Шойччан лунö бöрйим сиктса овмöдчöминъяслöн сöветъясö депутатъясöс. Районса олысьяс, кыдзи и быд бöрйысьöмын, матыстчисны кывкутöмöн.
Донын бöрйысьöмъяссö нуöдiсны сиктса администрацияын. Квайт морта комиссия кöкъямыс час асыв кежлö вöлi тырвыйö дась вочаавны йöзöс. Кыкöн на пиысь, Михаил Александрович Шустиков да Светлана Александровна Тимушева, дасьтiсны урна, медым ветлыны гортöдзыс вермытöмъяс дорö. Татшöмыс 23 морт, сёрöнджык корлöмаöсь нöшта куим дорö.
— Миян ставыс 364 бöрйысьысь, — висьталiс комиссияöн веськöдлысь Раиса Ивановна Тимушева. — Эскам, мый некод оз ло веськодьöн, ставныс воласны сетны гöлöснысö колана кандидатъяс вöсна. Йöзсö водзвыв öлöдiм гортöдзныс ветлöмöн, сеталiм корана гижöдъяс.
Стöч кöкъямыс часын локтiс медводдза бöрйысьысь ? Раиса Семёновна Тимушева, сиктын водзмöстчысь морт. Висьталö, мый быд бöрйысьöм вылö локтö медводдзаяс лыдын: водзын — кыдз комиссияö пырысь да видзöдысь, öнi — кыдз бöрйысьысь.
-Миян öкмыс депутатпуысь колö бöрйыны сизимöс, — содтiс сiйö. — Ставныс зiль, мывкыд да туяна йöз. Сöветлöн выль бöрйöм котырлы сиа бура уджавны.
Вочасöн локталiсны гöлöсуйтны сиктса мукöд олысьяс. Вöлi котыртöма ярмарка: кировсаяс вузасисны кöм-пасьöн. Луншöр кадöдз волiс бöрйысьны волiс 111 морт, куим часöдз ? 157. Ставнас гöлöсуйтiс 197 морт, коланасьыс пöшти джынйыс.
Кыдзи шуис комиссияса председатель Р.И.Тимушева, мукöд воясын серти тайö бöрйысьöм вылö йöзыс волiс тöдчымöн этша. Помкаыс, гашкö, сыын, мый унаöн вотчöны на. Векжö бöрйысьöмъясыс танi колисны шыльыда, некутшöм мытшöдтöг.