кадысь водз кусыньтiс сiйöс.
Мария Дёмина.
Кырныша.