Луныс сöмын на пансис, а Керчомъяса лыжи видзанiнын кылiсны нин челядь. Тренер Николай Витальевич Катаев петкöдiс посни класса зонпосниöс иславны лыжин. Николай Витальевич школаын 1985 восянь. Велöдiс вöчасьны пуысь да кöртысь, а лыжиöн котравны босьтчис велöдны тавосянь. Урокъяс бöрын велöдö и торъя котырöс, кöнi матö 15 морт. Котравны эм 25 гоз лыжи, кодъясöс козьнавлiс районса спорт школа. Нюжöдöма матö 2,5 километр югзьöдöм исласян туй. Сiйöс лöсьöдö «Буранöн» базаöн веськöдлысь Е.Н.Булышев. Сiйö висьталiс, мый лыжи видзанiн пыр йöза. Асывнас мунöны урокъяс, луннас волöны лыжиöн котравны радейтысьяс да теннисöн ворсысьяс. Шойччан лунъясö волöны асланыс лыжиясöн и сиктсаяс.
Выль базаыс районса спорт школалöн, воссьылiс во куим сайын. Танi шоныд да югыд.
— Он шу, мый коркö танi вöлi гид, — висьталiс Иван Егорович Тарабукин, теннисöн ворсны велöдысь. — Директоралiгöн на лöсьöдлiм подсобнöй овмöс, кöнi видзлiм нёль вöлöс да нёль мöскöс. Кирпичысь кыпöдöмторйыс сулалiс весьшöрö, со и лöсьöдiм лыжи видзанiн. Артмис районса администрациялöн отсалöмöн. Эмöсь пöрччысянiн, тренажёръяса шойччанiн, мыссянiн, локтö ва. Сöмын колö мебель. Пызан-улöсъяс да лабичьяс кöсйисны вичмöдны школаысь.
Иван Егорович быдтö бур спортсменъясöс. Сы дорö волö 18 морт, а то и унджык. Тшöкыда ордйысьöны ас костаныс, петкöдчылöны районын да республикаын, шедöдлöны вермöмъяс. Кöкъямысöд классысь София Лютоева, кодi таво районын лоис вося медбур спортсменкаöн, республикалöн тшупöдын вермылiс некымынысь нин. Ён ворсысьяс лыдын и 8-öд классысь жö Евгения да Таисия Лютоеваяс, 9-öд классысь Даниил Лютоев, поснияс пиысь Ариана Тарабукина да Нина Булышева. Сиктлысь ним пыр на дорйöны Пётр Попов да Наталья Кузнецова, кодъяс велöдчöны карын. Иван Егорович та вылын оз сувт, челядьлöн вермöмъяс ышöдöны кыпöдчыны вылiджык тшупöдöдз.
Галина НЕСТЕРОВА.
Гижысьлöн снимок вылын:
Н.В.Катаев челядькöд.