Сенатор Дмитрий Александрович Шатохинкöд,
Россия федерацияса Сöветын сьöм овмöс
комиссияö пырыськöд веськыд сёрни
Кутшöм бур вичмас ылі Войвылын олысь войтырлы?
Тавося тувсовъя серпасыс ёна торъялö мукöд воясысь, да збыльвылö, со татшöм. Йöз вомысь да кельыдлöз экранысь öні сöмын кылö ылі муясысь вайöм лёк висьöм «коронавирус» йылысь сёрни-басни. Та костын огö аддзöй югыд луныслысь нюжалöм, шоръяс да чорыд чарöма вöр бокъяслысь мичлунсö. Татшöма чабыртіс йöзсö лёк висьöм йылысь юöрыс.
Огö сетчöй лёкыслы, да пыр жö окота висьтавны газет лыддьысьяслы буртор йылысь. Тайö пöръя гижа гырысь чинаяслöн быдлунъя кывкутана колана удж йылысь, мый инмö Войвылын олысьяслы. Та могысь шыасьлі Коми Республика петкöдлысь сенатор, Россия Федерацияса Сöветын сьöм овмöс комиссияö пырысь Дмитрий Александрович Шатохин дорö. Москваысь неважöн воöмакöд бара варовитім, кутшöм да мый вежсьöмъяс эм талун кежлö сенаторлöн уджын. А бöръяысьсö сыкöд варовитлім öкмыс тöлысь сайын. Медводдза публичнöй сёрниысь сылысь казялі шöр могъяссö сенатор уджын: быд ногыс отсавны корсьны-вайны федерацияса кудйысь унджык сьöм радейтана республикалы. Сійö оз сöмын пукав Москваса кабинетъясын, а тшöкыда волывлö чужан республикаö. Аддзö кад да удитö ветлыны республикаса быд кар-районö.

• Дмитрий Александрович, висьталöй, пöжалуйста, медводз, мыйнö тайö лёк висьöмыс, дыр на кутас падмöдны йöзсö?
• «Кризис. Пандемия» — збыльвылö öні паськыда кывсьö. Чайта, тайö сьöкыдлунъяссö вермам венны öтвылысь. Олöмыс öд водзö мунö, колö талун мöвпавны да бура дасьтыны зумыд воськовъяс миянлысь Войвывнымöс водзö сöвмöдöм могысь.
• Ті нуöданныд зэв колана «Арктикалöн енби. Челядь» бала, мый шымыртö страналöн войвывса регионъясысь енбиа челядьöс. Кыдзи сійö пöртсьö олöмö?
• Кыдзи и висьтавлі сэки, кольöм вося август тöлысьö Анапа карын шоныд саридз бокын шойччисны челядь. Воркутаысь, Усинскысь, Ижмаысь да Кулöмдінысь, ставыс кызьöн, петкöдлісны миянлысь республиканымöс Россияса став войвыв регионъясысь сё ветымын челядь пöвстын. Ставныслы налы мойвиис дас нёль луннас бура гожъявны да купайтчыны, да нöшта тöдмавны уна-уна выльтор уна сикас войтырлöн культураысь, Россиялöн войвывса юкöнъяслысь история-ысь да ыджыд чинаяслöн кывкутана уджысь. Челядьыскöд творчествоа уджсö нуöдісны збыльвылö Россияса «Первой канал» телевидениеса тöдчана ведущöйяс. Донъяліс челядьлысь сёрни-петкöдчöмсö «Учитель года России 2018г.» велöдысьяслöн конкурсын вермысь (эксперт). Псковса да Мурманскса челядьлöн делегация, кодъяс бур боксянь торъялісны мукöдъясысь, волісны Москваö. Налы петкöдлісны медтöдчана местаяссö столицалысь да тöдмöдісны Россия Федерацияса Сöветлöн уджöн.
  Ме ачым аддзысьлі Комиысь воöм челядькöд, пані сёрнисö комиöн. Кулöмдінсаяс зэв ёна шензисны, мый ме, Москваысь воöм морт варовита комиöн да тöда Пожöг сикт йылысь. Ме висьтавлі чужан республика, пыдди пуктана йöз йылысь, вайöді пример вылö Питирим Сорокинöс, Раиса Сметанинаöс. Чуймöдіс менö, вöлöмкö, челядьыс оз тöдны став мирын нималана землякъясöс, омöля тöдöны чужан му пытшса озырлунъяс йылысь. Менö ёна шензьöдіс тайö.
