Елена Александровна Кузнецова чужис 1932-öд вося май 1-öд лунö Донын. Чужан сиктын помалiс сизим класс. Уджалiс Кулöмдiнса шырсянiнын кассирöн, сэсся мöдöдiсны Керчомъяö секретаравны судлöн заседаниеясын. Кызь öти во уджалiс Донса сельпоöн юрнуöдысьöн. Петкöдлiс асьсö, кыдзи зэв бур уджалысь, мыйысь сiйöс пыдди пуктöны оз сöмын Донын, Джеджимын да Шöръягын, но и öнöдз на оз вунöдны район пасьта. Ыджыд пай Елена Александровна пуктiс сиктöс сöвмöдöмö. Сылöн юрнуöдöм улын 1980-öд воын Донын кыпöдiсны порсьясöс видзанiн, кöзяйственнöй тöваръяс видзан склад, магазин. Йöзыслöн олöмыс лоис бурджык. Сельполöн уджалан котыр районын век вöлi медбуръяс лыдын. Сиктса йöз унаысь бöрйылiсны водзмöстчысь нывбабаöс сиктсöветса депутатöн. Елена Александровна квайт во вöлi сиктсöветса юралысьöн. 
Пенсия вылö петöм бöрын ань эз öтдортчы сиктлöн олöмысь. 1979-öд восянь юрнуöдiс олöма йöзлöн котырöн. Топыд йитöд кутiс cиктсöветса юралыськöд, социальнöй службаын уджалыськöд, районса ветеранъяслöн котыркöд. Кокньыдджыкöн вöчис олöмсö войнавывса ветеранъяслысь, салдатъяслöн дöваяслысь, тылын уджалысьяслысь, локальнöй тышъясö веськавлöм йöзлысь. Быд ыджыд праздник водзын чукöртчылiсны сиктсöветö да урчитiсны, кыдзи котыртны гаж. Елена Александровна нуöдлiс рытъяс, кытчö чукöртчылiсны и велöдчысьяс, и верстьöяс. Комсомоллы 85 во тыригкежлö Елена Александровна чукöртiс медводдза комсомолечьяс йылысь уна материал. Сiйö юасис воддза кад йылысь ыджыдджык арлыдаяслысь, корис комсомолечьяслысь важ фотографияяс, ветлiс школаö коми кыв да литература велöдысь Анна Степановна Липина дорö, кодi чукöртiс-лöсьöдiс Дон йылысь альбом. Став чукöртöмсö мöдöдiс «Парма горлöн» редакцияö, и газетын петiс бур статья. 2004-öд воын нуöдiс комсомоллы сиöм рыт. Велöдчысьяс петкöдлiсны концерт, а сэсся Елена Александровна висьталiс Донса медводдза комсомолечьяс йылысь. 1990-öд вояссянь кутiсны пасйыны олöма йöзлысь лун. Нывбаба сьöлöмсяньыс босьтчис тайö уджö. Сiйö тöдiс став пенсионерлысь чужан лунсö, а сiдзжö тöждсö да могсö. Быд тöлысь ветеранъяслöн котырö пырысьяс волiсны чолöмавны тшупöда чужан лун пасйысьясöс, сетлiсны бур козинъяс. 
Елена Александровна пуктiс уна вын, медым Джеджимын восьтыны чужан му туялан музей. Бур уджысь, ыджыд вермöмъясысь, том йöзöс туйдöм-велöдöмысь, быдсяма уджö сьöлöмсянь пырöдчöмысь Елена Александровналы сетiсны Коми Республикаса заслуженнöй уджалысьлысь ним, пасйисны пыдди пуктан 15 грамотаöн да вит медальöн. 
Елена Александровна Анатолий Иванович верöсыскöд быдтiсны да велöдiсны вит челядьöс. Александр, Элина, Михаил, Антонина, Светлана быдмисны муса бать-мам дорын да лоисны шань, уджач йöзöн. Элина Анатольевна дыр кад уджалiс сиктсöветын медшöр бухгалтерöн, а сэсся вöлi сиктсöветса юралысьöн. Антонина Анатольевнаöс, республикаса юралысьлöн общественнöй примитанiнöн веськöдлысьöс, тöдöны да пыдди пуктöны район пасьта. 
Е.А.Кузнецова кувсис 2014-öд вося ноябрын, но паметьысь сiйö оз вун. Челядьыс казьтывлöны мамукыслысь небыд кияссö да шань сьöлöмсö: «Медся дона мортыс, кодöс Ен сетiс миянлы — тайö миян зэв вежöра, шань, зiль да мича мамукным». Внукъяс висьталöны: «Миян ыджыд мам вöлi зэв шань, зiль, мича да киподтуя мортöн. Пыр на казьтылам чöскыд шаньгаяссö, пирöгъяссö да чериняньсö. Ми зэв ёна радейтам муса да дона ыджыд мамöс. Став бурсьыс висьталам зэв ыджыд аттьö! Ми некор ог вунöдöй сiйöс!» 
И со менам киын Елена Александровналöн тетрадь-дневник, кытчö сiйö вöчалöма пасйöдъяс-казьтылöмъяс. Почеркыс зэв ясыд, мича. Кымын водзöджык лыддя, сымын бурджыка гöгöрвоа, мый тайö абу сiдз-тадз гижöдъяс, а став страналöн, нывбабаяслöн миян государствоöс сьöкыд война бöрын кыпöдöмö ыджыд пай пуктöмлöн история. 
