Февраль 27-28 лунъясö Кулöмдiнын бöрйисны 2018 вося медбур воспитательöс. Петкöдчис сизим велöдысь: Помöсдiнысь И.Е.Рагулина да В.В.Егорова, Дереваннöйысь Т.П.Гуляева, Кулöмдiнса «Голубокысь» Е.А.Пименова, «Улыбкаысь» Е.Н.Субоч, медводдза садйысь Н.Ф.Паршукова да Г.И.Золотарёва. Медводз петкöдлiсны, кыдзи уджалöны челядькöд, быдöнлöн вöлi аслыспöлöс сям, кодöс позяс босьтны мукöд велöдысьлы. Сэсся челядькöд уджалысьясöс велöдiсны торйöн, мед став выльсö пыртасны асланыс садъяс.
Медбур воспитательлысь ним шедöдiс медводдза садйысь Г.И.Золотарёва. Мöдöн лоис сэтысь жö Н.Ф.Паршукова да коймöдöн «Голубокысь» Е.А.Пименова. Мукöдыслы сетiсны аттьöалан гижöдъяс. Галина Ивановна апрельын мунас карö петкöдлыны миянлысь районнымöс республикалöн тшупöда ордйысьöмын. Надежда Фёдоровна мунас мöд во (миян районын тайö ордйысьöмыс овлö кык воöн öтчыд).
Галина Ивановна челядькöд 25 во. Быдпöлöс конкурсын вермылiс унаысь нин. Сылöн чайтöм серти, посни челядьöс велöдны колö ворсöдöмöн. Бур йитöда бать-мамкöд, велöдö найöс вöчны сiйöс, мый вöчöны челядьныс, ворсны сiдзи, кыдзи ворсöны ичöтъяс. Велöдчöны весиг пöль-пöчьяс. Быдтор вевъялö: челядькöд бергöдчöм кындзи радейтö сьывны да ветлöдлö «Эжваса дзоридзьяс» сьылан котырö. Ёна радейтö быдтыны дзоридзьяс. Чöскыда пöжасьö да мичаа кысьö. Тöвнас котралö лыжиöн да исласьö ватрушкаöн. Петкöдчö быдпöлöс ордйысьöмын.
Сiйö висьталiс:
— Татшöм сяма ордйысьöмнас тöдмалан уна выльтор, аддзан выль ёртъясöс. Колö пыр мунны водзö. Менам чайтöм серти, воспитательлы колö быдтор кужны: сьывны и йöктыны, висьтавны кывбуръяс и мойдъяс. Колö быд лун петкöдлыны асьтö бур боксянь, öд челядь босьтöны тöдвылö да вöчöны сiдзи жö. Ме дзолясянь кöсйи лоны воспитательöн. Школаын велöдчигöн гожöмъяснас век отсаси садйын. Öнi бать-мам пыр этшаджык кад вичмöдöны челядьлы, таысь шогöдö. Колö унджык кад коллявны öтлаын, кагаöс велöдны лоны шаньöн, радейтны быд ловъясö.
Надежда Фёдоровна Паршукова велöдö 11 во, бöръя витсö садйын. 2017 воын сетiсны велöдан управлениелысь почёт грамота. Пыртö уна выльтор, торйöн нин челядькöд да налöн бать-мамкöд балаяс лöсьöдiгöн. Радейтö котравны лыжиöн.
Надежда Фёдоровна висьталiс:
— Колö пыр велöдчыны аслыд, челядьлы сетны сьöлöмтö. К.Гельвецкий пасйылiс, мый челядьöс быдтысь — тайö волшебник. Меным долыд, мый козьнала челядьлы муслун. Велöда челядьöс радейтны бать-мамöс, чужанiн, асгöгöрса олöм. Верстьöлы колö гöгöрвоны, мый кага сöвмö медводз гортын, оз ков кутны лача сöмын воспитательяс вылö. Воспитатель да бать-мам водзын сулалö öти мог — вöчны ставсö, мед зонпосни вöлiны шудаöсь, дзоньвидзаöсь, аддзисны асьнысö олöмын.
Евгения Александровна Пименова велöдö 10 во. Уджас пыртö выльторъяс, шуам, квест ворсöмъяс. 2017 восянь сiйö общественнöй инспектор, видзöдлас улас юысь да лёка олысь семьяяс. Тöдмöдö челядьöс асланыс правоясöн. Радейтö петавлыны вöр-ваö, кытчöкö ветлыны, кысьыны, котралö лыжиöн да ворсö бадминтонöн.
Евгения Александровна висьталiс:
— Тайö конкурссьыс виччыся выльторъяс. Окота юксьыны и аслам аддзöмторъясöн. Ме серти, медтöдчанаыс — тайö челядь дорö муслун, колö лоны налы мöд мамöн да ёртöн, пыдди пуктыны найöс, лоны пыр шаньöн.
Галина КЛЮЖЕВА.
Гижысьлöн снимок вылын (шуйгавывсянь веськыдвылö): Н.Ф.Паршукова, Е.А.Пименова
да Г.И.Золотарёва.