Апрель 8 лун — военнöй комиссариатъясын уджалысьяслöн лун

[ A+ ] /[ A- ]

Батьыслöн кок туйöд

— Республикаса районъясысь сöмын миян районса военнöй комиссариатын эм призывайтчан пункт. Сiйöс лöсьöдiм выльлаö, пытшкöсса делöяс министерстволöн районса юкöнлöн керкаö, 2017-öд вося октябрын вуджöмöн. Армияö мунны дасьтысьысь зонъяслы оз нин ков котравны бурдöдчанiнö, танi эмöсь врачьяслы торъя жыръяс, да бурдöдысьяс волöны асьныс. И тайö вöлi зэв кивыв кольöм воын коронавирус ыджыдалiгöн. Танi жö уджалö зонъясöс армияö босьтан комиссия, — панiс сёрни Олег Владимирович Ватанский, кодi районса военнöй комиссариатын 2002-öд вося декабр 1-öд лунсянь, 2009-öд вося февральсянь районса военнöй комиссар.
Ачыс Астрахань обласьтса военнöйяслöн Актюбинск карысь. Öнi на сэнi сулалö авиа-циялöн полк. Батьыс военнöй жö, да ичöтдырсянь аддзис-тöдлiс служитöм да олöмсö. Батьыслöн кок туйöд и мунiс. Школа бöрын велöдчис армияса генерал А.В.Хрулёв нима Санкт-Петербургса военнöй академияын. Сiйöс помалöм бöрын 1996-öд воын ыстiсны Кебанъёль дорын сулалысь воинскöй часьтö. Сэки сэтчö öтпырйö локтiс оборона министерстволысь вузъяс помалысь 12 морт. На лыдын и Константин Викторович Гааг, кодi часьт сиптысьöм бöрын уджавлiс военкоматын, Андрей Леонидович Яснецов танi зiльö и öнi на, Сергей Николаевич Климчук миян военкоматсянь вуджис Усинскö да талун сэнi военнöй комиссар.
Талун военкоматын уджалö 12 морт да куим стöрöж. Ыджыд тöдчанлун сетöны зонъясöс армияö дасьтiгкежлö, ышöдöны велöдчыны оборона министерстволöн вузъясын да служитны контракт серти, топыд йитöдаöсь районса да овмöдчöминса администрацияяскöд, военно-патриотическöй котыръясöн веськöдлысьяскöд да с.в. Мобилизация юкöн кывкутö военнöй дасьлунысь.
— Таво республикаын военнöй комиссариатъяс котыртчöмсянь тырö 100 во. Чолöмала уджалысьясöс да ветеранъясöс тайö тшупöда паснас, сиа ён дзоньвидзалун, шуд, кыпыд ловкылöмъяс, — кывкöртiс запасса майор Олег Владимирович Ватанский.
Гижöд да снимок Марина Дадашовалöн.

Комментарии:

Добавить комментарий

Свежий выпуск: 28 марта

Осторожно — мошенники!