admin

Локтiсны томъяс 

Июньын пытшкöсса делöяс кузя министерстволöн районса юкöнын уджö босьтчис кык том морт. Носимысь Василий Петрович Гилев лöнь олöм вöсна кутас тöждысьны «Зимстан», «Улыс Воч» да «Дзоль», Скöрöдумысь Денис Дмитриевич Липин — «Дiасёръя» да «Вöльдiн» овмöдчöминъясын. Кыкнанныс помалiсны Сыктывкарса университетлысь спорт да физкультура кузя факультет, служитiсны армияын. 
Василий Петрович (снимок вылын) кык во велöдiс Донса школаын. Тшöтш и Паспомса спортзалын Носимса да Паспомса челядьöс велöдiс ворсны волейболысь, спортö ышöдiс и йöзöс да накöд петкöдчис ордйысьöмъясын. Донын школа лоис нёль классаöн да том морт вуджис Кулöмдiнса школаö, кöнi велöдiс во. Полицияын уджавны ышöдiс Озъяг да Кебанъёль участокъясса уполномоченнöй Артём Александрович Напалков ёртыс. Ыджыдджык Павел вокыс уджавлiс милицияын да школаын велöдчигöн на мöвпалiс лоны милиционерöн, шуис видлыны. Кольöм воын тöдмасис уполномоченнöйлöн уджöн. Туйдiс да отсалiс ёртыс, велöдiс быдторйö. Василий Петрович петкöдлiс асьсö бура да ыстiсны пытшкöсса делöяс кузя министерстволöн велöдан шöринö. Сэнi велöдчигöн кык вежон уджыштiс Зимстанын. Сылы отсалiс Керчомъяса уполномоченнöйлы отсасьысь А.С.Касев. 
— Зимстанса юралысь В.Н.Лодыгин могмöдiс оланiнöн, тöдмöдiс йöзкöд, посёлокын олöмкöд. Зимстанö и индiсны велöдчöм бöрын. Сетiсны машина, «Зимстан» овмöдчöминлöн администрацияын эм уджалан жыр, телефон, компьютер да сы дорö став коланаыс. Кута ветлыны Дзолльö и Габовö, Улыс да Вылыс Вочьясö. Климовскын да Фроловскын ме вöлi нин А.С.Касевкöд, кытшовтiм öружие видзысьясöс. Ылi пельöсын лöнь, сöстöм да мича вöр-ва. Меным отсасьöны ыджыд сяма уполномоченнöйяс. Эска, ставыс лоас бур, — сёрнитiс В.П.Гилев. 
Ёнджык звöнитöны гусясьöм либö тышкасьöм бöрын войын да код юрöн. Босьтчö туясьны, но морт оз сюр. Мöд лунас бара петö туйö, но палялöм морт соссьö, висьталö, мый нинöм эз вош. Нöйтöм кузя Василий Петрович шыöдчö бурдöдчанiнö, юасьö, волiс-ö отсöгла доймöм морт. Юасьö и дежуритан юкöнö юöртысьлысь, и доймалысьлысь да аддзылысьяслысь. Абу кö сьöкыд мыж, административнöй кывкутöмö кыскö ачыс. 
Водзö ёртасьö спорткöд. Пырö полицияса уджалысьяслöн волейболысь ворсан котырö, кодi петкöдчö уджалан котыръяскостса ордйысьöмын. Июль 13-öд лунö налöн котыр петкöдчас районъяскостса ордйысьöмын, кодi мунас полицияса спортзалын. Апрельын юкöнсянь Д.Д.Липинкöд ветлiс юркарö варччöм кузя ордйысьöм вылö. 
— Нимкодь, мый сьöкыд да кывкутан удж бöрйисны да локтiсны томъяс. Миян юкöнын 10 уполномоченнöй, 5 старшöй уполномоченнöй да уполномоченнöйлы кык отсасьысь. Лöнь олöм вöсна миян öти морт тöждысьö Улыс Новгородын футбол кузя мирса ордйысьöмъяс дырйи, кодъяскö шойччöны, да öнi районын уджалö сöмын квайт уполномоченнöй. Колö нöшта вит. Виччысям томъясöс, — кывкöртiс пытшкöсса делöяс министерстволöн районса юкöнын участокса уполномоченнöй да тыр арлыдтöмъяслöн делöяс кузя юкöнöн веськöдлысь А.Ф.Гуляев.
Читать далее

