Август 10-öд лун — физкультурниклöн лун

[ A+ ] /[ A- ]

Озъягысь Евгений Александрович Нестеровлы (снимок вылын) спорт мусмис дзолядырсяньыс. Школаын ворсiс баскетболысь, футболысь, котралiс да с.в. Гашкö, тайö вуджис Александр Борисович батьсяньыс, кодi котралiс лыжиöн, ворсiс футболысь, а, гашкö, баскетбол кузя тренер А.Г.Мингалёвсянь. Кыдзи пасйис Евгений Александрович, налöн дзоньнас классыс радейтiс спорт. 
Школа помалöм бöрын пырис велöдчыны öтиöд номера педколледжö физкультура велöдысьö. 2005-öд воын локтiс уджавны Озъягса школаö да уджысь орöдчытöг водзö велöдчис аслас специальносьт кузя Сыктывкарса госуниверситетын. Школаын велöдöм кындзи, уджалö «Олимпик» спорт шöринын тренерöн. Нуöдö баскетбол, футбол, лыжи, котралöм кузя секцияяс. 2016-öд воöдз тшöтш велöдiс туриставны да венны кырт. 
Тайö воясöн петкöдчылiс челядькöд район да республика тшупöда уна ордйысьöмын. 2011-öд воын ветлiсны Санкт-Петербургö, а таво июльын Псковö «Безопасносьтлöн школа» ставроссияса ордйысьöм вылö да лоисны мöдöн. 
— Миян велöдчысьяс петкöдчисны зэв бура, таысь меным нимкодь. Сьöлöм шоналö, мый челядь окотыпырысь локтöны ёнмöдчыны и тыдалö налöн бурланьö вежсьöм, öд спорт ёна вежö мортöс. Водзынджык, дерт, унджыкöн кöсйисны ёнмöдчыны. Öнi ёнджыка пукалöны гортаныс компьютер сайын, но спортöн «висьысьыд» эм пыр. Зэв ыджыд аттьö «Олимпик» спорт шöринса директор Е.Д.Кузнецовалы, кодi пыр мунö воча да ветлiгъясöн сетö колана спорт инвентар. Сiдзжö аттьö Сыктыв районса тренер Д.В.Кропанёвлы, кодi ордйысьöмъясöдз корлiс миянöс челядькöд аслас ёнмöдчанiнö. Тайö ёна отсалiс налы ордйысьöмъяс дырйи. Аттьö и Кöрткерöсысь тренер В.Н.Митюшовлы, кодлöн велöдчысьясыс ветлiсны миянкöд öтув. Зэв нимкодь, мый велöдчысьяс унаöн мунiсны менам туйöд, йитiсны олöмсö спорткöд, — висьталiс Е.А.Нестеров. 
Евгений Александровичлöн Ксения гöтырыс тшöтш ёртасьö спорткöд. Сылы сьöлöм вылас воö волейбол. Тшöкыда ветлывлö ордйысьöмъяс вылö. Гозъя кыпöдöны керка, пыдди пуктöны да радейтöны öта-мöдсö. 
Евгений Александровичлöн эм ГТО-лöн зарни пас. 
Галина Клюжева. 
Снимок Виктория Тимушевалöн.

Комментарии:

Добавить комментарий

Свежий выпуск: за 12 декабря