Керчомъяысь Нина Ивановна Тарабукина (верöс сайö петтöдз Гичева) Ямало-Ненеч кытшын нелямын во олöм бöрын бергöдчис чужанiнö. Кыпöдiс керка. 60 арöсöн велöдчис да босьтiс водительлысь удостоверение. Ньöбис машина да школадырся велöдчысьяскöд, рöдвужкöд тшöкыда петавлö туйö. Исласьö лыжиöн. Ёна вотчö. Зэв мичаа вышивайтчö да петкöдчö вöчöмторъясöн. Кыпыд лола, шань сьöлöма ань.
Нина Ивановналöн медводдза велöдысьöн вöлi Анна Андреевна Попова, витöд классянь велöдiс бара жö Анна Андреевна, сöмын Кочанова. Мукöдъяскöд тшöтш кокниа кыпавлiс быдтор вылö, зiлис бура велöдчыны да водзмöстчыны, мед лоны октябрёнокöн, пионерöн да комсомолечöн. Юрнуöдiс пионеръяслöн, а сэсся комсомолечьяслöн котырöн. Вöлi збойöн, кужис öтувтны астшöтшъяясöс. Гырысь классъясын школалы да садлы поткöдлiсны-тэчисны пес, совхозлöн скöт карта дорысь муяс вылö петкöдiсны куйöд. Чукöртлiсны пöим, кöрт, ковтöм бумага. Сэки ёна исласисны-котралiсны лыжиöн. Ордйысьны ветлiсны весиг юркарö.
Школа бöрын мунiс Перымö велöдчыны врачö.
— Сиктын эг рочасьлöй да роч литератураысь сочинение гижи «3» вылö. Колана баллыс эз ло да менö эз босьтны, — казьтылiс воддзасö.
Гортас локтiгöн Сыктывкарын вочаасис сиктса тöдса зонкöд, кодi 12 номера училищеын велöдчис трактористö. Дыр эз мöвпав, документъяс нуис сэтчö. Тöдiс, мый трактористлы сиктын уджыд сюрас век. Мамыс джöмдiс, мый врачöн лоны кöсйысьöс шыбöлитiс дзик мöдлаö. Нылыслы киас пуктiс вежтöм 25 шайт. Лэччы пö да босьт документъяс, öти ань тракторист сиктын эм нин. Ныв эз вензьы, а «Заря» теплоходöн лэччис юркарö. Бöр локтiгöн Кулöмдiнын пырис комсомоллöн райкомö. Школаын велöдчигöн волывлiс комсомолечьяслöн быд чукöртчылiгöн да бур йитöда вöлi медводдза секретар Иван Петрович Арнаутовкöд, кодi нуöдiс велöдан юкöнö. Вöзйисны велöдны Пузласа ичöт классъяс либö пионервожатöявны Немдiнса школаын. Бöрйис Немдiн, кодi чужанiнсянь матын да кытчö ветлiс теплоход. Пионервожатöялiс, висигъясöн вежлiс мукöд велöдысьясöс. Водзмöстчис сиктса олöмын.
Ичöт классъясын öти велöдысь висьталiс, мый сiйö велöдчис Войвывса войтыръяслöн Салехардса национальнöй туйвизя педучилищеын, кöнi студентъясöс вердiсны да кöмöдiсны-пасьтöдiсны дон босьттöг. Нöшта на сетiсны бур стипендия. Сэтчö и ыстiс документъяс. Августын воис корöм. Буретш сэнi жö велöдчисны Керчомъяса кык ныв.
— Найö öти во велöдчисны нин. Ме челядькöд уджалi во да пуксьöдiсны накöд. Бура пö кö кутан велавны, колям мöд во нин велöдчысьяскöд, а он кö, пуксян сöмын на локтысьяскöд. Сетчис кокниа да накöд и мунi водзö, — висьталiс ань.
Ёна ёртасис спорткöд. Щельябöжысь Светлана Терентьевакöд котралiсны лыжиöн эз сöмын училищесянь, но и аэропортсянь, чери кыйысьяслöн овмöссянь, карсянь, Ямал-Ненеч кытшсянь. Спортсменъяслы рыт кежлö сетлiсны содтöд сёян: шоколад, калбас, вый, пуöм кöр яй. Вичмöдлiсны уна да нывъяс чöсмöдлiсны öтлаын олысьясöс. Котравны лыжиöн сетлiсны и шоныд паськöм.