  Таво бара жö дасьтысям тайö проектсö збыльмöдöм могысь. Нюжöдам шойччан кадсö кызь лунöдз. Регионъясö ыстім нин колана письмöяс. Таво вермасны ветлыны миянысь сöмын витöн. И корам, медым веськалісны сэтчö сöмын енбиа челядь, кодъяс петкöдлісны нин асьнысö бур боксянь сьылöмöн-йöктöмöн республикаын, чужан кыв тöдысьяс, енбиа да киподтуя челядь. И кута лача, мый национальнöй политика министерство кывкутöмöн нуöдас бöрйысяна уджсö, да мöдöдас енбиа челядьöс, кодъяс тöдöмöн петкöдласны том ас кодь чукöртчöмаяслы войвывса мичлунсö миян чужанінлысь.
  Мöвпалам, медым тайö программаыс витсё енбиа челядьлы нуöдсис во чöж. Шöр могыс, медым сэтчö ветлöм челядьыс гортö локтöм бöрын водзö вермисны сöвмöдны енбисö выльöн босьтöм тöдöм-лунöн.
• Кыдзи мунö вынсьöдöмыс Арктика зона паськöдöм кузя?
• Арктика талун кежлö кольö зэв колана темаöн. Ме радпырысь юöрта, мый меным мукöд сенаторъяскöд мойвиис öтув уджавны Арктика Сöвет котырын. Ми вöзъям ыдждöдны Арктикалысь границаяссö. Та кузя панöма зумыд удж, шымыртöма Россияса став федерацияса ведомствосö. Сöмын тавося февраль тöлысьын лоис вынсьöдöма нёль оланпас, ставыс вöзйöма отсавны войвылын ас вылö уджалысьлы. Ме чайта, мый медводз колö отсавны экономика бердö сибöдчысьяслы – ас вылö уджалысьяслы. Тöдчöда, выльмöдан Арктика кытшö пырöны Мурманск обласьт, Ненеч, Чукотка, Ямал-Ненеч автономнöй кытшъяс, Карелия, а сiдз жö «Воркута» кар кытш, Красноярск край. Та кындзи Арктика зонаö пырисны Норильск кар кытш, Архангельск обласьтысь öткымын район, «Архангельск кар» муниципальнöй образование, Войвыв Йиа океанысь муяс да дiяс, Якутияысь öткымын улус. Комиысь Арктика зонаын сöмын Воркута кар да сы гöгöрса посёлокъяс. Миян öнія мог Арктикалысь границасö паськöдны лунвывланьö: Инта, Усинск каръяс да Чилимдiн районöн. Та кузя миян нырщикалöмöн да корöмöн нуöдöма индöм уджсикас нырвизя министерствояскöд уна сöвещание-сёрни. Эска, мый öтвылысь вермам пöртны олöмö миян йöзлы зэв коланаторсö. Та кузя торъя индöдлöн балаыс кольöм воын нин вöлі вынсьöдöма Россияса сьöмöн вöдитчан министерствоöн, а регыд мысти лоö вынсьöдöма оланпас. Коймöд мог, паськöдны торъя кокньöдъяс тані олысьяслысь олöм бурмöдöм могысь. Медым войвылысь этшаджыкöн уджалысь йöзыс мунісны лунвылö мукöд регионъясö. Медым позис чуксавны том кужысь специалистъясöс татчö.
