Быдсяматорсö мöвпыштö Надежда Михайловна Подюкова, мед ручсаяс оз овны весь. Чукöртлiс ставнымöс сьывны мича коми сьыланкывъяс. Видзöдысьяс сьылiсны тшöтш, ёна кекöначисны. Сьöлöм бурмис, кор исласим лямпа вылын, öд и гажыслöн нимыс вöлi «Лямпа вылын исласям, лым толаын туплясям». Верстьöяскöд тшöтш волiсны дзолюкъяс и олöмаяс. Серамыс тай ылöдз кылiс-а. Нöшта культура керка чукöртлiс видзöдысьясöс «Гажа грездын ваксьыштам» гаж вылö. «Сударушкиö» ветлысьяскöд тшöтш и сиктсаяс пуктiсны ичöтик тешъяс. Йöзлы ёна воис сьöлöм вылö куим Катериналöн — Поповалöн, Булышевалöн да Адамовалöн ворсöмыс. Синванысö чышкалiсны серамысла, кор Владимир Трегубов да Иван Попов аньясö пасьтасьöмöн ворсiсны балалайка вылын да йöктiсны. Тайöс колiс аддзыны! Кор Любовь Попова петiс «Как хотела меня мать…» теш вылö, йöзыс дзик пыр и кутiсны кекöначны, öд сиктсаяс тöдöны сiйöс, кыдз зэв бур артисткаöс. Сыкöд тшöтш ворсiсны А.М.Зезегова, К.Г.Есева, А.И.Адамова, З.М.Гуляева, И.А.Панов, Владимир Трегубов да ме. 
Н.М.Подюкова котыртлö шегйöн, шахматöн, шашкиöн да теннисöн ворсöм. Менам плешкöй донавлiс, кор, шегйöн ворсси да, печлалiсны. Волiс овмöдчöминса юралысь Д.В.Кирушев. Ошкис, мый чукöрмим унаöн. Надежда Михайловна некодöс эз вунöд: юмовторъяс вичмисны и верстьöлы, и челядьлы. Куим гаж нуöдiс «Сударушки» котыр Кебанъёльын, Кужйын да Озъягын. Ми аттьöалам и видзöдысьясöс, и клубса уджалысьясöс, кодъяс юктöдiсны миянöс пöсь чайöн, а видзöдöм бöрас аттьöалiсны мича кывъясöн. Зэв нимкодь, мый Кужйысь Зоя Николаевна Кузнецова козьналiс Надежда Михайловналы уна сера мича кепысь гоз. Аттьö пö, Надежда Михайловна, мый сы мында вын пуктан сиктын культура сöвмöдöмö, со кутшöм мичаа сьыланныд-йöктанныд. Миянлы вöлi зэв нимкодь Надежда Михайловна вöсна. 
Гижöдъяс да снимокъяс 
Екатерина УЛЬНЫРОВАЛÖН. 
Руч.