Водзтi Кулöмдiнса быт керка вöлi ыджыд, вынйöра котырöн. Уджавлiсны сэнi вурсьысьяс и шöрасьысьяс, шырсьысьяс и снимайтчысьяс, телевизоръяс, бытöвöй техника да часi дзоньталысьяс. И быдöнлöн налöн уджыс да олöмыс пуис асланыс ичöтик котыръясын. Сöльнитчылiсны сöмын ыджыд гажъяс дырйи либö öтувъя кутшöмкö удж вылö, шуам, совхозлы турун пуктыны петалiгöн. Дерт, вурсьысьяслысь котырсö сьöкыд вöлi шуны ичöтöн, паськöдчисны-уджалiсны найö куим цехын: öтиын вöлiны вылыс, кыкын — кокни паськöм вурысьяс. Быд котырын уджалысьыс вежсьылiс воысь воö: öтияс уджыштöм бöрын мунлiсны, на пыдди локтiсны томъяс. И быд локтысьöс вочаавлiсны бура, индылiсны сылы туйдысь-велöдысьöс, мед лючки пырöдчис уджö. 
— Ме КБО-ö уджавны локтi 1968-öд воын öкмыс класс помалöм бöрын, — казьтывлiс Кулöмдiнысь Мария Егоровна Паршукова. — Сэки КБО меститчис улыс керкаын на, кöнi öнi öтувъя оланiн. Директорöн вöлi Владимир Иванович Агиев, зэв шань морт. Меным сэки вöлi 16 арöс на. Луннас уджалi, сы бöрын велöдчи рытъя школаын, сiдзи помалi дасöд класс. Мамö, Анастасия Андреевна Турьева, уджалiс буретш танi жö, КБО-ын, шöрасьысьöн. Гашкö, сы вылö видзöдöмöн и локтi татчö. Сетiсны кад кык тöлысьöн велöдчыны вурсьыны. Велöдысьöн индiсны Зоя Васильевна Поповаöс. Кöть вермытöм морт, но помавлiс учкомбинат да вöлi зэв тöлкаöн, бура вурсис. Медводдза кадас велöдiс менö вурсьыны киöн да сiдз, мед вурысъяс вöлiны веськыдöсь, шыльыдöсь, мичöсь. Велавтöгыд вöлi сьöкыд. Нускан-вуран, оз артмы да бöр резьöдан, сэсся бöрдöмöн бара босьтчан вурны. Зоя Васильевна уджö босьтчöмсянь тшöктiс радейтны утюг. Шулiс на: мастер тшыкöдö, утюг гладитö-шыльöдö. Ньöжйöник кыдзкö велалi жö вурсьыны, медводз киöн, сэсся вочасöн и машинаöн. Сэки сiйö вöлi кокöн бергöдлан. Сёрöнджык нин, выль керкаö вуджöм бöрын, лоисны бисянь уджаланъяс. Велöдчан кад помасьöм бöрын ачым нин вöчи уджъяссö. Дерт, унаысь на ковмылiс шыöдчывны отсöгла туйдысь дорö, мыйкö кö эз артмыв, кöть уджыс миян вöлi лыдысъя (сдельнöй), некор эз öтдортлы, пыр мунлiс воча, велöдiс, мый эз вöв гöгöрвоана. Кутшöмкö кад вурсьысьöн уджыштöм бöрын велöдчи шöрасьысьö. Сэки туйдысьöн индiсны Вера Максимовна Киршинаöс, ыджыд сяма уджалысьöс. Содтöд тöдöмлунъяс босьтi и курсъяс вылын велöдчöмöн. Вурсигöн, дерт, вöлi спокой: шöрасьысь ваяс тэныд удж, и вур сöмын. А шöрасьысьяслы колö уджавны йöзкöд, заказ сетысьяскöд, кывзыны налысь корöмъяссö да кöсйöмъяссö, ассяньыд на вöзйыны, кыдзи бурджыка вурны сiйö либö тайö паськöм, мед лöсялiс сылы и вöлi мичаöн. Но меным вöлi сьöлöм серти, öд шöрасьысьлы позьö паськöдны-сöвмöдны енбиалун, мöвпыштны кад серти лöсялана выльысь-выль сикас паськöм. Быт керкаын уджалi 24 во. И кадыс лэбис быттьö öти здукöн. Сы йылысь колисны сöмын бур казьтылöмъяс. Уджалан котыр вöлi ыджыд, зэв ёртасьысь. Вурсьысьяслöн вöлi кык бригада, ордйысисны найö öта-мöд костаныс, кодi вермас удж вöчöмöн. Котыртлiм паськöмъяслысь мода петкöдлöм. Гажаа пасйылiм праздникъяс. Тöлын сувтлiм лыжи вылö. Кыпыда коллявлiм кадсö. 