Елена Александровна казьтылö, кыдзи олiсны Донын 1950-1980-öд воясын. Медся гажа вöлi томдырся кадыс: «Ок и гажа жö овсис миянлы сэки! Быд праздник кежлö дасьтiм концерт, нуöдiм быдсяма мероприятиеяс. Иван Михайлович Порошкин юрнуöдiс сиктса клубöн, медводзын петавлiс йöктыны «русскöйтö». А ми, том нывъяс, асьным велöдчим йöктыны «Молодёжь Севера» журнал серти, шыладсö лöсьöдлiм асьным жö. Зэв тшöкыда сцена вылын петкöдлiм партизанъяс йылысь пьесаяс. Пырöдчим районса концертъясö да фестивальясö. Öтчыд меным венгрияса йöктöмысь козьналiсны крепдешин чышъян. Костюмъяссö вурлiм асьным. Кулöмдiнöдз ветлöдлiм подöн. Петкöдчылiм и Лöгинъягын, Джеджимын да Шöръягын». 
«Öтчыд концертöн петкöдчим Керчомъяын. Пьесаыс воис сьöлöм вылас видзöдысьяслы. Сэсся мöдöдчим Лöгинъягö. Но турöбалiс, и машинаным сибдiс. Ми локтiм бöр клубö и войбыд сьылiм да йöктiм. Асывнас петiм, кöсйим весавны, а зыръясыд абуöсь. Ми вöлiм дас кöкъямысöнöсь. Кутiм весавны кыдз мый вермим: кодкö кинас, кодкö кокнас. Век жö машинаыд вермис петны, да воöдчим Лöгинъягöдз. Сэнi миянöс тшöтш зэв бура вочаалiсны». 
Кольöмаöсь бур казьтылöмъяс и кад йылысь, кор Елена Александровна вöлi Дон сельпоса председательöн: «Сельпоын уджалiгöн грузтö сöвтлiм да ректылiм асьным, öд грузчикъяс эз вöвны. Вöлiм нёльöнöсь. Уджалiм окотапырысь, ставным ветлöдлiм сьылан-йöктан котырö. Быдöн лоиc сöветской вузасьöмын медся буръяс лыдын. Век тыртлiм план, весиг öта-мöд костын дасьтылiм вермасьöмъяс». 
«Донын вöлiны промышленнöй тöваръясöн да сёян-юанöн вузасянiнъяс, столовöй да нянь пöжаланiн. Нöшта вöлiны лавкаяс, нянь пöжаланiн Джеджимын да Шöръягын. Видзим кык вöлöс, медым ваявны груз. Турунсö вöвъяслы пуктылiм асьным. Сэсся видзим порсьясöс. Йöзыслысь примитiм быдсяма кучик, картупель, тшак, вотöс, а сiдзжö бумага, кöрт лом, утильсырьё, пипу кырсь. Весиг кöчан солаласны да, ыджыд чанъясын примитам. Сэки ытва быд тулыс босьтлiс туйяссö, и грузсö ковмылiс вуджöдны пыжöн. Сельполöн складъясыс вöлiны Эжвалöн берегын. Грузтö сöвтлiм зэв уна, асьным кайлiм кузолас, медым видзны сiйöс. Полан, öд верман и усьны. Мунан туйыс векни, и машина тшöкыда сибдö. Коркö воан гортад, а ставныс нин узьöны. Челядьыд посниöсь. Асывнас виччысьö бара татшöм жö удж». 
«Со тадзи и олiм: уджалiм, гажöдчим, челядьöс быдтiм. Ставсö вöлi удитам. Öнi ачым шензя: кытысь сюрлiс кадыс?» 
Елена Александровна Кузнецова йылысь бур кывъяс висьталöны и найö, кодъяс дыр кад уджалiсны сыкöд öтвылысь: 
Анна Васильевна Напалкова (ветеранъяслöн сöветöн юрнуöдысьöс вöвлöм вежысь): 
— Елена Александровна вöлi зэв кывкутысь мортöн, сьöлöмсяньыс уджалiс олöмаяслöн сöветöн юрнуöдысьöн. Ёна отсалiс олöма да вермытöм йöзлы. 
Виталий Степанович Лопырев (ветеран, удж кузя ёрт): 
— Менам бать 1950-öд воын уджалiс народнöй судлöн Керчомъяса участокын, а Елена Александровна вöлi судса секретарöн. Бать донъялiс сiйöс кыдз вежöра да зэв кывкутысь мортöс. Ме бура тöда Елена Александровнаöс, кыдзи сюсь да вежöра веськöдлысьöс. 
Антонида Васильевна Кузнецова (Дон сиктсöветса вöвлöм социальнöй уджалысь): 
— Ми уджалiм öтлаын да тöда сiйöс зэв бура. Йöз ёна пуктiсны пыдди. Быдöн дорö кужис матыстчыны, сибыд, мелi да шань. Некодöс эз дойдлы лёк кывйöн. 
Нина Николаевна Тимушева (Донса лавкаöн вöвлöм веськöдлысь): 
— Ме тöда Елена Александровнаöс 1976-öд восянь, кор помалi училище да менö мöдöдiсны уджавны Донса школалöн столовöйö. Сiйö сэки юрнуöдiс Донса сельпоöн. 1980-öд воын сiйöс бöрйисны Дон сиктсöветса юрнуöдысьöн, да ас пыддиыс корис уджавны менö. Ме пыкси, мися, менам оз артмы, но Елена Александровна кöсйысис отсавны. И, збыльысь, век уджалiм öтвылысь. 
Елена Александровна Кузнецова, ыджыд сьöлöма да быдöн вöсна тöждысьысь ань, коляс миян паметьын век кежлö. Сiйöс ми шуам Эжва йывса славаöн. 

Нина КАЛИСТРАТОВА. 
Дон.