Тавося декабр 3 лунö тырö 5 во республикаын билы паныд сулалан да йöзöс доръян службалысь управление котыртöмсянь. Артмигас вöлi 650 морт, а öнi службалöн 10 отрядын 44 часьт да 56 торъя пост, кöнi 1245 морт. Найö могмöдöны 351 сикт да посёлок, 155 сюрс мортöс. 2009 восянь, тайö восö босьтöмöн, кусöдöма 5,7 сюрс öзйылöм, дорйöма 356 мортöс, 428,2 миллион шайт дон эмбур, 79 сюрсысь унджыкысь петалöма йöзлы отсöгöн да с.в.
Вит воöн кыпалiс öнiя кадлы вочавидзысь 11 депо, дзоньталöма-выльмöдöма 72-öс, во помöдз эштöдасны нöшта 7 депо да дзоньталасны 15-öс. Тайö жö кадöн ньöбöма унапöлöс 109 автоцистерна, кусöдчан 5 да мукöдтор вöчан 29 машина. Ставыс талун 269 машина да мукöдпöлöс техника.
Управлениелöн эмöсь велöдан шöрин (велöдöма 25 сюрсысь унджык мортöс) да химико-радиологическöй лаборатория (примитöма 115 сюрс кымын ртутя лампа).
Висьталöны тайö службаын миян районса уджалысьяс:
Василий Лодыгин — 143 номера часьтса начальник:
-Вит воöн миян служба öтарö сöвмис. Миян часьтö локтiсны выль уджалысьяс, кодъяс лöсьыда сöльнитчисны котырö. Миян водзын сулалысь могъяс бура пöртсисны олöмö, сы вöсна мый ставöн велöдчöм йöз, уджалiгöн босьтiсны ыджыд сям. Ми ставсö вöчам öтвылысь, босьтам öта-мöдлысь бурторъяс.
Иван Туркин — Немдiнысь торъя постса водитель:
-Миян сиктын биысь доръян служба водзтi эз вöв да öзйылiгъясöн сотчылiс весиг некымын морт. Кор помалам вöчны депо да босьтчам удж бердö, йöз вермасны узьны майшасьтöг.
Борис Игнатов — Помöсдiнысь биысь доръян часьтса старшöй водитель:
-Бöръя вит воöн кык-коймöд пай вылö выльмис автопарк эз сöмын миян, но и мукöд часьтлöн. Öнi некод нин оз шу, мый кусöдчысь машинаяс локтiсны куш цистернаöн, öд сöмын медводдза номера корöм серти ми локтам кык автоцистернаöн, кöнi ваыс 15 тоннаöдз.
А со кыдзи кывкöртö управлениеса начальник Игорь Терентьев:
-Водзын гöгöрбок сöвмöм могысь ыджыд удж, и ми сiйöс бура пöртам олöмö. Аттьöала олöмö пöртысь власьтлöн органъясöн, котыръясöн веськöдлысьясöс, школаясса директоръясöс, кöнi ми восьтiм кадетъяслысь классъяс, и сiдзжö ассьыным уджалысьясöс уджнысö сьöлöмсянь вöчöмысь. Кута лача, мый тадзи жö бура кутам уджавны и водзö.
Билы паныд сулалан да йöзöс доръян службалöн
республикаса управление.
Снимок вылын: Немдiнса депо.