Училище бöрын локтiс чужанiнö. «Заря» теплоход сэки сувтлiс катыдö. Книгаяс да кöлуй тыра сумкаясöн Эжва пöлöн локтiс керка весьтöдз да чой йылö кайигöн вочаасис салдаткöд. Теплоходысь чеччис öтнас да эз гöгöрво, кодöс зонмыс вочаалö. Тэнö пö, öшиньöдыс аддзисны да рöдвужыд ыстiсны. Ныв эз тöд, кодi тайö зонмыс.
— Ме Пилёв Ваньö, öтлаын велöдчылiм, — висьтасис зон. Батьыс кулöм бöрын сiйöс рöдвужыс нуис ас дорас Перымö, колис нин квайт во да нинöм шензянаыс абу.
Арнас Нина Ивановна мунiс войвылö, а Иван кольччис Керчомъяö. Трактористалiс вöр овмöсын, чöжис сьöм ворсны кöлысь. Мöд вонас öтлаасисны да мунiсны ылi муö. Нывлы, кыдзи том велöдысьлы, юрсюянiн сетiсны öтувъя оланiнысь, а гижсьöм бöрын вичмöдiсны öти жыръя патера. Верöсыс уджалiс чери кыян овмöсын, а сэсся вуджис мусир корсьысьяслöн котырö.
Училище помалöм бöрын Нина Ивановнаöс ыстiсны Тюмень обласьтса Яр-Сале юрсиктö, кöнi велöдiсны кöр видзысь ненечьяслысь челядьöс. Сiйöс пуктiсны школабердса интернатö воспитательöн.
— Нолевöй классö воысьяс сёрнитiсны чужан кывйöн, рочасьны эз кужны, эз гöгöрвоны. Училищеын вöлi зэв бур велöдысь, велöдöм кузя наукаясса кандидат Елена Сысой, кодi лöсьöдiс велöдчан книгаяс. Ме экзамен сдайтлi «5» вылö да ненеч кывйöн сёрнитi бура, — висьталiс Нина Ивановна.
Тундраын бать-мамкöд ветлiгöн, чумын телевизортöг ни радиотöг олiгöн, челядь унатор эз тöдны, колiс весиг велöдны, мый медводз колö пасьтавны трусик-майка, дöрöм-гач. Велöдiсны сёйны пызан сайын, узьны вольпасьын, мыссьыны чеччöм бöрын, сёйöм бöрын да кияс няйтчигъясöн, пывсьыны, зырасьны, видзöдны ас бöрся. Садйö ветлытöг школаö пырысьяс эз кужны весиг киас кутны ручка. Вöлiны лэбавны кужтöм сильöпиян кодьöсь, найöс колiс лэптыны бордъяс вылö. Тундрасаяс надзöникöн векжö пырöдчисны олöмö. Петавлiсны сиктö, ветлiсны клубö, лавкаö да с.в.
Яр-Салеын уджалiс сöмын куим тöлысь. Новый Порт карса школаысь мунiс пионервожатöйыс да 1973 воын корисны сы пыдди. Висигъясöн вежис серпасасьысь, физкультура да мукöдтор велöдысьясöс. Кык во мысти сетiсны ичöт классъяс, кöнi велöдчисны сöмын кöр видзысьяслöн челядь. Уджалiгмоз велöдчис Тюмень обласьтлöн Ишимса пединститутын. Новый Портса школаын уджалiс 2012 воöдз. 35 арöсöдз котралiс лыжиöн, шедöдiс спортса мастерö кандидатлысь ним, но кынмалöмысь ёна висьмылöм бöрын дугöдчис. Но спорткöд ёртасис пыр, ворсiс волейболысь, баскетболысь, теннисысь да с.в.
Ненеч челядь урокъяс бöрын велöдчисны вöчасьны, вышивайтчыны, вурсьыны да с.в.
— Челядькöд мöвпыштiм ас киöн вöчны зонкаöс. Ненечьяс сьöд синмаöсь да быдлаысь корсим сьöд синма аканьöс, но лавкаясын вöлiны сöмын лöз синъясаöсь. Медбöрти сюрис жö, но эз векни синъяса, а быттьö чуймöма, ыджыдъяса. Сылы паськöм вурим ненечьяс ног. Найö дзоля челядьлы маличалöн либö ягушкалöн юркытш бöрö вурöны синъяс, кодъяс лоöны видзöгöн. Кыкнан киняулас дзоляник тiльгунъяс. Кагаыс кö вешъяс чум дорысь да ылалас, тiльгунъяс серти кыласны-аддзасны. Ненечьяс некор оз вошны, оз кынмавны тундраын. Тöвся маличалöн увтысыс том кöрлöн куа да шоныд. Кор ёна турöбалö, кöръяссö лэдзöны да найö оз кольны кöзяинъяссö, водöны додь гöгöр, кытчö маличаö крукыльтчöмöн водö и морт. Ненечьяс зэв тöждаöсь вöр-ва вöсна. Кытчö веськалö бипуртö оз пестыны, лöсьöдöны шор бокын, — ненечьяслöн олöмöн тöдмöдiс ань.