Сöмын бур казьтылöмъяс быт керкаын уджалöмысь колины и юрсиктысь жö Александра Николаевна Поповалöн. 
— КБО-ö уджавны локтi 1969-öд вося сентябр 9-öд лунö, кöкъямысöд класс помалöм бöрын, — висьталiс сiйö. — Локтiм Надежда Рассыхаева нывъёрткöд. Меным туйдысьöн индiсны Лидия Васильевна Липинаöс, кокни паськöм вурöм кузя мастерöс, а Надеждалы — Нина Михайловна Липинаöс. Меным вöлi зэв нимкодь, мый веськалi Лидия Васильевна дорö, сы вöсна мый сiйö бура вурсис. Сылы сетлiсны вурны весиг медся моднöй да сьöкыд ногöн вуран паськöм. Куим тöлысь велöдчöм бöрын вурсим асьным нин. Но туйдысьяс пыр вöлiны орччöн, медым вермисны отсавны, мыйкö оз кö артмы. Во да джын мысти миянöс мöдöдiсны велöдчыны шöрасьысьö: менö Рязаньö, Надеждаöс — Йошкар-Олаö. Во велöдчöм бöрын уджалi шöрасьысьöн. Туйдысьöн пуктiсны Вера Максимовна Киршинаöс. Сiйö вöлi зэв бур шöрасьысь. И ме зiли сылысь босьтны пример. Сэсся окота лоис вуджны вылыс паськöм вурöм вылö, сы вöсна мый сэки гач да платтьö кындзи шöралi нин и сiйöс. Рязаньын эськö велöдiсны жö вурны вылыс паськöмсö, но тайö меным эз на вöв тырмымöн. Велöдчи таö мукöд вурсьысьяслысь, юасялi налысь. Быдöн зiлисны отсавны. Вочасöн велалi. Шöрасьысьлы öд колö жö тöдны вуранногсö кöть нин сы вöсна, медым велöдны таö и том вурсьысьясöс. 
Вурсьысьяслöн котырын кындзи туйдысь-велöдысьяс вöлiны и мукöдъясын. Снимайтчысьяслöн котырын бур мастерöн лыддьыссис Ольга Максимовна Киршина. Миянöс на сiйö Нина Напалковакöд (абу нин ловъя), кодкöд тшöтш велöдчылiм снимайтчысьö, туйдiс, кыдзи бурджыка уджавны — кодöс кутшöм боксянь снимайтчигöн босьтны, кыдзи югзьöдны биясöн, а сiдзжö кыдзи проявитны плёнка, печатайтны да ретушируйтны снимокъяс. Сылöн снимокъяс пыр артмылiсны ясыдöсь да мичаöсь. Зiлим босьтны сылысь унджык тöдöмлун. Ыджыд сяма мастеръясöн, бур туйдысь-велöдысьясöн вöлiны и часi дзоньталысь Николай Федотович Рассыхаев, телевизор дзоньталысьяс Валерий Иванович Ульныров да Николай Иванович Расов, шырсьысь Мария Андреевна Николаева да мукöд, кодъяс велöдiсны уна том йöзöс. 

Галина НЕСТЕРОВА.