«Зимстан» овмöдчöминса квайт сикт-посёлокысь лым весалöм вöсна кывкутö ас вылö уджалысь Иван Александрович Прокушев, код дорын уджала ме да весала буретш лымсö «Беларусь» тракторöн. Зiля вöчны ставсö морт ногсöн, мед сöмын бур вöлi йöзлы. Кык во сайын март шöрын Зимстанса Сöветскöй улича вылын ЗИЛ-131 машина моз некод эз сибдыв. Фроловскын туйсö весалi грезд помöдзыс, кöть водзтi весавлiсны сöмын шöрöдзыс, ыстысисны сы вылö, мый нöбалö да водзö мунны оз вермыны. Весалi и «Победалы 55 во» нима улича, кодöс водзтi эз идравлыны ньöти. 
Но йöзлы, буракö, колö, мед ме босьтi зыр да весалi лымсö и налöн керкаясö пыранiнъяс весьтысь, кодi кольö лымсö тракторöн йöткöм бöрын. Быдногыс ёрччöны да омöльтöны менö, öти сиктын тракторлы воча петiсны весиг черöн. Вермас лоны, мый коркö да петасны и ружьеöн. 
А асьнысö оз аддзыны, кöть тыртöны ветлан туйсö. Вайöны кернас и чурканас туй шöрö пес, вöчöны «улыс склад». Кöнкö, мöвпалöны: «Мунöй кыдз кужанныд, öшинь улыс менам». Кодсюрö туй бокö вöчö весиг челядьлы ворсанiн да весалiгöн верман тыртны челядьсö. Тадзитö колана ногöн туйсö, дерт, весавны он вермы, и сiйö векнялö. 
Йöз моз элясьöмöн позьö гижны кузя, но тырмас. Вай босьтчам ассянь. Идралам ассьыным керка, öшинюв, сикт. Ог корöй йöзöс Питерысь. Найö коркö вöлiны нин. 
Мам шулiс, мед йöзлöн лёк вылö лёкöн эг вочавидз. Та вöсна лöсьöдi со кутшöм кывбур: 
Вай жö босьтам ставным зыр, 
Идралам сэк лымсö пыр. 
Асьтö дышлунлы эн сет, 
Отсавны кö колö, — пет. 
Талун тэ, а аски тэд, 
Ставыс лючки вöлi мед. 
Лолыд майбыралас пыр, 
Тадз кö артмас олан дыр. 
Ставнытö гажа тулысöн! Аддзöй асланыд дзиръяысь ылысьджык. 
Андрей МОРОХИН. 
Зимстан.