Кöр видзысьяслöн челядь некор эз сёйлыны печенча. Вöр-ваö петалöм водзын Нина Ивановна шыöдчылiс школа-интернатöн веськöдлысь дорö, мед пусянiнысь сетасны картупель. Бипур дорын висьталiс, кыдзи коми йöз пöжалöны картупель. Велавтöгыд налы пöжалöм картупельыд эз во сьöлöм выланыс, а бöрынджык кутiсны корны.
Пенсия вылö петтöдз бöръя дас восö уджалiс велавтöм челядькöд. Сетiсны 4-öд класс, кöнi вöлiны 12-öн. Во помын вöчисны кывкöртöд, мый 8 морт велалöны, да вуджöдiсны велалысь челядьлöн классö.
Танi эз тöдлыны «перестройка», ас кадö сетлiсны бур удждон, олiсны госа чöскыд чери да кöр яй вылын. Чужанiнö быд волiгöн аддзис, кыдзи сьöкыда олö рöдвужыс да быдногыс отсалiс.
— 1991 воын лунвывса шойччанiнысь Сыктывкар пыр локтiгöн аддзи юöр, мый кык жыръя патера вузалöны 95 сюрс шайтысь, а миян сьöрысь вöлi 120 сюрс шайт. Кöсйи ньöбны да верöс сувтiс паныд. Мöд вонас, видзöда да, сэтшöм жö патера 120 сюрса нин, зептын 200 сюрс шайт. Бара дзайги, вай, мися, ньöбам. Ме пö Ямалысь некытчö ог мун. Коймöд вонас патера 600 сюрс шайта нин. Вай, мися, кöть Керчомъяын кыпöдам дзоляник керка, да кöсйысис. Верöсöй мунiс, а ме кольччи да ньöби рöдвужлысь вöр. Мöд вонас тулыссянь босьтчим уджö. Кырссьысис 16, куим лунöн тшупсис 42, öти лунöн лэптiс 50 сайö морт. Менам ставнысö гижöма, — ставнысö и лыддьöдлiс нывбаба.
Верöсыскöд олiсны 25 во. Чукöртчылiгъясöн радейтлiсны сьывны «Вот кто-то с горочки спустился», кодi зэв лöсялö налöн аддзысьöмлы. Но висьöм эз юась, верöс кувсис кадысь водз. Кöнкö вертолётöн, кöнкö поездöн сiйöс вайисны öкмыс лун да дзебисны чужанiнас.
Кыпöдöм керкасö Нина Ивановна вуджöдiс мöдлаö да рöдвуж отсöгöн вайöдiс помöдз. Позис кольччыны Ямал-Ненеч кытшас, кöнi сетiсны пыдди пуктана уджалысьлысь ним да Тюменьын бур патера, но ас дорас кыскис чужанiн.
— Войвылын олiгöн нин вышивайтi керка, кодöс кöсйи кыпöдны, гöгöрыс дзоридзьяс. Судзöда да ньöбала унапöлöс кöйдысъяс, мичасьыс-мича дзоридзьяс мичмöдöны öшинь улöс гожöмбыд. Вышивайтчöмöн «вися» важысянь нин, став коланасö судзöда интернет пыр, ньöбны лэччыла юркарöдз. Верöсöй уджалiгас аддзылiс еджыд ошкöс. Казьтылöм вылö вöчи сiйöс. Аддзи серпас, кöнi канькöд пукалö чойлöн кодь ныв да вышивайтi и сiйöс. Вöча ставсö телевизор видзöдiгмоз да козьнала. Дасьтыся нин аньяслöн лун кежлö. Босьтчи вöчасьны выль ногöн, мичмöда дöрöмъяс уна рöма сунисъясöн. И пыр казьтывла войвылын 40 вося шуда олöм, — кывкöртiс ань.
Марина ДАДАШОВА.