Ас му вылын ас кывйöн

[ A+ ] /[ A- ]

Ноябр 4-öд лунö Пожöгын нёльöдысь мунiс «Пожöг» администрацияувса сиктъясысь да посёлокъясысь творческöй котыръяслöн «Коми кыв дiнö муслунöн» коми кывъя фестиваль. Вöлiны сьылысь-йöктысьяс, кывбур тэчысьяс да лыддьысьяс, петкöдчанторъясын ворсысьяс Вылыс да Улыс Ярашъюысь, Великопольеысь, Пожöгдiнысь, Кекурысь, Пожöгысь ― ставыс 80 кымын морт. Мича паськöмöн öти бöрся мöд петавлiсны Пожöгса культура керкалöн сцена вылö петкöдлыны ассьыныс сям.
Тöдчис, мый местаяс вылын дасьтысьöмаöсь ыджыд кывкутöмöн. Кутшöмсюрö котыръяс, кыдзи Пожöгысь «Зарни куд», Вылыс Ярашъюысь «Йöлöга» да Пожöгдiнысь «Зарань», сьылiсны весиг кык гöлöсöн. Быд котырса петкöдчысь вöлi мича паськöма. Медыджыд тöждлун ас вылас, кыдзи и колö, дерт, босьтiс Пожöгса культура керка. Сценарий гижис татысь художественнöй веськöдлысь Екатерина Алексеевна Уляшева, став котырыскöд нуöдiс репетицияяс, велöдiс сьывны, ворсiс налы баянöн культура керкаса директор Михаил Евлогиевич Шахов. Бöръяыс меным шуис:
— Фестиваль йылысь гижöдын пасйöй эн сöмын миянöс, а ошкöй став котырсö да наöн веськöдлысьясöс. Зэв ёна зiлисны, весиг асьныс корсьлiсны машина да волiсны Пожöгö репетицияяс вылö. «Ог»-сö некодлысь эг кывлы.
Дженьыдика фестивальыслöн мунанног йылысь. Сценарий серти сьылысь-йöктысьяс вочасöн локтiсны öти керкаса кöзяйка да олысь дорö. (Ме серти кö, олысь пыдди лöсялöджык кöзяин, но шуисны, мый айлов эз сюр, культура олöмысь найö ылынöсь. Збыльысь тадзи и эм: сöмын öти котырын вöлi зон да петкöдчисны начальнöй класса зонкаяс. Сiдз кö нин шуны, тайö «висьöмыс» абу сöмын Пожöг вожлöн, а став районлöн). Сьылöм-йöктöм ли кывбуръяс висьталöм бöрын найöс ошкылiсны ас керкаö лэдзысьяс да колльöдлiсны, мед примитны мукöдъясöс. Татшöм мунанногыс вöлi кутшöмкö «Василей» вылын да, веськыда кö шуны, абу выльтор, но велöдчыны абу лёк, коркö да мöвпыштасны дзик ассьыныс.
Быть колö ошкыны челядьöс, весиг вель на ичöтъясöс, творчествоö пыртöмысь. Колö шуны, мый буретш найö, а стöчджыка кö, Пожöгса культура керкаысь «Задоринка» котырса челядь, «Паськыд, гажа улича» сьыланкывйöн петкöдчöмöн (сьылiсны и йöктiсны), восьтiсны фестивальсö. Сöмын челядьöс ышöдöмöн да велöдöмöн водзö лоö ловъя асланым коми енби, збыльысь челядь миян аскиа лунным, миян ловным, миян оласногным.
Челядьöс ошкöмöн, ошкам и школаясöн веськöдлысьясöс, мый казялöны енбиа челядьöс да отсалöны сöвмыны налы творчество боксянь. Пожöг вож водзтi нимавлiс том гижысьясöн. Мед эськö сцена вылö петалысь зонкаяс да нывкаяс водзö вылö лыддисны ассьыныс сьöлöм петасъяс, а эз сöмын тöдса нин поэтъяслысь кывбуръяс.
Ошкам сьылысь котыръясö öтувтчöм верстьö йöзöс, кодъяслöн кыпыд лов, аддзöны кад ветлыны репетицияяс вылö, а сэсся петкöдчыны йöз водзын. Висьталiсны, мый фестиваль вылын петкöдчысь котыръяслöн да сэнi петкöдчысьяслöн лыд воысь воö содö. Тавося фестиваль вылын медводдзаысь петкöдчисы великопольесаяс, кодъяс öтувтчöмаöсь «Катшасинъяс» котырö.
— Окотитысьыс нöшта на унджык, да ог вермöй сибöдны фестиваль вылö. Öти-кö, налы сямлунсö на колö содтыны. Мöд-кö, вывтi уна сьылöмöн да ворсöмöн, фестивальыс дыр кыссьö, видзöдысьяс мудзöны, — шуис та кузя М.Е.Шахов.
