Март мöдöд лунö Кулöмдiнысь Алексей Дмитриевич Мишаринлы тырис 90 арöс. Юбилей пасйысьöс волiсны нимöдны районса администрацияöн веськöдлысьöс вежысь Н.А.Левченко, ветеранъяслöн райсöветса юралысь Г.А.Кравченко, Кулöмдiнса администрацияöн веськöдлысь С.В.Рубан да мукöд. Наталья Анатольевна пöся чолöмалiс олöма мортöс да сетiс Россияса президент В.В.Путинлысь чолöмалана гижöд, кöнi пасйöма: «Ми пыдди пуктам тiянлысь, геройяслысь да вермысьяслысь, поколение, кодi вуджöдiс Великöй Отечественнöй войналысь сьöкыдлунъяс, быдöн пуктiс ассьыс пай öтувъя вермöмö…»
Алексей Дмитриевич вуджис збыльысь сьöкыд олöм. Нёль класс помалöм бöрын дас арöссянь уджалiс колхозын: тöлын кыскалiс вöр, тулысын пуръясис. Быд уджын вöлi медводдзаяс лыдын. Война пансигöн сiйö комсомольскöй путёвка серти уджалiс Печораын. Эз кольччы ас тшöтшъяясысь, вöзйысис фронт вылö. Арлыдыс эз тырмы да содтыштiс, мед босьтiсны ыджыд могöн лыддис дорйыны вöрöгъясысь Айму. Повтöг тышкасис Ленинградскöй да Украинскöй фронтъяс вылын. Вöлiс сапёрöн, разведчикöн, танкистöн. Куимысь доймылiс, öтчыд контузитчис. Кыкысь мойвиис петкöдчыны ыджыд вермöмлöн парад вылын. Медводдзаысь 1944 воын Чехословакияын, сэтысь немечьяслысь штаб пасьвартöм да найöс зырöм бöрын. Мöдысь Победа тырвыйö шöдöдöм бöрын, 1945 вося май 9 лунö Москваын. Гортас бергöдчис сöмын 1947 воын морöс тыр пасъясöн. Повтöмлунысь сетiсны Гöрд Звезда орден, «За освобождение Праги», «За отвагу» да мукöд медальяс. Уна во уджалiс «Выльног» колхозын кузнечöн да трактористöн. Пыр кежлö лöсялiсны война вылын босьтöм профессияяс. Пенсия водзын 14 во уджалiс райпотребсоюзын: новлöдлiс сёян-юан Дзолльö, Вочö, Канаваö тракторöн, ытва дырйи ? пыжöн. Уна вося бур уджысь вичмöдiсны «Уджвывса ветеран» медаль, РСФСР-лöн Сöветскöй потребкооперацияса отличниклысь ним. Гöтырыскöд кок йылö сувтöдiсны, велöдiсны да петкöдiсны олöмö öкмыс челядьöс. Талун Алексей Дмитриевичлöн 24 внук-внучка да 17 правнук-правнучка, кодъяс кытшалöны шоныдлунöн да ыджыд тöждлунöн.
Гöсьтъяс да матыссаяс висьталiсны Алексей Дмитриевичлы чолöмалана пöсь кывъяс, вичмöдiсны козинъяс, сиисны ён дзоньвидзалун, овны на сё арöсöдз.