Кыдзи гижліс нин «Парма гор» газет, республикаса юралысь С.Гапликовлöн вöзйöмöн Комиын пöртсьö олöмö «Йöзкостса бюджет» бала. Сикт-посёлокса да карса олысьяс асьныс бöрйöны, мыйджык колö вöчны, медым олöм вöлі бурджыкöн.
Кöнкö йöз шуисны, мый налы колö дзоньтавны туй, кöнкö корисны вöчны ёнмöдчанін ли челядьлы ывлавывса ворсанін да с.в.
Районын «Йöзкостса бюджет» бала олöмö пöртöм йылысь висьталіс районса администрацияöн веськöдлысь Сергей Владимирович Рубан:
— 2016-öд воын Коми республикаса юралысь С.А.Гапликов вöзйис пöртны олöмö «Йöзкостса бюджет» бала. 2019-öд воын кö та вылö видзисны 90,8 миллион шайт, локтан воын нин, республикаса юралысьлöн индöдöн, «Йöзкостса бюджет» уджтас серти балаяс олöмö пöртöм вылö вичмöдасны 124,1 миллион. Тавоöдз öти бала олöмö пöртöм вылö сетлісны медся унасö 300 сюрс шайт. Республикаса олысьяслöн корöм серти, локтан воын нин тайö лыдпасыс содас кык пöв, 600 сюрсöдз. Тайö сетас позянлун Кулöмдін районын пöртны олöмö 15 бала.
Бöръя куим воöн миян районын 18 овмöдчöминын пöртісны олöмö 19 424 499,97 шайт дон 25 бала. «Йöзкостса бюджет» серти вöчисны öзйылöмъясысь доръян ва видзанінъяс, нюжöдісны ва визьяс, вöчисны туйяс, дзоньталісны усьöм воинъяслы обелискъяс да казьтылан пасъяс, шойччанінъяс, челядьлы да верстьöлы ёнмöдчанінъяс. Эмöсь асшöр удж сöвмöдысь балаяс: шуам, таво Дереваннöйын воссяс нянь пöжаланін, ньöбас оборудование «Кулöмдінса МТС». Эм нин уна мöвп, кутшöм балаяс позяс пöртны олöмö локтан воын.
Йöз водзмöстчöны балаяс олöмö пöртöмын. Сиктъясын да посёлокъясын олысьяс бура тöдöны, мый колö вöчны овмöдчöминын олöм бурмöдöм могысь. Асьныс и вöзйöны балаяссö, найöс олöмö пöртны пуктöны ассьыныс сьöм, оз кольччыны бокö, кор колö мыйкö вöчны ли отсыштны, оз виччысьны некодöс бокиысь, а босьтчöны да вöчöны асьныс. Мукöд баласö олöмö пöртігöн вичмöны и уджалан местаяс. Сійö, мый содтісны сьöм, сетас позянлун пöртны олöмö ыджыдджык балаяс велöдан, культура, спорт, предпринимательство юкöнъясын, сикт-посёлокъяс мичмöдöмын.
Зэв водзмöстчысь, чужанін дінö абу веськодь йöз олöны Помöсдін вожын. Кыдзи пöртсьö олöмö «Йöзкостса бюджет» бала тайö овмöдчöминын, висьталіс юралысь Анатолий Егорович Уляшев:
— Республикаса юралысь С.А.Гапликовлöн водзмöстчöмöн 2016-öд восянь Комиын пöртсьö олöмö «Йöзкостса бюджет» бала. «Помöсдін» овмöдчöмин пырöдчö тайö уджö коймöд во. 2017-öд воын тайö уджтас серти Сордйылын вöчим автобуслы сувтланін. Доныс сувтіс 253105 шайт. Кольöм воын тайö жö деревняын вöчим челядьлы ворсанін (тайö бала олöмö пöртöм вылö муніс 300000 шайт).
2019-öд воын йöз корисны нюжöдны Помöсдінын ва визь. Кузьтаыс 800 метра, сувтас 360 сюрс шайт.
Эмöсь нин мöвпъяс, кутшöм балаяс эськö йöз кöсйисны пöртны олöмö локтан воын. Выльгортын колö ёнмöдчанін, колö вужвыйöн дзоньтавны Скöрöдумса культура керкалысь вевт, сэні жö лöсьöдны шойна, Помöсдінын вöчны Полевöй да Старовскийлысь уличаяс.
Пасъя, мый «Помöсдін» овмöдчöмин улö пырысь сикт-грездъясын олысьяс сьöлöмнас висьöны асланыс оланінъяс вöсна. Чукöртчылöмъяс, кöні видлалам йöзлысь вöзйöмъяс, некор оз кольны лöня. Йöз дорйöны ассьыныс балаяс, кодъясöс кöсйöны пöртны олöмö, эскöдöны, мыйла колö вöчны буретш сійö либö тайö уджсö. И ми век воöдчам öти кывйö да вöчам кывкöртöд, мый эськö медъёна колö йöзыслы да мый позьö вöчны «Йöзкостса бюджет» отсöгöн, öткымын бала олöмö пöртігöн йöзлы вичмылöны уджалан местаяс.
Грездса олысьяс аттьöалöны сыысь, мый вöчöма нин, да кутöны лача, мый водзö вылö мöвпыштöмторъяссö сідзжö пöртам олöмö.
Локтан воын республикаса юралысьлöн индöдöн «Йöзкостса бюджет» уджтас серти балаяс олöмö пöртöм вылö вичмас 124,1 миллион шайт. Сідзкö, позяс вöчны гырысьджык уджъяс».