Аддзылiс Крым

[ A+ ] /[ A- ]

Кулöмдiнысь Владислав Строгонов июньсянь уджалö велöдан управлениелöн том йöзкöд уджалан юкöнын медшöр экспертöн. Тайö кадöн мойвиис ветлыны Ыбö том йöзлöн форум вылö, а август 20-28-öд лунъясö — Крымö «Таврида» чукöртчылöм вылö. Мöдыс вöлi Судак карсянь матын, Крым полуостров вылын. Сэнi чукöрмылiс страна пасьтаысь нёль гöгöр сюрс водзмöстчысь том морт. Коми республикаысь ветлiсны 10-öн. Сэтчö вермисны веськавны 18-сянь 30 арöсöдз енбиа ныв-зон, кодъяс серпасасьöны, сьылöны, йöктöны да с.в. Владислав дзолясянь бура серпасасьö, велöдчис республикаса юралысьбердса искусствояслöн гимназияын. Ыстiс корöм да ас йылысь видео, пасйис серпасасьны кужöм йылысь. Мыйта нимкодьлуныс вöлi, кор воис юöр, мый сiйöс корöны локны.
Крымын Владислав вöлi медводдзаысь да сiйöс ёна чуймöдiс вöр-ваыс: гöгöр кос, уна гöраяс, степьяс да тöвру, гежöда позис аддзыны турунвиж рöма быдмöгъяс. Ас водзас пуктiс мог тöдмасьны том йöзкöд, босьтны мыйкö выльтор да, дерт жö, шойччыны пöжысь шондi улын, нимкодясьны бур поводдяöн.
— Быд локтöмасянь кылiс сэтшöм ён вын, найö нырччысьöсь, тайö олöмас мыйкö выльтор вöчны окотитысьöсь. Аслас олöм вылö уна боксянь видзöдлöмöн аслым вöчи кывкöртöдъяс. Гöгöрвои, мый ачымöс тайö олöмас аддзыны позянлуныс зэв уна. Тайö форумыслöн уджтас вöлi зэв озыр, уджалiсны уна юкöн вылö юксьöмöн. Позис ветлöдлыны да кывзыны сэтшöмъясöс, кодъяс вöлiны коланаджыкöсь. Вöлiс кö позянлун, ветлi эськö унджык вылö, да мунiсны öти кадö. Нуöдiсны и гажъяс, сэки волывлiсны гöсьтъяс да чукöрмылiс матö 6 сюрс морт, — висьталiс Владислав.
Том йöз унаöн тöдмöдiсны асланыс балаясöн, мед вермыны грант. Кор зон кывзiс балаясöн петкöдчысьясöс, сылöн чужис зэв уна мöвп, кодъясöс позис эськö збыльмöдны чужанiнын. Сыктывкарысь öти нывлы сетiсны 100 сюрс шайт, медым сiйö пöртас олöмö ассьыс мöвпъяссö. Ныв велöдiс, кыдзи позьö уджавны лёк семьяясысь челядькöд, мед найö быдмисны бур йöзöн.
Зонлöн висьталöм серти, сiйö унатор босьтiс аслыс, вежсис, лоис олöм вылö мöд видзöдлас. Тöдмасис зэв уна йöзкöд. Налöн артмис ён котыр: Москваысь, Комиысь, Якутияысь да Казаньысь томулов. Тöдмасисны да сёрнитiсны медводдза лунъяссяньыс да сiдзи и ёртасисны став лунсö. Рытъясын пыр гажöдчисны öтлаын.
Вердiсны найöс öтувъя сёянiнын луннас öтчыд, да нöшта кыкысь ывлавывса пусянiнын. Шуисны, мый узьны кутасны палаткаясын, но медводдза войын нин гöгöрвоисны, мый тадзи оз узьсьы. Кодкö узьлан мешöкъясöн сэсся мунiс веськыда саридз дорö, кодкö сцена вылö — кодi кытöн аддзис аслыс ин.
Том йöзлы петкöдлiсны нималана серпасасьысьяслысь картинаяс, нуöдiсны гижысьяскöд рытъяс, петкöдчисны гажöдысь котыръяс. Öти кывйöн кö, ветлöмыс колис дыр казьтыланаöн. Татшöм чукöртчылöм бöрын Владиславлы, дерт жö, окота мыйкö выльтор вöчны да пыртны олöмö, уджö, медым ас сиктса, чужан сиктса томуловлы овсис бурджыка, кыпыдджыка.
Галина КЛЮЖЕВА.
Интернетысь босьтöм снимокъяс вылын: выль ёртъяскöд; рок-концерт дырйи.

Комментарии:

Добавить комментарий

Свежий выпуск: за 7 ноября