Август 11-öд лун — стрöитчысьлöн лун

[ A+ ] /[ A- ]

Кулöмдiн воысь-воö быдмö-паськалö, то öтилаын, то мöдлаын кыпалöны выль керкаяс. Катыдпомын «Войвыв» микрорайонын найö быдмисны душ-мöд воöн тшакъяс моз. Сöвмö-мичаммö и регыд на артмöм Петропавловскöй улича, кöнi синмад шыбитчöны аслыспöлöс мича керкаяс. Öтиын буретш вöчасисны, кык айлов мичмöдiсны керкасö ортсысяньыс. Нимкодь видзöдны — кужысь йöзлöн инструментъясыс сiдзи и ворсöдчисны кианыс. 
— Тайö керкаыс вöлi вевт улын нин, кор босьтчим уджавны, — висьталiс Эдуард Алексеевич Башурин. — Вöчасям мöдöд тöлысь. Шыльöдiм йирк, ортсысяньыс да пытшкöссяньыс стенъяс, вочасöн мавтам-мичмöдам, вöчим джодж, вольсалiм ламинат. Уджыс уна на, öд колö вöчны сiдзи, мед олысьясыс чышкыштiсны кокнысö да пырисны овны. 
Керка вылын уджалiсны куимöн. Видзöдöмысь, ставныс ассьыныс удж бура тöдысь да ыджыд сяма йöз. Ачыс Эдуард Алексеевич стрöитчан уджын кызь сайö во, 1202-öд номера ПМК-ын уджалiгöн на велöдчылiс каменщик-стрöитчысьö, сэсянь йöзлы кыпöдiс уна дас керка нин. Сергей Александрович Воробьёв — плöтник. Пила-черöн вöдитчö уна во жö нин. Алёна Викторовна Тимушева — штукатур-маляр. Кöть велöдчис таö некодöн туйдытöг, зiльö дас во, вермас мичмöдны-мавтны керкалысь пытшкöссö и ортсысö, тшапитны чача моз. 
Вöчасьысьяслысь удж котыртö А.И.Кузнецов. Сылöн ставыс квайт бригада, быдöн бергöдö ассьыс удж: öтияс вöчöны керкалы подув, мöдъяс кыпöдöны вевт улöдз, коймöдъяс нуöдöны пытшкöс да ортсы уджъяс. Вöчасьöны уджалан котыръяслы и йöзлы. И оз сöмын юрсиктын, но и район пасьта. Аддзысьлан лунö бригадаяс буретш уджалiсны Ульянаын да Кулöмдiнын. Öтилаысь уджсö эштöдасны да вуджöны нин мöдлаö. Öнi гожöмын уджыс тырмымöн. Колö на кыпöдны керкаяс юрсиктын да Немдiнын. Сöмын тай поводдяыс таво дурö да оз лэдз уджавны тыр вынöн. Векжö урчитöмасö быть ковмас вöчны. 
Галина Нестерова. 
Гижысьлöн снимок вылын: Э.А.Башурин, А.В.Тимушева, С.А.Воробьёв.

Комментарии:

Добавить комментарий

Свежий выпуск: за 12 декабря