Ме думысь, эм кö нин мыйтакö сямныс, колö лэдзны. Тайö гажöдчöмыс öд абу районлöн ли республикалöн тшупöда, кöнi колö «дзирдыштны», а ас вожлöн. Кöн сэсся йöз водзö петкöдчыласны, оз кö гортын? Тайö фестивальыс, кöть вöлi 27 номер, эз мудзты, а öтырышъя ыззьöдiс: пожöгсаяс тадзи сьылiсны, а кыдзи петкöдчасны великопольесаяс, кекурсаяс, мукöдъяс? И зэв артмис морт ногсöн, мый сиктса юралысь Василий Иванович Сенькин (талун вöвлöм нин), фестивальлы кывкöртöд вöчигöн, аддзис бур кывъяс да сетiс грамота став котырыслы.
Сцена вылö кайлiсны и фестивальлы сьöмöн да мукöдторйöн отсалысьяс Агния Михайловна Шахова да Алёна Павлиновна Напалкова, шуисны, мый кутасны отсавны и водзö. А.П.Напалкова весиг шуис, мый асланыс гаж весиг кыпыдджык «Василейысь». Гашкö, вывтiасисджык, но мый фельстивальлöн «бордыс» воысь воö ёнмö да паськалö, тайö збыль, и предпринимательясöс налöн отсöгысь колö сöмын ошкыны. Содтам, мый отсалiсны сiдзжö Мария Николаевна Уляшева да Василий Евгеньевич Лажанёв. И, дерт жö, сиктса администрация.
Ыджыд бур вöчис и Кекурын чужлöм, öнi Ухтаын олысь Анна Дмитриевна Зубехина, кыöмторъясöн да серпасъясöн мичмöдiс культура керкалысь пытшсö, кайлiс сцена вылö да лыддис ассьыс кывбуръяс. Сiйö оз вунöд чужанiнсö, век волö ыджыд гажъяс вылö.
Пасъя сiдзжö Кекурысь Лия Серафимовна Мартюшеваöс, кодi тöдмöдiс аслас кывбуръясöн. Сiйö ёртасьö и миян газеткöд. Пожöг вожын эмöсь мукöд гижысьяс, но мыйлакö гаж вылын эз тыдавны.
Казьтыштiсны, мый отсалiс и Надежда Константиновна Зайкова, вурис «Задоринкалы» сцена вылын петкöдчан паськöм.
Йöз водзö петалöмöн, фестиваль йылысь кыв шуисны «Коми котырлöн» районса представительствоöн да районса бибилиотекаяслöн котырöн веськöдлысь Галина Егоровна Пашнина да районысь культура юкöнса специалист Ольга Андреевна Васильева. Г.Е.Пашнина: «Ёна бур, мый Пожöг вожын коми кыв да коми оласног оз сöмын кыдзикö кутчысьны, а сöвмöны. Ас лолöн бордъяöн кыпалöны и удж вылö, луныс йöзыслы мича». О.А.Васильева: «Чуйми, мый Пожöгын вöлi татшöм кыпыд фестиваль да мунiс нöльöдысь нин. Мед жö сiйö кыпыд бордъяöн лоö и водзö».
Шуа некымын кыв ассянь. Дерт жö бур, мый Пожöг вожлöн эм аслас оласног ловзьöдан-кыпöдан медшöр гаж, кыдзи, шуам, Керчомъялöн «Пыжа гаж», Носимлöн «Троича», Дереваннöйлöн «Иван лун», Ручлöн «Илья лун», Помöсдiнлöн «Ва берд». Менам чайтöм серти, медшöр гаж котыртöм вынъяс серти Аныбысь Иван Васильевич Нестеровлы, Зимстанса выль юралысь Владимир Николаевич Лодыгинлы, Немдiнса юралысь Анатолий Васильевич Пименовлы, мукöдлы. Сöмын колö босьтны ас вылö кывкутöм да уджавны и уджавны. Кыдзи ме гöгöрвоа, татшöм гажъясыс ― абу ас «рок» пуöм, а ас оласногöн кутчысьöм, мый помысь и ловъяöсь ми ― комияс. Пасъя, мый зэв лöсялö праздниклы и фестивальлöн «Коми кыв дiнö муслунöн» нимыс. Кыдзи шулiс миян ыджыд гижысь Тима Вень, «сэтчö пуктöма мый меддонаыс». Ловъя кыв ― ловъяöсь и ми. Сöвмы да водзö кыпöд ловсö бур йöзлысь, Пожöгса фестиваль! Аттьö тiянлы, сiйöс котыртысьяс да нуöдысьяс.
Василий ЛОДЫГИН.
Авторлöн снимок вылын: Великопольеысь медводдзаысь петкöдчысь «Катшасинъяс» котыр.

Комментарии:

Добавить комментарий

Свежий выпуск: 28 марта

Осторожно — мошенники!