Веськöдлысьлöн дöзьöр улын

[ A+ ] /[ A- ]

Июль 15-16-öд лунъясö Кулöмдiн районын ёна зэрис, öти суткиöн усис тöлысьöн урчитöмаысь джынйыс. Такöд йитöдын дi вылö колисны öкмыс сикт-посёлок, кöнi олö 3008 морт, на пиын 680 челядь. Лоöмторйыс районса администрациялöн да республикаса кывкутысь йöзлöн видзöдлас улын. 
Июль 16-öд лунö районса администрацияöн веськöдлысь С.В.Рубан бердын чукöртчылiс видзчысьтöм лоöмторъяс кузя комиссия. Сiйö кад кежлö шогмытöмöсь вöлiны туйяс Габов да Дзоль костын, кырöдiс туйяс «Кулöмдiн — Керчомъя — Гайны» республикаса туйлöн 17-öд, 35-36-öд километра вылын, Улыс Воч да Вылыс Воч костын. 
Комиссия кывкöртiс: Тимшерын, Лопъювадын, Зимстанын, Улыс Вочын, Вылыс Вочын, Керчомъяын, Вöльдiнын, Пузлаын, Дереваннöйын, Аныбын, Ручын, Пожöгын эмöсь бурдöдысьяс, кодъяс колiгöн вермасны сетны олысьяслы отсöг. Бурдöдчанiнъясын лекарствояс тырмымöн. Видз-чысьтöм ыджыд неминуча дырйи отсöг вылö воас санавиация. Район дась мöдöдны отсöг пыр жö. 
Июль 21-öд лунöдз оз кутны ветлыны автобусъяс Тимшерысь, Пузлаысь, Зимстанысь, Улыс Вочысь, Дiасёръяысь. Ва ойдöдiс Сыктывкар-Кулöмдiн туй вылысь 142-öд километра вылын туй юкöн. Районса администрация да ГИБДД корö ветлыны водительясöс зэв видзчысьöмöн, чинтыны öд. 
Автобусъяслöн ветлöм кузя юöръяс позяс тöдмавны районлöн усть-кулом.рфсайт вылысь либö социальнöй сетьса котыръясысь. 
Ва ёна кыптöм вöсна тупкöсаöсь Вöльдiн, Кырныша да Пожöг вомöн понтон посъяс. 
«Кулöмдiн — Керчомъя — Гайны» туй вöсна кывкутысь пöдрадчикъяс босьтчасны дзоньтасьны пыр жö, кыдзи сетас поводдя да мунас ва. 
Видзысьтöм лоöмторъяс кузя комиссия сiдзжö кывкöртiс, мый туйяс воссьытöдз дi вылын кольöм овмöдчöминъясса лавкаясын сёян-юан тырмымöн. 
Казьтыштам, видзчысьтöм лоöмторъяс дырйи позьö юöртны «01», сотöвöй телефон кö, «101» либö «112» номеръясö, Коми республикаын МЧС-лöн главнöй управлениеö 8 (8212) 29-99-99 телефон номерö либö районса администрацияö дежурнöйлы 8 (82137) 94-8-81, 94-5-17 телефонъяс пыр. 
Районса администрациялöн пресс-служба. 
Снимок интернетысь.

Комментарии:

Добавить комментарий

Свежий выпуск: 28 марта

Осторожно — мошенники!