Вежöрысь нинöм оз вун

[ A+ ] /[ A- ]


Люция Андреевна Конченелöн война кадся олöмысь вежöрас кольöма сiйö, мый коркö öтчыд, нинöм гöгöрвотöг, лым чиръяс вылö вундалiс сёян карточкаяс. Ок и шогсис мамыс та бöрын! Рытывбыд бöрдiгмоз йитлiсны юкöнъяссö, бöрынджык вежисны выльяс вылö.
Люция Андреевна чужис 1939-öд вося август 1-öд лунö Удора районса Слöбöдаяг грездын вит челядя семьяын. Бать-мамыс уджалiсны колхозын. Батьыс вöлi бур тшупсьысьöн. Орчча сиктъясысь йöзыс волiсны сы дорö, медым вöчис капуста да турипув видзан бöчкаяс. Кужис дзоньтавны тракторъяс да мукöд техника. Мамыс пелькöдчис школаын. Челядьыс быдмисны зiльöн да отсасисны бать-мамлы. Гырысьджыкъяссö школаö мунiгкежлö мамыс чеччöдлiс водз асылын, велöдчöм бöрын найö пыртлiсны пес, ва, ломтiсны пач, мыськалiсны джоджъяс. Война кадö нывкаяс да зонкаяс öтвылысь верстьöкöд уджалiсны колхозса муяс вылын: идралiсны да бöрйисны картупель, косьтiсны да вартiсны чукöртöм шеп, урожай мöдöдлiсны фронт вылö. Батьыс война чöжыс уджалiс Москваса военнöй заводын. Став сьöкыдыс усис мамыслöн пельпомъяс вылö, öд колö вöлi вердны да пасьтöдны вит челядьöс. Люция Андреевна казьтывлö, мый тшöкыда отсасисны суседъяс, юксисны, мыйöн вермисны. Батьыс локтiс война помасьöм бöрын во мысти на да вайис козин — гырысь гöрд яблöкъяс. Аньлöн вежöрас öнöдз на кольöма чöскыд кöрыс. Школа помалöм бöрын пелькöдчис бурдöдчанiнын, телефонисткаалiс Яренгаын. Петiс верöс сайö да 1962-öд воын локтiс Кебанъёльö. Садйын уджалiс няняöн, леспромхозын — рабочöйöн. Бура уджысь сетiсны уна грамота да премия.
Верöсыскöд олiсны 51 во, быдтiсны куим челядьöс, эмöсь внукъяс да правнукъяс. Люция Андреевна — вежавидзысь, шань да пыдди пуктана нывбаба. Öнi олö öтнас, но челядьыс да внукъясыс волывлöны сы дорö, отсалöны ставнас, кытшалöны тöждöн.
Надежда Полиевская.
Кебанъёль.

Комментарии:

Добавить комментарий

Свежий выпуск: 28 марта

Осторожно — мошенники!