Тайö жö лунö «Июнь» вузасян-гажöдчан шöринын воссис «Войвывса донъясянтор» выставка, кöні позис тöдмасьны республикалöн шедöдöмторъясöн. Аслас киподтуйöн петкöдчис став муниципалитет, а сiдзжö шöр да гырысь котыръяс, вылыс тшупöда велöданінъяс, банкъяс да с.в. Районъяс водзын вöлі мог: ичöтик петкöдчанiнын тыдöдны ставсö, мыйöн озырöсь, мыйöн кыпалöны, мыйöн олöны. Изьва район вайöма кöр куысь вöчöмторъяс – пимияс, тяпияс, налöн жö киподтуя йöз велöдісны вöлавны пу пань, кыны бадь ньöрйысь дозмук. Финн-йöгра этнопаркын уджалысьяс велöдісны вöчавны дöраторйысь, идзасысь аканьясöс, шегъясьны да с.в. Чилимдінсаяс номсöдлісны чими чериöн. Княжпогост район вайліс весиг ловъя кöзаöс. Миян район петкöдлiс брус, тьöс-плака, евровагонка, блок-хаус, пеллетъяс да ломтысян брикетъяс, тротуар вöчан плитка да уна мукöдтор. Позис нимкодясьны пуысь да сюмöдысь вöчöмторъясöн, кыöм да вурöмторъясöн. Вöліны и мупытшса озырлунъ-яс – стрöитчан из, доломит да с.в. Фотографияяс вылын – районлöн мичаинъяс, нималана йöз. Кызвын матыстчылысьлы лоис дзик выльторйöн, мый няйтöн бурдöдчöм могысь оз ков мунны кытчöкö лунвылö да видзны уна сьöм – Дон тыысь нюйт нинöмöн абу лёкджык. Уналысь синнысö кыскисны А.Наумиклöн вöчöмторъяс. Тайö и аканьяслы керка, и Эйфельлöн прöшви кодь башня, и шкатулка. Асшöр уджалысь вайис станок, йöзлöн синъяс водзын вöчис районлысь пас – урöс. Эз кольны некодöс веськодьöн Н.Зубколöн пöжасъяс, видз-му овмöс кооперативъяслöн йöла вöлöга. Йöз чöсмасисны да нюлісны чуньпомъяснысö. Бöрвылыс нин матыстчылісны гозъя, сёян-юанысь матö нинöм нин эз коль, сöмын нянь да вый. Ань мавтыштіс выйсö нянь вылö, видліс да паськаліс синмыс, кутіс тойлыны верöсыслы бокас: видлы пö, кутшöм чöскыд! Ме кытшовтi выставкасö дзоньнас да ошйысьтöг шуа: медуна йöз бергалісны Кулöмдін районлöн петкöдчанінын.
Август 21 лунö гаж петіс юркарса уличаяс вылö. Коммунистическöй улича кузя мунісны кар-районъяс петкöдлысьяс. Гажсö да долыдлунсö содтісны гудöкъяс. Ас гудöкасьысь вöлі и Кулöмдін районлöн: Бадьёльйылысь петлöм, öні карын олысь Е.В.Уляшева муніс ас районкöд. Мунысьяс сувтыштлісны музтеатрса изэрд весьтö, найöс чолöмаліс республикаса правительствоöн веськöдлысьöс вежысь Т.Николаева, вочаалісны кар-районъясöн веськöдлысьяс. Муниципалитетъясысь пыдди пуктана йöз тэчисны республикалысь карта. Кулöмдін районöс карта вылö пуктіс Госсöветса депутат Д.Шатохин. Та бöрын йöз лэччисны Степан изэрд вылö, кöні муніс «Шондiбан» гаж. Быд кар-районлöн вöлі аслас «йöр», кöні бара коліс петкöдлыны районлысь чужöмбан. Кулöмдін районöс петкöдлісны пуысь-сюмöдысь вöчасьысьяс, «Купеч Митрей керкаöн» петкöдчис В.Павлов. Унаöн матыстчылісны снимайтчыны ошлöн да вöрса порсьлöн юръяс дорö, видзöдлыны да кывзыштны важ патефон. «Йöрö» пыралысьясöс вочаалісны «Пожöг» овмöдчöминсаяс. Дерт жö, вöлі мыйöн чöсмöдлыны волысьясöс: чöскыд пöжасöн, вотöсöн, лязйöн.
Степан изэрд вылын быд кар-район петкöдліс ассьыс енби: миянлысь районöс нимöдісны «Июль», «Эжваса дзоридзьяс», «Фантазия», «Родничок» котыръяс, висьталісны районлöн сизим шензьöдантор йылысь.
Муниципалитетъяслысь «йöръяс» донъяліс жюри. Кулöмдін районöс шуисны медбурöн коми сёян-юан дасьтöмысь.
Рытнас республикаса стадион вылын муніс «Войвывлöн пöртмасьöм» гаж, кöні сьылöм-йöктöмöн петкöдлісны Коми мулысь олöм. Талун Коми республика – уна национальносьта йöзлöн чужан му, коді быдöнлы лоö тöждысьысь мамöн. Петкöдчöмын гöрд визьöн муніс «Водзö, сё во пасйöмлань» мöвп. Кутшöмöн лоас аскиа лун – сöмын ас саяным.
Лидия ЛИПИНА.
Снимокъяс Лидия Липиналöн да Екатерина Битнерлöн.