Анастасия Алексеевна Лютоева чужис 1928 воын Вылыс Вочын. Быдмис ыджыд семьяын.

[ A+ ] /[ A- ]

 

Вокъясыс да мамыс кулiсны водз. Колисны вит чой, Настя вöлi медся ичöтöн. Помалiс сöмын 4 класс. Уджалiс «Молотов» колхозын. 1986 воын вуджис овны Кулöмдiнö кык куканьöн да мöскöн, 11 ыжöн. Совхозлöн фермаын видзöдiс верöсыскöд скöт бöрся войнас. Фёдор Васильевич абу нин 20 сайö во. Аньлöн кык челядь, внук, внучка, кык правнук да кык правнучка. Во квайт нин ветлöдлö тöвйыны Алёна внучка дорас Сыктывкарö. Сылöн висьталöм серти, карын овны лöсьыдджык: ва локтö, пач ломтыны оз ков. Но кыдзи босьтчö сывны лым, сьöлöмыс кыскö Кулöмдiнö, кöнi пуктö картупель, лук да мукöдтор. Отсалöны Зина да Тамара нывъёртъясыс. 
Алёна внучкаыс висьталiс: 
— Вочысь Кулöмдiнö ыджыд мам вуджис менам мамлöн верöс сайö петöм бöрын. Дзолядырся олöмöс казьтылiгöн пыр воö юрö, кыдзи ме новлi сыöн кыöм кепысь да носки. Водзтi ёна кысис, но син вылас операция вöчöм бöрын ковмис дугöдчыны. Во 10 сайын ёна на вотчис. Öнi ёна радейтö видзöдны телевизор. Карса олöмын сылы уна тешкодьтор. Шуам, кор звöнитöны домофон вылö, ёна чуймалö, кыдзи воссьö öдзöс. Пыр виччысьö менö пажнайтны, сiйö полö öзтыны биару. Унатор висьтавлö воддза олöм йылысь: кыдзи, шуам, сёйлiсны кача нянь, кодысь дундывлiс кынöм. Висьталö ставсö комиöн, рочöн оз куж. Алёна сэсся вуджöдö челядьыслы. Сылöн эмöсь «Тылса уджалысь» да «Уджвывса ветеран» пасъяс. 
Анастасия Алексеевналы январ 8 лунö тырис 90 арöс. Чолöмавны волiсны олöмаяслöн районса котырöн веськöдлысь Г.А.Кравченко, районса администрацияöн веськöдлысьöс вежысь Н.А.Левченко, «Кулöмдiн» овмöдчöминса администрацияöн веськöдлысь В.П.Игнатов, олöмаяслöн Кулöмдiнса котырöн веськöдлысь В.П.Нестеренко. Сиисны ён дзоньвидзалун да сетiсны президент В.В.Путинсянь чолöмалан гижöд да козин. Уна шоныд кыв висьталiсны и рöдвужыс да ёртъясыс. 
Гижöд да снимок Галина КЛЮЖЕВАЛÖН. 

Комментарии:

Добавить комментарий

Свежий выпуск: 28 марта

Осторожно — мошенники!