2017 вося декабр 13 лунö чукöртчылiс Помöсдiн сиктса общественнöй сöвет, волiс 25 морт. Помöсдiнсаясöс майшöдлö, мый 2018 вося январсянь вермасны тупкыны врач-офтальмологлысь да узи вöчан кабинетъяс, сы вöсна мый абу лицензия. Субöта-вöскресенньöö, кор оз уджавны ФАП-яс, тэрыб отсöг сетан юкöнын оз вöчавны антибиотик уколъяс, оз вежлавны дойяс вылысь кöртöдъяс. Сэнi уджалысьяс шуöны, мый тайö абу налöн мог, таысь оз вештысьны. Сёрнитöм бöрын мöдöдiсны республикаысь дзоньвидзалун кузя министр Д.Б.Березинлы да Госсöветса депутат В.А.Косовлы шыöдчöм, медым Помöсдiнса бурдöдчанiн уджалiс тырвыйö и водзö. 2018 вося март 4 лунö шуисны чукöртчывны выльысь да корлыны районса администрацияöн веськöдлысь С.В.Рубанöс, дзоньвидзалун кузя министр Д.Б.Березинöс, Кулöмдiнса шöр бурдöдчанiнысь медшöр врачöс. Сёрнитiсны сiдзжö аптекалöн стрöйбаысь бурдöдчанiнлöн лунся куйланiнö поликлиника вуджöдöм, офтальмологлысь да узи вöчан кабинетъяс лицензияöн могмöдöм, тэрыб отсöг сетан машинаяс дзоньталöм, акушеркалысь ставка кольöдöм, Дiасёръяса водительясöс рейсö петтöдз бурдöдысьöн видлалöм йылысь.
Дзоньвидзалун кузя министерствоысь воис татшöм вочакыв: «Врач-офтальмолог да узи вöчан кабинетъяс кутасны уджавны. /нi бырöдöны тырмытöмторъяс, кодъяс вылö, найöс видзöдлöм бöрын, индiс Росздравнадзор. Тэрыб отсöг сетысьяслы, кодъяс петавлöны йöзлöн корöм серти мортлöн чорыда доймöм ли висьöм дырйи, шойччан лунъясö вöчавны уколъяс да вежлавны дойяс вылысь кöртöдъяс абу урчитöма. Налы таысь оз вештысьны. 2018 вося январ 1 лунсянь Помöсдiнса бурдöдчанiнын пыртасны öдйö отсöг сетан юкöнлы кык ставка. Кутасны вöчавны уколъяс да вежлавны кöртöдъяс специалистъяс.
Сёрнитны кö аптекалöн стрöйбаысь бурдöдчанiнлöн лунся куйланiнö поликлиника вуджöдöм йылысь, то тадзи вöчны оз шогмы, сы вöсна мый аптекалöн стрöйба ыджда сертиыс оз лöсяв СанПинлöн корöмъяслы да лунся куйланiнлы лицензия оз сетны.
Медым чинтыны рöскодъяс, Помöсдiнса бурдöдчанiнын чинтасны штатъяс 5,25 единица вылö: 0,25 ставка автоклавнöйысь медсестралысь, 0,5 ставка грузъяс новлысь машиналöн водительлысь, 0,5 ставка ассенизаторскöй машиналöн водительлысь, 2 ставка санитарнöй машиналöн водительлысь, 1 ставка участокса врач-педиатрлысь, 0,25 ставка прививкаяс вöчалан кабинетса медсестралысь, 0,75 ставка физиокабинетса медсестралысь. Матö став ставка вылын некод эз уджав, найö вöлiны прöстöсь, ставка чинтöм инмис сöмын пенсия арлыда öти мортлы. Акушеркалöн ставка оз быр.
Помöсдiнса бурдöдчанiн тупкöм йылысь сёрни некöн некод эз кыпöдлы и оз мун.
Бурдöдчанiнлöн 2 машина, кыкнаныс уджалö, дзоньтавны оз ков.
Дiасёръяын кык водительöс рейсö петтöдз кутасны видлавны фельдшерско-акушерскöй пунктысь бурдöдысьяс».
Кыдзи эскöдiс районса администрацияöн веськöдлысьöс вежысь Н.А.Чаланова, Помöсдiнса олысьяслысь бурдöдчанiн кузя майшöдлан юалöмъяс районöн веськöдлысьяс кутöны асланыс видзöдлас улын.
Помöсдiн вож ыджыд. Сэнi олысьяслы бурдöдчанiнтöг некыдз. Гöгöрвоана, мый рöскодъяс чинтыны колö, но мед эськö йöзлöн олöм таысь эз лёкмы, быдöнлы отсалiсны ас кадö.
Лидия ЛИПИНА.