Февраль 21-öд лунö Сыктывкарын «Октябр» шойччан да кино видзöдан шöринын мунiс полицияын уджалысьяслöн, ведомствоысь ветеранъяслöн «В службе-честь!» фестиваль. Сiйö мунiс витöдысь нин, таво сиисны Победасянь 75-öд вося тшупöда паслы. Гажсö сiдз жö йитiсны культураын уджалысьяслöн лункöд. Енбисö петкöдлiсны республикаса каръясысь да районъясысь воöм комынысь унджык морт, на лыдын вöлi и «Июль» котырысь Людмила Яснецова. Жюри да видзöдысьяс донъялiсны петкöдчöмъяссö некымын туйвизьын: «Öткöн сьылöм», «Авторлöн сьыланкыв», «Кыкöн сьылöм да ансамбльяс», «Сöвмöдана корсьöм да кыпыд ру вöсна!», «Победалöн сьыланкыв». Жюрилöн уджöн веськöдлiс Коми республикаса искусствоын пыдди пуктана уджалысь, продюсер, сьылысьясöс да актёръясöс велöдысь, режиссёр, артист, Изабелла Юрьева сьылысь нима войтыркостса конкурсын лауреат, «Классика да современность» культуралöн войтыркостса фондöн веськöдлысь Владимир Юрковский, сiдзжö вöлiны республикаын мукöд нималана йöз.
«Öткöн сьылöм» туйвизьын петкöдчисны медунаöн. Юргисны «Снегири», «Офицеры» киноысь, «Молитва» война йылысь сьыланкывъяс да мукöд. Полицияса лейтенант, ГИБДД-лöн районса юкöнын инспектор Людмила Яснецова витöдысь нин пырöдчис фестивальö. Тöдчöдам, мый таöдз енбиа сьылысь кыкысь нин лоис мöдöн, а кыкысь — медводдзаöн. Тавося конкурс кежлö кывкутöмöн дасьтысис некымын вежон чöж, сьöкыд удж вöчигöн аддзис кад творчество вылö. Сiйö петкöдчис кык сьыланкывйöн: «Ловъя сьöлöм би» да «Шондi, чолöм!». Бöръяыс юргис коми, роч да английскöй кывъяс вылын. И со бара жюрилöн кывкöртöдъяс серти «Öткöн сьылöм» туйвизьын енбиа ань лоис медводдзаöн. Тайö витöд шедöдöм нин. Чолöмалам Людмила Яснецоваöс вермöмöн!
Снимок вылын: Л.Яснецова.