Выль висьтъяс

[ A+ ] /[ A- ]

Медся пöрысь 

Öти сиктö газетлöн локтан петаслы материал чукöртны воисны юрсиктысь корреспондентъяс. Пырисны овмöдчöминса администрацияö юралысь ордö тöдмасьны бöръя выльторъясöн, юксьыштны мöвпъясöн, урчитны лунтырся öтувъя удж. Асъя пöсь тшай юигмоз юалiсны юралысьлысь, кодi пö эськö тiян овмöдчöминад медся пöрысь айловыс? 
— Миян? Здук, час мöвпышта. А, дум вылö уси — Марпа Степан, öкмысдас куим арöса, орчча Тима грездысь. 
— А позьö кыдзкö сыкöд аддзысьлыны, варовитыштны, юасьыштны воддза олöм йывсьыс? Юрыс кöть уджалö жö-а татшöм ыджыд арлыдаыдлöн? 
— Да, веськыда кö шуны, нинöм нин Марпа Степаныдлöн оз уджав. Сiйö воддза вонас нин кувсьывлiс. Эк, водзджык эськö колö вöлi волынытö да. А öнi мый сэсся — сöмын чуймавны… 

Арся гöрöм 

Öтнам. Пукала öшинь дорын, вом пытшкын кывйöн чорыд кампет бергöдлігтыр юа тшай, видзöда кык öшинь рама костын йöрмöм уна рöма бобувöс, некодлы ог дöзмöдчы, нинöм йылысь ог мöвпав, некодöс ог виччысь. Шойчча. Шойчча быдсяма арся уджъясысь, а ёнджыкасö картупель босьтöмысь, сiйöс мешöкъясöн гöбöчö да ывла гуö пыртлöмысь, кос юкалан висьöмысь. 
И другöн, öдзöсö гольгöмкöд тшöтш, керкаö пырис тöдса тракторист Микита Веня да торкис менсьым тöжд тöдтöм лунöс. Сiйö öдзöс дорсянь гажа гöлöсöн юаліс: 
— Чолöм, Вась Митрей! Кыдзи олан, кыдзи вылан? Ёна ог кут öтарö-мöдарöасьны, кадыс этша: картупель мутö гöрам огöй? Ог горшась ёнасö, джын дон тулыссясьыс босьта, öнi кыз уджъясысь прöстми колхозын, да и поводдяыс шогмана сёйöд мутö бергöдлыны, буретш тöлалыштiс. Аски сэсся сёр нин лоö, механикöй тшöктiс торйöдны гöрсö тракторысь да пуктыны лабазö тöвйыны. 
Ме сiйöс, дерт, кывзi, и менам сы дорö лои душ-мöд юалöм: 
— Ноко, Микита Веня, гöгöрвоöд менö, кутшöм повзьöмысь колö гöрны мусö арнас, кор ми гöтыркöд сöмын вежон сайын на сiйöс ки ормöн картупель босьтiгöн быд ногыс бергöдлiм виланас и зырнас, а пöчö кытсюрö весиг пу тэльöбöн. Оз öмöй тайö тырмымöн ло? 
— Оз, дерт. Тi, гозъя, куш картупель котыр увсьыс мусö вöрзьöдыштiнныд, а менам тракторлöн гöрйыс косялас öти му помсяньыс мöдарöдзыс быд пельöс, ёгыдлысь став вужсö чергöдас вывлань, гагйыдлысь став позсö пазъяс да коялас найöс му веркöсас, мед бöрсö сямныс оз нин ло шоныдiнас кодйысьны, веркöсас и измасны кöдзыдысла. Локтан воын, небось, красуйтчан ёгтöгыд да гагтöгыд. Сэсся öд и колялöм картупельыд мыччысяс. Ме тай дзик öнi тiянкöд орччöн мамöлысь мусö гöри да вель на уна аддзытöм картупельыд еджыдöн сяркнитчис му веркöсас. Ыжъясыдлы зэв на и шогмана лоас… 
— Ёна жö тэ, Микита Веня, вежöра, да нöшта и зiль, татшöм йöзыд гежöдöсь. Эк, и мыйла тэ менам чойлы ас кадö эн зятяв, ме эськö некутшöм шог öні эг тöд? Висьтав бурджык, юöм бöрад уджйöз вештан кадыд, кöнкö, матыстчö, та вöсна и мырсян, сьöм чукöртан. Дзик ог эскы, мый менам му понда майшасян. Ладнö, эн дöзмы, сiдз нин сöра. Колö кö тэныд сэтшöма — лэччам, гöрам. 
— Ог, дерт, дöзмы — дзолясянь тöда, тэ век радейтлiн шмонитнытö. Лэччы му вылад, ме недыр мысти матыстча сэтчö. Öнi мамö дорö пыравла бöрö-водз сёйыштны, висьтала, мед лэччасны Оля чойкöд чукöртны мыччысьöм картупельсö, потшöсъяссö гöгöр восьталöмаöсь нин да, шöйтысь кöзаясыс öдйö кураласны эмтö… 
Кыр йывсянь лэччигöн ылісянь нин казялi аслам му вылысь кутшöмкö вежсьöмъяс. И сöмын матыстчöм бöрын чуймöмöн казялі, мый менам картупель муöй зэв бура гöрöма, и, колö шуны, весиг тулысся дорсьыс бурджыка, весиг со боръяс пöлöныс колананог лэптöма да нöшта агас кыскалöмöн ёгсö пыркöдöма. А тонö орччöн Микита Веня мамыслöн муыс вöрзьöдлытöм, гöртöм. 
Да-а, меным коли сöмын шензьыны: тайö Микита Веняыд уна öти пöлöс муяс пöвстад торксьöма, буракö, да менсьым вежöн гöрöма. Позьö, эськö, шмонитöмöн соссьыны, да мыйкö дзик абу кад тешитчыны уджалысь вылас. Дерт, вештыся татшöм бур уджсьыд, мында корас, сы мында и сета. Ог на гöльмы. 
Меным сэсся быттьö нинöм лои вöчны гöрöм му дорын да бöр вöрзи гортлань. Сöмын му вылö локтöм суседъяслы, Микита Венялöн мамыслы да чойыслы, тшöкті дась локтöмöн öктыны менам му вылысь мыччысьöм картупельсö аслыныс. 
Пукала öшинь дорын, вом пытшкын чорыд кампетöн юа тшай коляс, видзöда кык öшинь рама костын йöрмöм уна рöма бобувöс. Некодлы ог дöзмöдчы. Нинöм йылысь ог мöвпав, некодöс ог виччысь. Шойчча. 
А олöмыс мунö и мунö… 

Николай Игнатов, 
Помöсдін.

Комментарии:

Добавить комментарий

Свежий выпуск: 28 марта

Осторожно — мошенники!