Выль велöдчан восянь школаясын 6-11-öд класса велöдчысьясöс тöдмöдöны уджсикасъясöн, та йылысь сёрнитöны класснöй часъяс вылын. Тадзи ныв да зонъяслы кокньыджык лоас бöрйыны аскиа специальносьт.

 Кольöм вежонын Кулöмдiнса шöр школаысь директорлöн сöветник Мария Дмитриевна Вишератина да 6 «б» классöн веськöдлысь Лариса Петровна Зезегова асланыс велöдчысьяскöд волiсны «Парма гор» газетлöн редакцияö тöдмасьны газет вöчöмкöд да гижысьяскöд. Медводз пыралiсны неыджыд жырйö — редакциялöн музейö. Панассö сылы пуктiс водзтi редакцияын уджалысь, журналистикаын ветеран Нина Ивановна Буткина.

 — Медводдзаысь газет петiс 1929-öд вося ноябр 7-öд лунö и нимыс вöлi «Вöр фронт», — висьталiс шöр редакторлысь могъяс олöмö пöртысь К.А.Попов. — Сэсся нимыс вежсис, лоис «Ленин туйöд». Сöмын 1991-öд восянь лыддям нин «Парма гор» ним улын, и таво миян тшупöда пас, тырас 95 во. Водзтi газет печатайтлiсны Кулöмдiнса типографияын, кодi меститчылiс тайö жö керкаын. Öнi жö, кыдз и мукöд районса газетъяс да журналъяс — республикаса типографияын.

 Музейысь позьö аддзыны уна важся снимок, книгаяс, радио, фотоплёнка, фотоаппаратъяс, важся печатайтчан машинкаяс, öтилöн нимыс «Мерседес», ас вöчöм крейсер, кодöс козьналiс Носимса олысь Николай Кочанов. И, дерт жö, уна газет подшивка. Öнi школаясын велöдчысьяс гижöны балаяс, буретш татчö волöны да корсьöны бöрйöм тема кузя материалъяс.

 Уджалан жыръясын челядьöс виччысисны корреспондентъяс — Т.А.Чувьюрова да А.Д.Ермакова, сiдзжö кывкутысь секретар — М.Ю.Дадашова.
— Миян уджыс зэв кывкутана, зэв интереснöй. Уджалам и верстьöкöд, и челядькöд, и олöмаяскöд. Со регыд на гижим тiян школаысь волонтёръяс йылысь. Школаясын мунiс олимпиада, йöзöдiм кывкöртöдсö, пасйим вермысьясöс. Челядь ёна радейтöны серпасасьны, миян «Вильышпоз» рубрика улын петавлöны налöн гижöдъяс да серпасъяс. Корам пырöдчыны и тiянöс. Гижанныд кö сочинение, кывбуръяс, кодлыськö казьтывлöмъяс, корам вайны миянлы йöзöдöм вылö, — сёрнитiс Татьяна Анатольевна.

 Уна юалöм вöлi, кыдзи дасьтöны аскиа газет.
— Быд вежон, газет петöм бöрын чукöртчывлам планёрка вылö, урчитам, мый йöзöдам локтан петасас. Сэтчöдз, дерт, корреспондентъяслöн эмöсь нин дась гижöдъяс, кутшöмсюрö мöвпъяс, йöзкöд сёрнияс, водзö вылö аддзысьлöмъяс да мукöд юöр. Но медся коланаыс — кыдз район олö талун, кутшöм балаяс да программаяс збыльмöдöны сикт-посёлокъясын, мый тöдчанаыс районлöн олöмын. Газет вылын уджалам öтув, став юöрсö корсям, кыдзи шулöны, «от первых источников», медым ставыс вöлi стöч, — висьталiс Марина Юрьевна. — Топыд йитöдаöсь сикт-посёлокса юралысьяскöд, уджалан котыръяскöд, ёна отсасьöны олöма йöзлöн котыръясöн веськöдлысьяс, библиотекаясын уджалысьяс да мукöд. Тöдчöда, республикаын районса газетъяс пöвстысь сöмын «Парма гор» петö сöстöм коми кыв вылын.

 Челядьлы медся ёна сьöлöм выланыс воис, кыдзи гижöдъясыс пуксьöны газетлöн лист бокъясö. Та кузя аслас удж йылысь висьталiс компьютерöн верстайтчысь Е.А.Пименова:
— Газет петö быд четвергö, и сiйö жö лунас ме нин заводита компьютерын торъя программа серти лöсьöдны локтан номерлысь чужöмбансö. Эз кö тöрны да колисны гижöдъяс, тэча найöс урчитöм лист бокъясö, фотошоп программаын лöсьöдалала снимокъяс. Кодöскö колö ыдждöдыштны, кодöскö, мöдарö, чинтыштны. Сэсся видзöда кытчö сiйöс пуктыны, вылiас али бокас, гашкö, шöрас. Мед шуйгаладорса снимок вылас мортыс «видзöдiс» веськыдладорас. Сэсся водзö тэча кывкутысь секретарсянь воöм «шыльöдöм» гижöдъяс. Эмöсь корöмъяс, кутшöм гижöдъяс пуктыны водзöджык, мед эськö и снимокыс вöлi бур. А кутшöмъяс лöсяласны газет шöрас либö помланяс. Гижысьяс лыддьöны быд лист бок, гöрд пастаöн пасъялöны öшибкаяс, да ме правита найöс. Сэсся нöшта на лыддьöны. А середаö ыстам нин типографияö.

Мыйöн öткодьöсь газет вöчысьяслöн уджыс да челядьлöн велöдчöмыс? Нывка да зонкаяс зэв сюся вочавидзисны, газет вöчигöн редакцияын лöнь, лöнь и урокъяс вылын. Ставöн мöвпалам, корсьысям, гижам.

 Алёна Ермакова.

Снимокъяс Мария Вишератиналöн.