Кöсъя гижыштны аслам рöдвужысь айловъяс йылысь. Медводз пасъя пöль, Кирилл Павлович Шатохин йылысь. Чужлiс сiйö 1909–öд воын Приморскöй крайын Партизанск районса Новолитовск сиктын.

Сылöн бать-мамыс Чернигов обласьтса Гибралтарскöй проливсянь пароходöн быдса во кывтiсны Ылi Асыввылöдз. Налы сэнi вичмöдiсны му юкöн. Вочасöн овмöдчисны сэтчö. Чужисны челядь – квайт пи да нёль ныв. Ставнан пияныс тышкасисны Великöй Отечественнöй война вылын – Кирилл Павлович кындзи Павел, Сергей, Михаил, Алексей да Александр.

Кирилл Павлович помалiс сизим класс. Уна во сетiс военнöй службалы. 1931–öд воын вöлi радиороталöн юкöнса курсантöн. 1939–öд воын тышкасис ХалкинГол ю вылын. 1942–öд воын сiйö старшöй лейтенант чинöн веськöдлiс Тихоокеанскöй флотса военно-морскöй почта станцияöн. 1945–öд восянь КПСС-лöн партияын. 1945–öд воын петкöдчис японечьяскöд тышын, Ылi Асыввывса фронт вылын. Ранитчылiс самолёт усигöн, лэбиганыс вöрöглöн лыйсьöм улö веськавлiсны да. Тöдлiс уна сьöкыд. Торйöн нин сьöкыда вуджöдiс сiйöс, кыдзи Японияса снайпер син водзас лыйис матысса ёртсö. Контузитчылiс на воюйтысь часьтъясö почта новлöдлiгöн. Повтöмлун петкöдлöмысь Кирилл Павловичлы вичмöдiсны мöд тшупöда Отечественнöй война орден да медальяс. Запасö лэдзисны капитан нимöн. Водзö уджалiс Сучан карын почтаöн веськöдлысьöн. Военно-морскöй вынъясса капитан нималiс бур уджöн.

Менам прадед, Анна Кирилловна Шатохина пöчлöн батьыс, Кирилл Петрович Кураленко, тышкасис медводдза мирöвöй война вылын, кодi мунiс финнъяслöн нюръяс вылын. Бать, Александр Кириллович Шатохин, чужис 1946–öд воын Ылi Асыввылын. Школа помалöм бöрас велöдчис Ленинградса радиотехникумын, радиоаппаратура вöчан факультетын. Уджалiс авиацияын, сэсся Сибирын сир вийöданiнын. Коми муö локтiс 1978–öд воын. Зiлис Помöсдiнса леспромхозлöн Вöльскöй лесопунктын механикöн, технорукöн, лесопунктöн веськöдлысьöн. Öнi веськöдлö «ОптимаЛес» котырлöн пилитчанiнöн. Петкöдчылö спортса ветеранъяслöн вогöгöрся спартакиадаын, шахматöн ворсöмын петавлiс вермысьяс лыдö.

Дмитрий вокöй, кодi чужис 1980–öд воын, помалiс Сыктывкарса госуниверситет. Уджалiс­ Кулöмдiн районса юралысьöн, «Сыктывкар» кар кытшлöн администрацияын, Коми республикаса госсöветын, Коми республикаысь том йöзлöн парламентса председательöн, öнi Россия Федерацияса сьöм министерстволöн водзмöстчöмъяс сьöмöн могмöдан шöринса директор. Иван племянник, Дмитрий воклöн пиыс, велöдчö Москваын Россия Федерациялöн правительствобердса сьöм институтын.

Пöрысь пöльöй, пöльöй да сылöн вокъяс шедöдiсны Ыджыд вермöм. Менам рöдысь мукöд айловыс ыджыд пай пуктiсны республика, район да Дiасёръя посёлок сöвмöдöмö.
Анна Попова.
Снимок гижысьлöн чукöртöмысь.