Вежсис и олöм

[ A+ ] /[ A- ]


2018-öд вося майын сиптысис олöмаяслöн да вермытöмаяслöн Зимстанса керка. Сэнi зiльысьяслы колiс корсьны выль удж. Кодкö да ачыс аддзис, кодлыкö да отсалiс районса администрация. Шуам посёлокса садйын бöр лöсьöдiсны овмöс видзысьясöс, да сэтчö и босьтiсны öткымынöс.
Юлия Эдуардовна Моторина олöмаяскöд уджалiс дас во. Босьтчис пелькöдчысьсянь, вöлi и пусьысьлы отсасьысьöн, висигъясöн да отпуск кадö вежис сестра-кöзяйкаöс, социальнöй удж кузя специалистöс. Уджысь орöдчывтöг велöдчис Сыктывкарса педколледжын социальнöй удж кузя специалистö да вит во зiлис тайö специальносьтын. Диплома нин том ань вежлiс и веськöдлысьöс. Верöсыс уджалiс сэнi жö сантехникöн. Сиптöм кузя сёрнитiсны 2015-öд восянь нин. Аскиа лунö видзöдöмöн Юлия Эдуардовна шуис аслыс велöдчыны водзö, пырис Сыктывкарса университетлöн педагогика да психология кафедраö.
Олöмаяслöн да вермытöмаяслöн Зимстанса керкаыс вöлi пуысь, да эз лöсяв öзйылöмъясысь видзчысьöмын урчитöмторъяслы. Кöть эськö видзисны уна сьöм, ставсö лöсьöдалiсны корöмъяс серти, но век жö керка шуисны тупкыны. Том ань шыöдчылiс школаö, виччысис, мый садйын сюрас воспитательлöн удж. Но весьшöрö. Дерт, уджаланiн тупкöмöн вештiсны сьöм, но быдтöны куим челядь, да колiс овны водзö. Буретш кольöм воын Зимстанын сход дырйи паськыда висьталiсны «Социальнöй контракт» государстволöн выль программа йылысь. Торйöн шыöдчис чукöртчöм вылö локтысь йöзöс социальнöя доръян шöринса директорöс вежысь С.И.Журавская да йöзöс уджöн могмöдан шöринса директор О.П.Попова дорö да нöшта на юасис. Удж корсьöм кузя лöсьöдiсны соцконтракт. Уджöн могмöдан шöринын пасйысигöн вöзйисны Инта да Сосногорск, но тайö каръяс ылынöсь, да эз вöрзьöдчыны ас районысь. А сэсся юöртiсны, мый тыр арлыдтöмъяслöн Кебанъёльса социальнöй реабилитация юкöнö колö социальнöй велöдысь. Мöвпавны сетiсны кык вежон. Медся ыджыд нылыс велöдчис 8-öд классын, да верöсыс кöсйис Зимстанын помöдны 9 класс. Но уджыд оз виччысь, бöрыньтас кö, босьтасны мöдöс. Со и шуисны вуджны Кулöмдiнö, кöртымавны оланiн. Талун Юлия Эдуардовна социальнöй велöдысь.
— Зэв бур, мый уджалö «Социальнöй контракт» программаыс, да сы серти отсалöны и удж корсьысьысьяслы. Аттьö социальнöй туйвизьын уджалысь кывкутысь йöзлы, кодъяс чуйдöны, ышöдöны. Кулöмдiнысь ньöбим керка, öнi сэнi олам и öттшöтш выльмöдам, лöсьöдам ас ног. Сюрис удж специальносьт да и сьöлöм серти. Со кутшöма бурланьö вежсис миян семьялöн олöмыс, — кывкöртiс Юлия Эдуардовна.
Марина Дадашова.
Снимок Юлия Моториналöн.

Комментарии:

Добавить комментарий

Свежий выпуск: за 14 мая

Осторожно — мошенники!