Карса челядьлöн, дерт, эм унджык позянлун сöвмыны. Нуöдöны быдпöлöс кружокъяс, кöнi велöдöны мичаа серпасасьны, йöктыны да с.в. Пыдi сиктъясын  татшöмыс абу. Кодлöн эм сям да ыджыд кöсйöм, велöдчöны асьныс, интернет пыр.

Зимстанысь Диана Гичева вуджис 11-öд классö, велöдчö бура. Дзолясянь  серпасасьö. Кыдзи висьталiс ачыс, школаын мунöны рисование урокъяс, а со серпасасьны велöдан кружок абу. Тайö нывкалы абу тырмымöн. Ыджыдджык позянлунъяс воссисны, кор лоис интернет: Диана уна корсьысис сэтысь да тадзи и велöдчис. И со öтчыд аддзис, кыдзи нывбаба велöдö серпасасьны графическöй планшетöн. Нывкалöн öзйис синмыс — сэтшöм мича серпасъяс сэнi артмисны. Босьтчис корсьысьны интернетысь, мыйся сiйö планшет, кутшöмöсь найö овлöны. Мамыслы аслас кöсйöмтор йылысь висьтавны эз лысьт, чайтiс, мый зэв дона, да ньöбны оз вермыны. Ныв дзикöдз «вöйис» аслас гуся кöсйöмö, видзöдiс, кыдзи уджавны сы вылын. Планшетсö кабель отсöгöн йитöны ноутбук дорö. Карандаш ли кисточка пыдди уджалöны стилусöн: сы отсöгöн «серпасасьöны» планшет вылын, серпасыс петö ноутбук вылö. Диана тöдмалiс, мый сылöн карса нывъёртыслöн эм татшöм планшет. Кор Кристина локтiс Зимстанö, вайис аскöдыс петкöдлыны. Дианалы сэтшöма воис сьöлöм вылас, мый нöшта на окотаджык лоис, мед татшöм шензьöданторйыс лоис аслас. Сöмын во джын мысти лысьтiс висьтавны мамыслы гуся кöсйöмсö. Вöлi зэв шуда, кор сiйö эз бöрыньт. Шуисны босьтны интернет пыр. Дерт, полiсны, мый мöдöдасны лёкöс, нöшта доныс на эз ыджыд вöв, муртса кык сюрсысь унджык. И со воис дыр виччысянтор. Тайö вöлi 2018-öд вося май 12-öд лун. Весиг луныс колис паметяс. Пыр жö восьтiс, сьöлöмыс тiпкис нимкодьысла. Медводдза лунас босьтчис вöчны серпас. Сы вылö мунiс  17 час. Весиг эз казявлы, кадыс лэбыштiс зэв öдйö. Öнi шöркодя öти серпас артмö час да джынйöн. Ставыс кольö ноутбукö. Мамыс видзöдö, кыдзи нылыс серпасасьö, да шензьö. Ёна ошкö. Медводзсö чайтiс, мый сылы регыд дышöдас да эновтас, но Диана кисьыс эз лэдзлыв планшетсö. Вöчис ВКонтактеын котыр. Ассьыс серпасасьöм гижис видео вылö да пуктiс интернетö. Эмöсь йöз, кодъяс пыр видзöдöны сылысь уджъяссö, а, гашкö, и велöдчöны. Дианалöн висьталöм серти, дзик быдöнлöн вермас артмыны  кутшöмкö кокни серпас. А кодi кöсйö вöчны бурджык уджъяс, медводз колö велöдчыны компьютера серпасасян программа отсöгöн.

— Ме серпасала чужöмъяс. Овлö, мый кодлöнкö воö сьöлöм вылö. Либö менам öнi эм радейтана сьылысь, окота серпасавны сiйöс. Овлö, оз дзик артмы морт кодьыс, мукöддырйи аслым уджыс оз во сьöлöм вылö, кыдзи и став серпасалысьыслы. Пыр окота велöдчыны водзö, тöдмавны выльтор. Радейтана уджысь шонавлö сьöлöм, — висьталiс Диана.

Водзын ныв серпасасис компьютерын, но эз во сьöлöм вылас. А планшет «сирасис». Нулiс коркö школаас, петкöдлiс ёртъяслы. Ставöн шензисны, корисны велöдны. Планшетöн серпасасьны весиг видлiс 26 арöса вокыс. Таво май 25-öд лунö бöръя звöнок кежлö 11-öд класса велöдчысьяс корисны нывкаöс серпасавны ыджыд ватман вылын велöдысьлысь портрет, дасьтiсны мольберт. Диана вöчис уджсö кык лунöн. Быдöнлы воис сьöлöм вылö, сьöм на вештiсны.

Нывлöн велöдысьыс, Аделина Леонидовна Ковалёнок, таво вöзйис Дианалы петкöдчыны  «Школаса патент — аскиалунö воськов» челядьлöн войтыръяскостса конкурсын, код вöсна район тшупöдын кывкутö да нуöдö Кулöмдiн овмöдчöминъяскостса библиотека да юöртан шöрин. Ныв шуис видлыны. Районса культура керкаын юöртан шöринын Диана висьталiс планшет йылысь, петкöдлiс ассьыс видео. Сылöн уджъяс ставнысö чуймöдiсны. Окотапырысь видзöдiсны да юасисны. Район тшупöдын ныв шедöдiс гран-при. Вöзйисны петкöдчыны  Сыктывкарын, но эз сюр машина, да мунны эз артмы, та вöсна мöдöдiсны Дианалысь видео-урокъяс. Конкурслöн республикаса тшупöдын ныв вермис «Школалöн медбур презентация» шуöмöын. Сылысь уджö мöдöдiсны Москваö,  сэсся Санкт-Петербургö. Мыйта нимкодьлöн вöлi Дианалöн да мамыслöн, кор юöртiсны, мый «Медбур презентация» шуöмын «Серпасасьны велöдан видеоурок» уджöн ныв шедöдiс гран-при войтыръяскостса тшупöдын.

Водзö вылö нывка стöча оз на тöд, кытчö пырас велöдчыны, артмас-ö йитны олöмсö аслас радейтана уджкöд. Дзолядырйиыс окотитiс лоны дизайнерöн. Дианалы зэв окота велöдчыны кутшöмкö ставмирса колледжын, но, чайтö, мамыс оз лэдз. Эм во на, мед нывлы бöрйыны ассьыс водзö туй.

Öнi Диана уджалö гожся уджалан лагерын. Серпасасьöм да велöдчöм кындзи, ныв аддзö кад ёнмöдчыны, ворсö футболöн да волейболöн.

Галина КЛЮЖЕВА.

Ольга Мехоношиналöн снимокъяс вылын: Диана гран-при босьтöм кузя

дипломöн да конкурслöн пасöн.