Ручын куим воысь дырджык уджалö соцработникöн Зоя Михайловна Гуляева. Сёрнитыштi сыкöд, и со мый висьталiс. Верöсыс кувлöма водз. Колис кык нылук. Совхоз бырöм бöрын уджыс сиктын эз коль. Унаысь пыравлiс сельсöветö, юасис удж. Вöзйисны видлыны соцработниклысь удж. Дзик пыр эз кöсйысь, мöвпалiс, артмас-ö оз уджавны йöзкöд, öд колö удитны ветлöдлыны сикт шöрсянь чоййылöдз. Сэсся öд и йöзыс быдпöлöсыс эм. Босьтчис полöмпырысь, а сэсся велалiс. Уджыс воö сьöлöм вылас. Сьöкыдджык тöвъясын, лоö весавны уна лым. Пыртлö ва да пес, кодлыкö ветлö лавкаöдз. Берба лунö ставныслы нуис берба вожъяс. Нимкодьыс вöлi олöмаяслöн! Кодлыкö кö колö краситчыны-обоитчыны, корсьö йöзöс, бöрынас пыралö видзöдлыны, кыдзи мый вöчöны. Зоя Михайловна вылын абу сöмын пес-ва, сылы колö и быдöнкöд варовитыштны. Олöмаяс юасьöны быдтор, сиктад öд ставныс öта-мöднысö тöдöны. Кодöскö лоö стрöжитыштны, а кодöскö ошкыштны. 
Öнi Зоя Михайловна олö öтнас. Ыджыд нылыс ас семьяöн карын, аслас нин ныв. Ичöтджыкыс мöдöд во велöдчö связьлöн училищеын. Но пуксьылан кадыс сиктса мортыдлöн абу, эштö ворсны пионерболöн, сьылö-йöктö «Сударушки» котырын, волывлö клубö «Зарни ар» кружок вылö, кöнi вöчасьöны киясöн. Быдлаö кыпалысь морт. Радейтö дзоридзьяс, кыдзи керкаса, сiдз и ывласа. Керка дорас дзим-дзурк, нимкодь пыравны. Зоя Михайловна варов ань, серамбана. Гашкö, та вöсна и лöсялö накöд, кодъяслы отсасьö. Аньлöн уджыс зэв колана. 

Екатерина УЛЬНЫРОВА. 
Руч.