Удж тöдöмöн 

Гижышта орччöн олысь Василий Иванович Логинов йылысь. Сiйö чужлiс 1931 вося август 19 лунö. Олöмыс эз вöв кокниöн. Эз на тыр вит арöс, кувсис батьыс: медводдза мирöвöй война вылын сюрöм дойясысь нэмыс лоис дженьыд. Дас арöсöн пансис Великöй Отечественнöй война. Вермис велöдчыны сöмын куим класс. Войналöн медводдза гожöмнас нин верстьöкöд тшöтш пуктiс колхозлы турун. Сэнi вердiсны рокöн, а гортас олiсны тшыг нисьö пöтöн. Видзлiсны мöскöс, но сiйöс косявлiс ош. Семьяын быдмысь кык воклы сiдз шусяна иждивенческöй карточка, код вылö позис босьтны сöмын 200 грамм нянь, эз сетны. Пöжавлiсны нянь вартöм бöрын кольöм жуг. Кынöм тырлiс, но пöтöслун эз шедлы. 
Тöвнас нывбабаяскöд тшöтш пöрöдiс вöр, вöлöн ваялiс пес. Вöлi ляпкыдик да сийöсавны эз судз, отсавлiсны верстьö. 
Колхозын уджалiс 1950 воöдз. Во мысти помалiс курсъяс да босьтчис уджавны леспромхозын трактористöн. Пуксьылiс весиг пескöн ломтысьысь КТ-12 вылö. 1954 воын босьтiсны армияö. Веськалiс Архангельск обласьтса Немеихаö. Кöть лыддьысис Беломорскöй флотын служитысьöн, но сiдзжö заптiс вöр. 
Армияысь воöм бöрын бöр пырис уджавны леспромхозö. Сэки Комиö, тшöтш и Кулöмдiн районö, мöдöдлiсны мыжтöг мыждöмъясöс. Найö овлiсны нимтöм посёлокъясын, кодъяс лыдын вöлiны 21-öд километр, 28-öд километр. Василий новлiс сэтчö тракторöн сiдз шусяна щитöвöй керкаяс. 
Кужйысь некытчö эз мун: чужан сиктас кыпöдлiс кык керка. Öнi сэтчöдз вайöдiс ва. 
Гöтырыскöд быдтiсны квайт челядьöс — вит нылöс да öти пиöс. Пиныс быдмис бать-мамлы нимкодясьöм вылö, вöлi зэв зiльöн, Визинын кыпöдiс рöдвуж отсöгöн кык судта керка, пытшкöссö ставнас вöчис ачыс, но нэмыс вöлöма дженьыд. 
Öти ныв олö Визинын жö, мöд Интаын, куимöн Кебанъёльынöсь. Век волывлöны гортас, отсасьöны пöрысьмöм батьлы. 
Арлыд вылö видзöдтöг, Василий Иванович öтырышъя мыйкö вöчö, и векджык ывлаын: то потшсьö, то кыпöдö гожся пусянiн. Зэв дыр яй да чери вöчлiс аслас тшынöданiнын. Сы дорö волывлiсны матö ставöн: кодлыкö тшынöдлiс гос, кодлыкö чери. 
Василий Иванович лыддьö газетъяс, видзöдö телевизор. Но ёна висьöны кокъясыс — кутшöм нö кöм вöлi война кадö да сы бöрын? Ёна кынмавлiс вöрын уджалiгöн. Оз отсавны весиг медся дона мазьяс. Василий Иванович тшöкыда казьтылö война кадö да сы бöрын тшыг олöм: лавкаяс кушöсь, нинöм он вермы ньöбны весиг сьöм вылö. Сиктын эськö вöлi вердчанiн, но Василий мамыскöд волiсны удж вылысь сёрöнкодь, да сэнi вöлi куш нин. 
1947-öд воын Кулöмдiнын кутiсны вузавны коммерческöй нянь. Овлiс, мый мамыс мунлiс öкмыс километра подöн да вайлiс няньсö дзонь мешöк тыр. И сöмын 1950 воын лавка джаджъяс вылын лоис сёян-юан. 
Ольга Маркова. 
Куж. 
Снимок вылын: Василий Иванович Логинов.
Читать далее

«Парма горлы» козин 

2018 воын тырис 80 во Коми республикаса Государственнöй Сöветлы да 100 во Коми печатьлы. Тайö тöдчана пасъянторъяскöд йитöдын Госсöветса депутатъяс вöчисны районса газетъяслы ыджыд козин: быд редакциялы вичмöдiсны ноутбук да принтер. 
«Парма гор» газетлы козин вайис Кулöмдiн районсянь Госсöветса депутат, Госсöветöн юрнуöдысьöс вежысь Владимир Алексеевич Косов. Сiйö чолöмалiс редакцияса уджалысьясöс тшупöда пасöн, сиис газетлы бур лыддьысьысьясöс да уджын ыджыд вермöмъяс: 
— «Парма горын» петöны районын олысь да уджалысь бур йöз, тöдчана лоöмторъяс, а сiдзжö районса олысьясöс майшöдланторъяс йылысь гижöдъяс. Нимкодь, мый газет оз лэдзчысь «сьöд» юöръясöдз, а петкöдлö бурсö, ышöдö йöзöс, эскöдö, мый и сикт-грездын, кöсъян кö, олöмыс мукöдлаын дорысь абу лёкджык. 
Газетса главнöй редактор Лидия Липина аттьöалiс В.Косовöс да Госсöветса депутатъясöс козинысь — оргтехника редакциялöн уджын век колана. 
Лидия Липина. 
Снимок Марина Дадашовалöн.
Читать далее

Гажöдiсны  и «Мича аньяс» 

Выльгортысь «Мича аньяс» сьылан котыр ветлiс Сыктыв районса Куратовö «Менам муза» гаж вылö. 
Сиисны сiйöс ыджыд коми гижысь И.А.Куратовлöн чужöмсянь 149 во тырöмлы. Сылöн керка-музейын чукöрмылiс уна йöз. Волiсны весиг удмуртъяс, финнъяс, мукöд вужвойтыр, гижысьяслöн республикаса котырö пырысьяс, гудöкасьысьяс да

Читать далее

Дзоньталiсны  став сиктöн 

Носимын дзоньталiсны война вылын усьöмъяслы казьтылан пас. 
Лöсьöдiсны цемента подув, вöчисны кöрт потшöс, сувтöдiсны пызан да лабичьяс, ставсö мавтiсны. Вöчасисны «Кулöмдiн» овмöдчöминлöн администрацияса уджалысьяс, Носимса олöмаяс да томулов. Матö 40 сюрс шайт вичмöдiс администрация, лыа да из сорас вайисны асьныс

Читать далее

Свежий выпуск: 28 марта

Осторожно — мошенники!