Май 19-öд лунö Россияын казьтылöны СПИД-ысь кувсьöмъясöс. И оз весьшöрö, öд тайö сьöкыд висьöмыс уналысь босьтiс олöмсö. 
ВИЧ — тайö мортлысь иммунитет уськöдысь вирус, кодi вайöдö СПИД-öдз — кулöмöдз вайöдысь сьöкыд висьöмöдз. Учёнöйяс да врачьяс пуктöны ыджыд вын, медым аддзыны висьöмсö бурдöдан лекарство, но нинöм на эз артмы.Кутшöм кöть мичаöн да ас дорас кыскысьöн эз вöв тöдтöм морт, кодi вöзйö лоны тiянлы мусукасян «ёртöн», тi и мöвпыштны он кужöй, мый ыджыд лёк вермас вайны дзоньвидзалуныдлы сыкöд öти радейтчан вой. Морт, кодi олö-мусукасьö кодкöд веськалö, дерт жö, новлöдлö висьöмъяс, кодъяс вуджöны тайö лёкас сетчöмысь. Лоöй сюсьöн да видзчысьысьöн татшöм «ёртöс» бöрйигöн. Быд выль йитöд вермас вайны лёк тiян дзоньвидзалунлы да весиг олöмлы. 
Висьöмсö öлöдöм могысь колö видзчысьны, кыдз пасйим нин, кодкöд веськалö мусукасигöн, вир сöнö укол сöстöммöдтöм шприцöн сюйигöн, татуировка да пирсинг вöчигöн. 
ВИЧ-инфекция новлöдлысь — нёрпалысь морт, висьöмыс кöть весиг оз на тöдчы ни оз петкöдчы анализъясын. ВИЧ-инфекция — дыр нюжалысь висьöм, вермас кыссьыны 2-3-сянь 10-15 воöдз, кувтöдзыс. ВИЧ медсясö овлö вирын, спермаын, мамлöн йöлын да с.в., кысянь ёнджыка разалö инфекция, и этшаникаöн кудзын, дулльын, синваын, пöсьын да с.в., насянь висьöмыс оз разав. 
СПИД новлöдлысьясысь 86 процентыс вируссö шедöдiсны кодкöд веськалö мусукасьöмысь. Висьöмыс вуджö öткодя — айловсянь нывбабалы кöть мöдарö. Морöсöн кагаöс вердiгöн вируслöн вуджны позянлуныс матö 12-20 процент мында. И вуджö сiйö оз сöмын висьысь мамсянь кагаыслы, но и инфицируйтöм кагасянь вердысь аньлы, кагаыс кö, кодi чужис дзоньвидза мамсянь, висьмис ВИЧ-öн. Вирус вуджö мортлы и вир сюйигöн, матö 90 процентыслы, босьтöма кö сiйöс ВИЧ-инфекция новлöдлысь донорлысь. Гежöдика, но эм позянлун висьмыны мортлы пытшкöс органъяс либö кучик пуктiгöн да нывбабаясöс искусственнöя тырсьöдiгöн. 
Лёк, мый ВИЧ новлöдлысь морт асьсö дыр кылö дзоньвидзаöн, висьöмыс оз петкöдчы уна во. Олö кыдз и пыр, нинöмöн оз торъяв мукöдысь. Кыдзи овлö, весиг оз тöд, мый новлöдлö ВИЧ и вермö висьмöдны мукöдöс. 
СПИД-öн висьысьясöс да ВИЧ-инфекция новлöдлысьясöс уна во видзöдлас улын кутöмöн туялiсны, мый ВИЧ оз вудж ёртасьöмöн кутчысьлiгöн да окасигöн, тасьтi-паньöн да вольпась кöлуйöн, а сiдзжö гортса да уджвывса эмбурöн öтув вöдитчигöн, душын кöть купайтчанiнын мыссигöн, öтувъя транспортöн ветлiгöн, ном-гут да мукöд вир юысь гагъясöн ни сынöд пыр. Сы вöсна некутшöм лёк оз вайны ВИЧ-инфицируйтöм йöз велöдчанiнын либö удж вылын, öтувъя нуръясянiнын, öтувъя жö оланiнын бергöдчигöн да эмбурöн вöдитчигöн. 
Колö пасйыны, мый ВИЧ-öн висьмыны ыджыд позянлуныс медсясö мортлöн оласног сайын. Мед он веськав сылöн налькйö, колö овны дзоньвидза олöмöн. 
Тайö висьöм кузя серпасыс миян районын абу ёна ышöдана. Тавося май 17-öд лун кежлö районын пасйöма ВИЧ-инфекция новлöдлысь 41 мортöс. На лыдысь танi пыр олысьыс 21 морт: Кебанъёльын — сизим, Кулöмдiнын — вит, Кужйын — куим, Югыдъягын да Зимстанын — кыкаöн, Пожöгын да Керчомъяын — öтикаöн. 2010 восянь, найöс видзöдлас улö босьтöмсянь, кулiс сизим морт, на лыдысь öти — СПИД-ысь. Унджыкыс 45-50-ысь ыджыдджык арлыдаяс. Нёрпалысьяс бöрся видзöдан кадö чужис квайт кага: витыс — дзоньвидзаöсь, öтиыс — видзöдлас улын. 

Галина КАРМАНОВА, 
врач-инфекционист.