Дереваннöй сиктысь Галина Александровна Кисоевалы мартын тырас 70 арöс. Шойччыны да шойччыны эськö, но весь оз ов. Видзö мöскöс. Ачыс идрасьö-лысьтысьö. Вайöны кö пес, босьтлö весиг колун. Петавлö Эжва вылö кыйны чери. Енлы эскысь, сьылö сиктса юрбитанiнын. 
Дереваннöй сиктын и чужис да быдмис. Школа бöрын велöдчис бумага да целлюлоза вöчан Эжваса училищеын. Эжваас и кольччис велöдчöм бöрын, уджалiс ЛПК-ын. Чужанiнö волiгöн тöдмасис Ленинград обласьтысь уджавны локтöм зонкöд, кодi вöрзьöдiс сьöлöмсö. Бöр мунiсны öтлаын нин да Эжваын и гижсисны. Чужисны челядь, но шуда олöм эз артмы. Юксисны да Эжваын сизим во олöм бöрын кык челядьöн бергöдчис чужанiнö видзны 76 арöса мамсö. Пырис уджавны совхозлöн садйö, а сэсся вуджис быдсикас удж вöчысь бригадаö. Аддзысис öтлаын велöдчылысь Александр Чувьюровкöд, кодi овлiс да уджавлiс Архангельскын да Ленинградын, юксис гöтырыскöд да локтiс чужанiнö. Кык юксьöм морт öтлаасисны. Чужис куим челядь. Кыпöдiсны кык судта керка, кытчö овмöдчисны 1995-öд воын. 
Öтув овмöдчöмсянь пыр олiсны скöтöн. Галина Александровналöн чойыс сетiс ыж, сэсся босьтiсны порсьöс. Öтиöс ли кыкöс видзлiсны век. Лöсьöдлiсны и чипанъясöс. Турун ёнджыкасö пуктылiсны кипомысь. Ытшкыны ылi видзьяс совхоз сетлiс трактор, вичмöдлiс и вöв. Быд удж бергöдiгöн орччöн вöлiны челядь. 
Гозъя кыйисны чери, быдöн вуграсис аслас пыжсянь. 
— Ва дорö котралi дзолядырсянь. Бедь йылö пысавлi сунис, таб пыдди вöлi кырсьтор. Вугырсö сетлiс батьöй. Со и «висьми» чери кыйöмöн. 50 арöсöн петi шойччыны да кыйсьыны кутi öтнам. Мукöддырйи луннас лэччылi ва дорö куимысь. Вöчöдлi уна пу пыж, öтиыс куим во и тырмö. Ва дорыс изъя да öдйö жугалö нырыс. Тулыссянь арöдз век пыжа. Мед ветлыны ылöджык, ньöби весиг Японияын вöчöм мотор, но сэнi Эжва ляпкалiс да дугöдчи. Ён мотор «шойччö», а ме ветла пелыса пыжöн. Таво тöвнас чери оз шед да мартöдз виччысьла. Челядь öнi на казьтылöны, быдмигöн пö асывнас чеччам да пызан вылын век самöвар, пражитöм чери да черинянь. Ныв-пиян кыйсьöны жö, — сёрнитiс ань. 
Кузь рытъясын лыддьö буркывъяс. Быд уджö босьтчигöн лыддьысьö и асывнас. 
— Водзтi, кодкö кö кувлiс, лыддьысьлiсны аньяс. Мам бöрся колльöдчыны ветлывлi и ме, — казьтылiс ань. 
Висьталiс и челядьдыр йывсьыс, кор ставöн пуксьылiсны пызан сайö. Батьыс морöс бердас шöравлiс нянь, мамыс пернапасасьöмöн öбраз водзын лыддьылiс буркыв. Галина Александровна вöлi ыджыд нин, кор öти ань сетлiс еннога книга да ставсö гижис тетрадьö. Сэсся кутiс судзöдны «Вера» газет да ньöбавны еннога книгаяс. 1990-öд воын лэччöдлiс челядьсö пыртны Кöджпомса вичкоö. Медся ыджыд Татьяна вöлi нин верöс сайын да кык челядя. Александр вöлi армияын да локтiгас пыралiс Сыктывкарса вичкоö. 
2001-öд воын Дереваннöйын енлы эскысьяслы сетiсны керка, кöнi водзтi вöлi сад, сэсся культура керка. Дзоньталiсны да 2003-öд восянь сэтчö и чукöртчылiсны Енмöс нимöдан да шойччан лунъясö. 2016-öд воын сiйö сотчис. Сиктса юралысь Елена Васильевна Булышева сетiс мамыслысь керка, кытчö волöны весиг челядь да Ручса аньяс. Волö и Ульянаса манастырысь вежа ай. 
Челядь быдмисны да петiсны асшöр олöмö. Татьяна Эжваын. Верöсыс кулiс, колис кык челядьöн. Александр семьянас Дереваннöйын, сылöн кык челядь. Дереваннöйын жö Светлана. Олiс торйöн, но батьыслöн кулöм бöрын кык челядьöн локтiс мамыс дорö. Ярегаын олöны Михаил да Елена. Михаил мунлiс сэтчö уджавны шахтаö. Уджысь орöдчытöг велöдчис Екатеринбургса техникумын. Сы дорö ветлiс Елена да сэнi и аддзис шудсö. Кыкнанныслöн кык челядьöн. Олöма аньлöн куим правнук. 
Мöскысь лэдзчысьны оз на мöвпав. Сук да уна йöла 20 арöса Зорькасö начкис кольöм вося декабрын. Мöд луннас нин вайис выльöс, босьтiс Сьöдукöс öти аньлысь, кодi шуис лэдзчысьны скöт видзöмысь. Выльлаö овмöдчис зэв бура, сибöдö и Светланаöс, кор мамыс лэччылö Сыктывкарö либö оз эшты. 
— Öнiя кадö, кор гöгöр турун, позьö видзны 10 мöскöдз. Томджык кö вöлi, гашкö и, ырыштчи, — карта вылö Сьöдуклы турун пыртiгöн нин шуис зiль нывбаба. 

Марина ДАДАШОВА. 
Снимок гижысьлöн.