  Войвыв да асыввыв регионъяслöн федерацияса министерство бердын вынсьöдöма Арктика Сöветöн веськöдлан котыр. Шöр могыс – лöсьöдны-дасьтыны стöч туйвизь Арктика водзö сöвмöдöмын. Сійö быттьö «государстволöн машина» котыртас уджсö. Места вылын – войвывса регионъясын тайö «машина» улын пондасны водзмöстчыны-уджавны предпринимательяс-резидентъяс, кодъяслöн эм позянлун ас уджö пуктыны дас миллион шайт либö унджык да вайöдны содтöд сьöм. Татшöм котыръяслы, кодъяс могмöдöны войвылын олысь войтырöс сёян-юанöн да мукöд быдлунъя коланторъясöн, вичмöдасны вот сетан личöдъяс. И кор лоö татшöм личöдыс, дерт жö, ыджыд предпринимательяс пондасны бöрйысьны, кöні котыртны ассьыс уджсö: мунны лунвылö, либö вот личöдöн мунны войвылö мупытшса озырлун перйöм могысь. Ме стöч чайта, бöръясны личöда войвыв регионъяс!
  Арктика Сöветö пырöны овмöс юкöнъяс. Менö вöзйисны туй сöвмöдан юкöнöн веськöдлысьöн. Юкöныс шымыртö зэв унапöлöс туйяс. Тайö Войвывса саридзлöн флот да саридзвывса войвывса туй, Войвывса кöрттуй овмöс, ичöт да гырысь самолётъяс пуксян-кыпöдчан аэродром комплекс, юяс вомöн посъяс, карса уличвывса машинаöн ветлан-мунан туй дöзьöритöм-весалöм да мукöд. Миян юкöнлöн медшöрыс — Арктика кузя примитан законъяссö вайöдны-öткодявны тайö туйяссö водзö сöвмöдöм кузя асыввыв-войвылö, сэсся, медым лыддьöдлан туй овмöслы сетны тшöтш вот сетан личöдъяс.
  Талун кежлö пример вылö вайöда татшöмтор: «Луза-лес» котырöн вöр лэдзöм да сыысь дасьтöм прöдукция нуам, медводз, Балтика море берегöдз, медым сэсся Войвывса Йиа океан пыр нуны асыввылö, шуам, Японияö, Кореяö. Кутшöм ыджыд кытш колö вöчны, пöшти тöлысь коляс. Лоас кö Войвывса саридзын йи жугöдлöмöн ва вывса бур туй, тайö прöдукциясö позяс нуны места вылöдз дас лунöн. Та могысь колö миян пыр – Коми республикалöн му вывті мунысь кöрттуйсö водзö нуöдны асыв-войвылö, паськöдны, бурмöдны, петкöдны саридз берег бокö. Сэки лоö позянлун сöвмыны и миян республикалы – öд ми стöч транзит туй вылынöсь. Öні нин кöрттуйö федерацияса сьöм кудйысь пуктöны ыджыд инвестицияяс Сосногорск да Ираёль станцияяс сöвмöдöмö. Ставсö тайö колана ногöн миян отсöгöн лоö пасйöма дасьтан законъяслöн балаясö.
  Сöмын на неважöн, февраль 25-öд лунö, туй сöвмöдан комиссия вылын шуим Сыктывкарын нуöдны торъя заседание, медым пыдысянь видлавны-петкöдлыны машинаяслы чорыд веркöса туй вöчöм Ухтасянь – Печора кар пыр – Ненеч автономия кытшöдз да лыддьыны-корны федерацияса кудйысь колана мында сьöм панöм туйсö помалöм вылö.
• Интернет везйысь лыдди Тіян дорö шыöдчöм: «Вöр керкаяслöн кутшöм аскиа луныс?»
• Вöралысьяслысь тайö юалöмсö ме тшöтш жö пыр кута тöд вылын. Меным гижöны и миян вöрын кыйсьысьяс да и мукöдлаысь вöралысьяслöн котыръяс. Карелияын да ыджыд Красноярск крайын вöралан керкаяс кузя кыптöма уна помка, öд вöр керка лыдыс странаса вöраинын лыддьысьö сё сюрсысь унджык. Важöн нин дасьтöма федерацияса закон бала вöр керкаяс кузя, а вынсьöдöмыс эз на артмы. Сэтчö пасйöма, кыдзи кокньыда пасйыны вöралысьлысь да чери кыйысьлысь вöрса да ю бокса стрöйбаяссö.
  Аттьö, Дмитрий Александрович, мый кужöмöн сибöдчанныд йöз дорö да бара юксинныд асланыд быдлунъя уджöн, ставыс тайö колана миянлы, коми газет лыддьысьяслы.
  Прокопий Габов.
  Снимок интернетысь.