«Куж» овмöдчöминса администрация «Йöзкостса бюджет» балаö пырöдчöмöн Озъяг посёлоклöн выль юкöнын Молодёжнöй улича кузя нюжöдiс ва визь. Танi томъяслы сетлiсны 20 му юкöн, керкасö лэптiсны квайтöс нин. Баласö олöмö пöртöм вылö республика торйöдiс 600 сюрс, администрация пуктiс 68 сюрс шайт, да посёлоксаяс чукöртiсны 7 сюрс шайт.

Сюйисны нёль кытш, нюжöдiсны 700 метра ва провод да йитiсны посёлокын мунысь шöр ва визьö.
Вöчис Сыктывкарысь асшöр уджалысь Е.М.Друговалöн котыр. Юркарысь уджалысьяс локтiсны ас техникаöн да вöчисны ставсö урчитöм кадöн.
Водзö оланiн кыпöдысьяслы колö шыöдчыны «Шоныд сетан Коми компания» котырлöн Кулöмдiнса юкöнö, босьтны колана документъяс да аслыныс йитчыны ва визьö. Бытьысь аслыныс жö ньöбны ва счётчик да трубаяс.
Пасъям, 2014-öд восянь олöм бурмöдöм могысь «Куж» овмöдчöминса администрация уджтасъясö пырöдчöмöн Кужйын, Ульянаын да Озъягын нюжöдiс 3,5 километра ва визь.
Оксана ЛЕБЕДЕВА.
Снимок «Куж» овмöдчöминса администрациялöн.