Водзö сöвмöмöн

[ A+ ] /[ A- ]


«Помöсдiн» кооператив йöлысь вöчöм чöскыд вöлöганас нималö оз сöмын районын, но и республикаын. Помöсдiн вожö могъясöн волысь кывкутысь йöз бытьысь пыравлöны налöн лавкаö, ньöбöны йöв, рысь, нöк, сыр, йогурт, вый да мукöдтор. Став вöчöмсö зэб бура босьтöны видз-му овмöслöн Кулöмдiнса да юркарса ярмарка да рынокъяс вылын. Вöлöга тыра кöзöда машина ветлö районса сикт-грездъясö, тшöтш и орчча Мылдiн районö. Найöс быдлаын виччысьöны. Талун вöчöны кöкъямыс сикас вöлöга, мöвпалöны чöсмöдлыны миянöс нöшта и рыськысь вöчöм кремöн. Йöлысь вöлöга вöчöны быд лун.

  • Пырöдчим «Йöзкостса бюджет» балаö. Сы серти ньöбам кык ванна, вежам вит вося важсö, мöдыс лоас содтöдöн, нöшта чöскыд да бур рысь вöчöм могысь босьтам рысь топöдан да кöдзöдан. Лöсьöдам на улö местасö. Обродуваниесö ваясны сентябр помын. Водзö вылö мöвпалам нöшта ньöбны миксер, — сёрнитiс «Помöсдiн» кооперативлöн правлениеöн веськöдлысь Татьяна Владимировна Уляшева.

  • Оборудование выльдöмын бала серти республикасянь вичмис 800 сюрс, районса администрациясянь – 130 сюрс, ачыс кооператив пуктiс 329 сюрс шайт. Йöлыс асланыс фермаясысь. Вонас вöчöны 25 тонна рысь.
    Кооператив грант шедöдöм могысь пырöдчö унасикас конкурсъясö, начкысянiн кыпöдлiс «Ичöт балаяс» серти. Буретш веськöдлысьлöн нырччöмöн да вермöмъясысь сьöм шедöдöмöн и бергöдчö да сöвмö ыджыд видз-му овмöс.
    Марина Дадашова.
    Снимок видз-му овмöс юкöнлöн чукöртöмысь.

Комментарии:

Добавить комментарий

Свежий выпуск: за 17 сентября