Асшöр уджалысь Иван Васильевич Ракин ноябрсянь дугöдчö Сыктывкарö автобусöн йöзöс нуöм-вайöмысь.
Пасъям, сiйö кык во сайын кык во коставлöм бöрын «ловзьöдiс» юркарö йöзöс автобусöн новлöдлöм. Весиг «Монди СЛПК» акционер котырлöн отсöгöн ньöбис бур автобус. Сылы воча мунiс районса администрация, кодi и корис бöр лöсьöдны Сыктывкарö ветлöм, сетiс кöртымö уна патераа керкаысь кык жыр. Иван Васильевич сiйöс дзоньталiс вужвыйöн: вежис джоджъяс, лöсьöдiс йирк да стенъяс, пуктiс выль öшиньяс. Вежис и шоныд мунан трубаяс. Восьтiс автопавильон. Югыд да кыпыд öти жырйын диспетчер вузавлiс билетъяс, мöдас — виччысянiн. Тайö вöлi зэв кивыв район пасьтаысь Кулöмдiн пыр карö мунысьяслы, öд орччöн сельполöн нуръясянiн. Зэригъясöн либö лым усигöн оз ков сулавны ывла вылын, автобусö пуксьöны стöч кадö. Бур и сiйö, мый челядьöс нуöмысь йöз вештысисны джын донсö. Нöшта бур вöлi кокньöд босьтысьяслы да отпускö бокиö ветлысьяслы, кодъяслы уджаланiнсянь либö социальнöй юкöнсянь билет сдайтöмöн бергöдлiсны сьöм. Но…
— Автобус юркарö мунiс-локтiс быд лун куимысь. Öти во уджыс мунiс бура. Сэсся пöдтiсны йöзöс дзоля автобусöн да таксиöн гусьöн новлöдлысьяс. Карö абу Кужйö ветлöм. Колö ломтас-мавтас вылö уна сьöм, вештыны Сыктывкарса автопавильонлы вузалöм билетъяслöн донысь 15 процент, водительяслы да уджалысьяслы удждон, автопавильонлысь жыръяс кöртымалöмысь. Тайö рейсыс вайö сöмын воштöмъяс. Миянлы тайö оз ков, — тöдчöдiс И.В.Ракин.
Йöз корисны, мед юркарö ветлiс автобус. Но асьныс жö мунöны официальнöя пасйысьтöг уджалысь таксистъяскöд. Кодi мыжа, мый И.В.Ракинлы быть ковмас сиптыны юркарö автобусöн новлöдлöм?

Марина ДАДАШОВА.