Пытшкöсса делöяс кузя министерстволöн районса юкöнысь полицияса подполковник Елена Витальевна Овчинниковаöс бура тöдöны районын. Öнi сiйö дежуритан юкöнса начальник.
Сыктывкарса педколледжын велöдчöм бöрын вит во уджалiс юрсиктса садйын. Но лоис окота видлыны сьöкыдджыктор, уджавны тыр арлыдтöмъяскöд. Пыр синъяс водзас вöлi инспектор Иван Иванович Ногиев, кодi тыдалiс ылiсянь да велöдчысьяс шулiсны сiйöс «Дядя Стёпаöн». Сылöн волiгъясöн школаын пыр жö пуксьылiс чöв-лöнь. Кужис сёрнитны и шмонитны.

• Шыöдчи йöзкöд удж котыртан юкöнö и менö босьтiсны инспекторöн. Ме моз жö инспекторöн вöлi Ирина Александровна Нечаева, старшöйöн Павел Юрьевич Липин. Гызмалiм районсö ставнас. Машина эз вöв, босьтлiсны сыланьö жö мунысьяс, — казьтылiс воддзасö погонъяса ань.
  Елена Витальевна вöлi топыд йитöда школаяскöд, сиктса администрацияяскöд, тыр арлыд-тöмъяслöн делöяс кузя комиссиякöд, социальнöя могмöдан юкöнкöд. Öтув кытшлалiсны да видзöдалiсны сикт-грездъясын видзöдлас улö веськалöм бать-мамöс да налысь челядьöс. Öтчыд öти сиктса администрацияын социальнöй уджалыськöд мунiсны лёк оласнога семьяö. Таркöдчисны öдзöсö. Кылiсны олöма аньлысь лёкысь горöдöм: «Öнi жö босьта чер да петкöдла тiянлы пуж!» Администрацияса уджалысь повзис да корис мунны бöр, но Елена Витальевна эз вöрзьöдчы, öд öдзöс сайын код юра морткöд асьнысö дорйыны вермытöм быдтасъяс. Зьвермöм морт восьтiс öдзöс, шеныштчис черöн, аньяс öдва удитiсны чепöсйыны. Кыдзи тыдовтчис бöрыннас, тадзи карапужитчис челядьлöн ыджыд мамыс. Сы вылö лöсьöдiсны гижöд да кыскисны административнöй кывкутöмö, а повзьöм нывкаясöс да зонкаясöс Елена Витальевна нуис бурдöданiнö.
  1996-öд воын уголовнöй кодексын лоис челядьöс увтыртöм йылысь статья да колiс уджавны сы серти. Зонпосни оз висьтавны, мый найöс нöйтöны. Колiс кужны пырны налöн ку пиö, мед воссисны, сёрнитны öтлаын велöд-чысьяскöд, ёртъясыскöд, велöдысьяскöд. Адын моз олöмысь дорйис унаöс. Сэки миян район тайö туйвизьын панöм уголовнöй делöяс кузя вöлi медводзын.
• Дасьтöм гижöдъяс сетлiм туясян юкöнö, кодöн веськöдлiс Ольга Ивановна Бубенчикова. Сылöн видзöдлöм бöрын ковмылiс уджавны содтöд. Менам гижöдъяс серти и панлiсны уголовнöй делö.
  Елена Витальевна ачыс сэсся лоис туясьысьöн. Туясян юкöнын 2014-öд восянь 2018-öд воöдз быдмис начальникöдз. Сiйö туялiс сьöмкöд йитчöм мыж вöчöм. Уджалiс лун и вой, кор юкöнысь том аньяс сьöрсьöн-бöрсьöн петалiсны нöбасян да кага ваян отпускö. Кöсйис петны шойччыны, но корисны дежури-тан юкöнö. Сылöн уджалан котырын дас айлов.
  Став тайö каднас Елена Витальевнаöс гöгöрвоисны верöсыс, кык ныв, бергöдiсны гортса удж. Но пусис-пöжасис ачыс. Век ветлiс школаö бать-мамлöн чукöртчылiгöн. Тулыс-арын, кор вичмылö кад, петö öшинь улö, кöнi градъяс вылын вöдитö быдсяма дзоридзьяс, градвыв пуктас. Ёна лыддьысьö, книгаяссö ньöбалö.
  Анна нылыс велöдчис Сыктывкарса медколледжын. Öнi врач-судмедэксперт дорын медсестра-лаборант. Мария, кыдзи и мамыс, велöдчö Сыктывкарса педколледжын, сöмын шылад велöдысьö.
  Аньлы нимкодь, мый челядьыслöн туйвизьыс кыдзкö да йитчöма сылöн уджкöд.
  Гижöд да снимок Марина Дадашовалöн.