Велöдiсны венны сьöкыдлунъяс

[ A+ ] /[ A- ]

Быд мортлöн олöмын эмöсь сэтшöм йöз, кодъясöс позьö аттьöавны отсöгысь, бур сöветысь, велöдöмысь, туйдöмысь. 
Медводз тайö, дерт, бать-мам. Мыйта найö вöчисны миянлы! Туйдысьясöн меным сiдзжö вöлiны и чойяс, школаын, колледжын да институтын радейтана велöдысьяс. Но талун ме кöсъя аттьöавны найöс, кодъяс отсалiсны меным уджын да кодъяслöн сöветъяс югзьöдöны олöмöс водзö. На отсöгöн ме сувтi кок йылö, лои педагог-методистöн. 
Кутшöм важöн тайö вöлi… Меным кызь арöс. Зэв на том, быдöнлы эскысь, но медшöрыс — уджавны зэв ёна кöсйысь. Вöлi дась мунны кöть Дзолльö, кöть Великопольеö, кöть Улыс Вочö! Но олöмыс шуис мöд ногöн. Кутшöма ме чуйми, кор менö, гöрд дипломöн вылi тшупöда велöдчанiн помалысьöс, босьтiсны районса велöдан юкöнö школаöдзса воспитание кузя методистöн. 
Медводдза уджалан лунъяс колисны быттьö ру пиын. Но Галина Алексеевна Каплиналöн шань кывъясыс да отсöгыс, кодi тшöтш вöлi методистöн, лöньöдiсны менö. Кутi эскыны, мый став сьöкыдлунсö позьö венны. Нöшта кор орччöн татшöм туйдысь, ассьыс удж бура тöдысь морт. 
Галина Алексеевна пыр аддзис меным кад да пыр сетiс колана сюсь сöвет. Дерт, эз ставыс артмы дзик тыр-бура, öд менö колледжын да институтын велöдiсны дзик мöд профессияö — туйдыны-быдтыны челядьöс. А меным ковмис лоны туйдысьöн том велöдысьяслы да налы, кодъяс уджалöны уна во нин. Бöръяяслысь пыдди пуктöмсö ковмис шедöдны бур уджöн. 
Галина Алексеевна велöдiс менö кужöмöн босьтчыны уджö, пуктыны ас водзö сэтшöм могъяс, кодъясöс верма пöртны олöмö, сёрнитны йöзкöд бура, пыдди пуктöмöн, не повны сорсьöмъясысь. Сыкöд позис юксьыны аслам майшасьöмъясöн, сэкжö тöдны, мый сiйö кывзас, отсалас бур кывйöн. Г.А.Каплина пыр менö дорйис, кор ме мыйкö вöчлi эг сiдз, кыдзи колö, аслам томлун вöсна. Таысь ме аттьöала сiйöс кык пöвстöн! Галина Алексеевна — ыджыд сьöлöма зэв бур морт да менам медся бур велöдысь! 
Валентина Петровна Нестеренко уджалiс велöдан юкöнын ичöт челядьöс быдтöм-воспитайтöм кузя инспекторöн. Уджалан сямыс сылöн вöлi ыджыд, удж вылын пуктiсны пыдди. Валентина Петровна — зэв стрöг морт, ме дорö видзöдласыс сылöн вöлi мöдджык. 
Кыдзи öнi чайта, сiйö век лыддис, мый «понйöс кö шыбитан ваö, сiйö велалас варччыны öдйöджык». Öнi ме мöвпала тадзи жö. Сылöн отсöгöн ме эг кут повны сьöкыдлунъясысь, а велалi венны найöс, лоны нырччысьöн, пыр висьтавны ассьым видзöдлас, лоны зiльöн, зумыда кутчысьны лолöн. Ме пыр чуймалi, кутшöм Валентина Петровна визув, удж радейтысь, Сiйö и öнi на татшöм, мукöд том мортыс сы бöрся вöтчыны оз вермы. Век лоöй татшöмöн, Валентина Петровна! 
Аслам уджын 26 во нин. Мöдлаысь ачымöс весиг ог аддзы. Медшöрыс миян профессияын — кужны сёрнитны йöзкöд, отсавны велöдысьяслы уджаныс. Эска, мый ми, методистъяс, велöдысьяслы коланаöсь. 
Дона Галина Алексеевна да Валентина Петровна! Тi — ыджыд шыпассянь менам Туйдысь-Велöдысьяс! Зэв ыджыд аттьö став бурсьыс, мый меным вöчинныд, мыйö ме тiянлысь велалi. 

Наталья Нестерова, 
велöдан управлениеысь методист.

Комментарии:

Добавить комментарий

Свежий выпуск: 15 марта

https://www.gosuslugi.ru/help/faq/mobile_election/2100910

Осторожно — мошенники!