Менам бать, Николай Павлович Третьяков, сиктса ног кö, Павел Миколай, чужис Пожöгдiнын 1931 вося май 1-öд лунö. Семьяын вöлi нёль челядь: Миколайысь öтдор, Öльöксей (1933-öд вося) вок, Лиде (1937-öд вося) да Анна (1940-öд вося) чойяс. 
Павел Степанович Третьяков (Степан Павел) батьнысö, менсьым пöльöс, босьтiсны фронт вылö 1941-öд вося июльын. Войнаöдз сійö уджаліс колхозса председательöн. Батьлы сэки вöлi 10 арöс, а чой-вокыс нöшта на посниджыкöсь. Пöль вöлі пулемётчикöн, воюйтіс Карельскöй фронт вылын сöмын некымын тöлысь. Усис 1942-öд вося январь 10-öд лунö. Сылы вöлi 36 арöс. 
А 1943-öд вося тулысын тшыгла кулiс батьлöн мамыс, менам Марфа Васильевна Третьякова пöчöй. Батьлöн висьталöм серти, найö зэв ёна тшыгъялiсны. Медым вердны посни челядьöс, мамныс корис суседъяслысь кöть кружка йöв (найö вöліны мöскаöсь), но йöвтö абу сетöмаöсь. Мамыс локтіс гортас, кайис паччöрас и куліс. Батьö Öльöксей вокыскöд чарöм вывтi даддьöн нуисны мамсö дзебны шойна вылö. Батьлы вöлi 12, а Öльöксейлы 10 арöс. 
Челядь колины дзик öтнаныс. Медся ичöт Аннаöс босьтісны детдомö. Миколай, Öльöксей да Лиде ёна тшыгъялісны. Медым дорйыны тшыгла кулöмысь мöд чойсö, Öльöксей нуис Лидеöс Кулöмдiнса челядь керкаö – мунісны кыткö подöн, кыткö бур йöз отсöгöн вöв доддьын. 
Öльöксей дядь ачыс висьтавліс менам вокъяслы вöр керкаын кыйсиганыс, мый миян бать вöлöма ыджыдджык да яндысьлöма корны либö гусясьны. А Öльöксей дядь вöлöма сюсь, сiйö ветлöдлöма орчча сиктъясöд, корöма милöстина. Ставсö, мый вичмöдлöмаöсь бур йöз, вайлöма батьлы, кутшöмкö пай нулöма чойясыслы Кулöмдiнöдз. Воклы висьтавліс, кыдзи öтчыд вöзйысьöма войколавны пöрысь гозъя ордö. Вердöмаöсь-юкталöмаöсь зонкатö да водтöдöмаöсь узьны. Водз асывнас дядь садьмöма чöскыд пöсь нянь дукысь, абу вермöма кутчысьны, сюйöма сумкаас душ-мöд тупöсь да пышйöма. Зэв пö ёна полi, мый суöдасны да нöйтасны. Пöрысьöдз казьтывліс дядь тайö лоöмторсö, нэм чöжыс сылы вöлі яндзим, мый тадзи «аттьöалiс» бур йöзöс. Но коліс вердны чойяссö да воксö, кодi быдсöн пыкталіс тшыгъялöмсьыс. Абу жö век мойвилöма. Öтчыд гусясьöмсьыд сюралöма. Сиктсянь неылын вöлöма мельнича, дядь гусялöма сэтысь мешöк пыдöсын пызь, мельничаса уджалысьяс суöдöмась да бура и нöйтöмаöсь сійöс. 
Бать висьтавлiс, кыдзи тшыгъялöмысь слабитöм челядь ыджыд пачö пырöмöн тэчлöмаöсь пес, медым ломтыны сiйöс. 
Мыйта шог, кынмалöм, тшыгъялöм да увтыртöм ас вывтiыс нуисны войнакадся челядь, но ставныс быдмисны шань, пыдди пуктана йöзöн, семьитчисны, быдтiсны челядьнысö, внукъяснысö. Лидия да Анна объяс нэм чöжыс уджалiсны леспромхозын: увйысьысьöн, пилорама вылын. Öльöксей дядь уджавлiс шахтёрöн, пöрöдчысьöн, пенсия вылö петiс столяр-плöтникöн. Сылы кöсйисны сетны Социалистическöй Уджвывса Герой ним, но бöръя здукас бöрыньтісны сы вöсна, мый эз вöв коммунистöн. 
Бать дыр уджалiс кер дорын, сэсся велöдчис тырсьöдчысьö да пенсияöдзыс уджалiс скöт дорын. Сиктын вöлi зэв колана мортöн, сэкся кадö матö быд овмöсын видзлiсны мöстö. Вöлi социалистическöй уджвывса ударникöн, бура уджалöмысь пасйылісны медальясöн. 
Степан Павеллöн ныв-пиянысь некод нин абу ловъя, но ми, налöн челядь да внукъяс, век кутам помнитны ассьыным бать-мамöс, пöль-пöчöс, кодъяс пуктiсны уна эбöс да вын, медым миянлы овсис бурджыка тайö вöльнöй светас. 
Алёна Третьякова. 
Вылыс Изьва посёлок, Сосногорск кар.