Асьсö кылö шудаöн

[ A+ ] /[ A- ]

Мысын чужлöм Ольга Юрьевна Трубачёва школа помалiгöн тöдiс нин, мый сетчас медицина юкöнö. Велöдчис Сыктывкарса медколледжын, лоис лаборантöн. Кольччис кар дорö матö. Кöкъямыс во уджалiс Эжваса хирургия больничаын лаборантöн. Но аньöс бöр кыскис чужанiнлань матö, нöшта на сы вöсна, мый быдтысис нин. Кык во сайын босьтчис уджавны Немдiнса бурдöдчанiнын аслас специальносьт серти жö — лаборантöн. Лаборатория улö вичмöдiсны кык жыр, кöнi вöчалiс анализъяс. Уджыс коркö овлö этша, а коркö и юр выв тыр, торйöн кор кыптылö висьöм либö йöзыс прöйдитöны медосмотр да диспансеризация. Тшöкыда волöны и олöмаяс. Анализъяс вöчны эм став коланторйыс: оборудование, весиг вылькодь на вир вöчан аппарат, реактивъясöн ас кадö вичмöдö Кулöмдiнса шöр бурдöдчанiнлöн клиническöй лаборатория. 
Танi, Немдiнын, Ольга Юрьевналы вичмöдiсны оланiн, кодöс дзоньталiс вужвыйöн. Татысь паныдалiс радейтана мортöс, кодкöд гозйöдчисны. Василий Николаевич — уджач да киподтуя морт, зiльö асшöр уджалысьлöн пилитчанiнын, кыйсьö-вöралö. Гозъя виччысьöны дзолюкöс, та вöсна водзö вылö мöвпалöны лöсьöдны ассьыныс оланiн. Мый нöшта колö аньлы, мед кывны асьсö тыр шудаöн? Радейтана удж да семья и, дерт жö, муслун, кодöн тырвыйö кытшалöны верöсыс да Богдан пиыс, кодi таво пырас школаö.

Комментарии:

Добавить комментарий

Свежий выпуск: за 14 ноября