Батьлöн кок туйöд 

— Видлан миян дорын мастерöн? 
— А босьтча, — туй вöчан да дзоньталан Кулöмдiнса юкöнöн веськöдлысьлысь корöмсö эз бöрыньт Василий Артурович Ламекин. Эз повзьы сьöкыдлунъясысь да ыджыд кывкутöмысь, кöть эськö, Сыктывкарса автомеханическöй техникум помалöм бöрын во гöгöр на и уджалiс орчча районса Шойнатыысь посъяс кутан бригадаын. И со коймöд во нин мастералö туй вöчан да дзоньталан Кулöмдiнса юкöнын. Медводз веськöдлiс асфальт вольсалысьяслöн котырöн. Буретш воддза воын вужвыйöн дзоньталiсны Дон сайса, Немдiнса, Носимсянь карьерöдз туй юкöнъяс, картаöн — Дереваннöйын, гуранъяс тыртiсны Сыктывкар-Мылдiн туй вылын, асфаль вольсалiсны Кулöмдiнса шöр школа да сылöн выль стрöйба костö. 
— Велöдiсны-туйдiсны ыджыд сяма мастеръяс Василий Борисович Есев да Иван Николаевич Мурлин, производство юкöнса специалистъяс. Кольöм вося августö индiсны посъяс кутысь да дзоньталысь мастерöн. Меным тайö уджыс бура тöдса да кокниджык. Артур Васильевич батьöй «Коми туй компания» котырын старшöй мастер, пыр уджалiс, кывкутiс Кöрткерöс да Кулöмдiн районъясын посъясысь. Бать дорö жö локтi техникум бöрын. Буретш сэки Кöрткерöсö пыран кытшола туй вылын вöчисны пос. Батьöй жö отсалiс медводдза кадö танi нин мастеравны босьтчигöн, — сёрнитiс том морт. 
Талун сылöн котырын кöкъямысöнöсь. Медся ыджыд сямаöсь Иван Валерианович Гуляев да Владимир Михайлович Юшков. Эмöсь и томъяс. Налöн сойборд улын Пожöг, Помöс, Скöрöдум, Аныб, Деревянка, Куж, Кузöб да мукöд юаяс, ёльяс да шоръяс вомöн посъяс. Таво дзоньталiсны тулысын ытваöн ыджыдалöмöн тшыкöдöм Пожöг юлысь берегсö, кырöдöмысь да пос улысь сюръяяс кусыньтöмысь видзöм могысь вольсалiсны кöжа. Тöлын кö посъяс вылысь весалöны лым, вильыдысь резйöны лыа, тулыссянь мича лунъяс пуксьöмöн мавтöны послысь дорöссö да перилöяссö, дзоньтасьöны и посъяс улын. 
Марина Дадашова. 
Снимок гижысьлöн.