Афганистанса би улын

[ A+ ] /[ A- ]

Афганистанса война мунiс матö 10 во. Тайö странаас миян салдатъяс пырисны 1979 вося декабр витöд лунö, а петiсны 1988 вося май 15 лунсянь 1989 февраль 15-öд лунöдз. Воштöмъяс лоисны ыджыдöсь: усис 14 сюрс, доймалiс 50 сюрс, лоис вермытöмöн 400 сюрс, юöртöг вошис да веськавлiс пленö 300 сайö салдат. Асьныс афганечьяс воштiсны миллион гöгöр салдатöс.
Великöй Отечественнöй война бöрын тайö мöд ыджыд тыш, кöнi юрсö пуктiсны зэв унаöн да найöс öткодялöны Великöй Отечественнöй войнавывса салдатъяскöд. Районысь тайö тыш вылö ветлiс 144 морт, сöмын Пожöг вожысь 11. Ставныс бергöдчисны ловйöн.
Иван Васильевич Шахов чужис Шахсиктын. 1980-öд воын Пожöгса школаын помалiс 8 класс. Афганистанын вöлi 1984 восянь 1986-öдз. Сержант, вичмöдiсны «Отличник Советской Армии» пас.
Олег Станиславович Курочкин чужис Пожöгдiнын. 1983 воын помалiс 10 класс да велöдчис водительö. Армияö босьтiсны 1984 вося апрель 28 лунö. Афганистанын служитiс 1985-1986 воясын. Вöлi миномётчикöн. Пасйисны «За отличие в охране государственной границы СССР» медальöн. Армия бöрын водителялiс совхозын, а сэсся Салехардын велöдчис егерö да вуджис Сыктывкарö.
Михаил Алексеевич Ефремов чужис Ярашъюын. Помалiс 10 класс. 1979 воын служитны веськалiс сынöдса десант войскалöн Витебскса 301 дивизиялöн 350-öд полкö. Декабрын дивизиясö кыпöдiсны да лэбöдiсны Кабулö, мед душманъяслöн вуджöмысь видзны лунвывса республикаяс. Вöлi водительöн, старшöй механикöн. Лэдзисны гортас 1981 вося апрель 13 лунö. Пасйисны «За боевые заслуги», «За отвагу», «Воину-интернационалисту от благодарного афганского народа», «20 лет вывода советских войск из Афганистана» медальясöн. Армия бöрын велöдчис В.В.Куйбышев нима Архангельскса лесотехническöй институтын, кöнi вöлi военнöй кафедра. Запасса лейтенант.
Пантелеймон Федотович Мингалёв чужис Кекурын. 1981 воын школа помалöм бöрын велöдчис трактористö да уджалiс ПМК-ын. Афганистанын вöлi 1982-1984 воясын. Сылы вичмöдiсны медводдза да мöд тшупöда «Отличник погранвойск», «Старший погранотряда», «Отличник Советской Армии» пасъяс. Армия бöрын велöдчис му писькöдысьö да уджалiс Усинскын. Олö Сочиын.
Дмитрий Михайлович Сенькин чужис Вомынбöжын. 1973 воын Пожöгса школаын помалiс 8 класс. Афганистанын служитiс 1979-1981 воясын. Вöлi мина лыйлан да артиллерияса часьтъясын корсьысьысьöн. Пасйöма «Воину-интернационалисту от благодарного афганского народа», «70 лет Вооружённых Сил СССР», «20 лет вывода советских войск из Афганистана» медальясöн.
Владимир Валерианович Шомысов чужис Ярашъюын. Армияын служитiс 1986-1988 воясын, Афганистанын вöлi 1987 вося май 17 лунсянь 1988 вося июль 18 лунöдз. Ашхабадын квайт тöлысь велöдчис миномётöн лыйсьысьяслöн командирö, сы бöрын нуисны Афганистанса Файзабад карö, кысянь ыстiсны Кишмиши карö. Вöлi десантникъяслöн 250-öд батальонын миномётлöн расчётса командирöн, а сiдзжö взводса командирöс вежысьöн. Афганистанысь петöм бöрын 1988 вося сентябрсянь декабр 20 лунöдз служитiс Забайкальеса военнöй кытшын взводса командирöс вежысьöн. Сiйöс пасйисны «За боевые заслуги», «За отвагу», «Воину-интернационалисту от благодарного афганского народа», «20 лет вывода советских войск из Афганистана» медальясöн.
Михаил Дмитриевич Шахов чужис Пожöгын, олiс Ярашъюын. Школа бöрын Кебанъёльса училищеын велöдчис мотористö. Армияö мунiс 1979 вося октябрын. Афганистанын вöлi 1980 вося январсянь 1982 вося январöдз. Водителялiс. Сетiсны медводдза да мöд тшупöда «Отличник погранвойск», «Старший пограннаряда» пасъяс.
Ог вунöдöй и найöс, кодъяс мунiсны нин олöмысь. Юрий Васильевич Мартюшев чужис Великопольеын. 1983 воын Пожöгса шöр школаын помалiс 10 класс. 1984-1986 воясын душманъяскöд водзсасигöн ёна доймалiс кыкысь, миналöн торъяс веськалiсны кокас. Армияысь локтiс ефрейторöн. Велöдчис Сыктывкарса видз-му овмöс техникумын механикö да удж котыртысьö.
Николай Александрович Шахов чужис Ярашъюын. 1983 воын школа помалöм бöрын пырис Вяткаса видз-му овмöс институтлöн инженерö да механикö велöдан факультетö. 1984 вося октябрын босьтiсны армияö да тöвнас нуисны Афганистанö, индiсны юкöнса командирöн. Вöлi Афганистанлöн асыв-войвылын Пакистанкöд орчча Кундуз карын. Петкöдчис уна тышын, кывкутiс сы вöсна, мед автоколонна пыр вöлi дасьöн, дзоньталiс техника. Служитöмсö донъялiсны «Отличник Советской Армии» пасöн.
Пётр Егорович Шахов чужис Кекурын. 1981 воын Пожöгса школаын помалiс 10 класс. Армияö босьтiсны мöд вонас арын. 1983 вося майöдз служитiс Омскын, сэсся «шыбитiсны» Афганистанö, кöнi служитiс 1984 вося декабрöдз. Вöлi сапёрöн. /тлаын вöлiны Кекурысь Пантелеймон Федотович Мингалёвкöд. Пасйисны «За отличие в охране государственной границы СССР», «60 лет с именем В.И.Ленина», «Воину-интернационалисту от благодарного афганского народа» медальясöн. Чужанiнö бергöдчöм бöрын уджалiс ПМК-ын экскаватор вылын.
Сергей Иванович Третьяков чужис Пожöгдiнын. 1978 воын Пожöгса школаын 8 класс помалöм бöрын велöдчис Кебанъёльса училищеын тракторист-машинистö да уджалiс туй вöчан да дзоньталан юкöнын. Афганистанын вöлi 1980-1982 воясын. Уджалiс öружие вöчанiнын, дзоньталiс салдатъяслысь душманъяскöд тышкасьöм бöрын öружие. Пасйисны «Воину-интернационалисту от благодарного афганского народа», «70 лет Вооружённых Сил СССР», «20 лет вывода советских войск из Афганистана» медальясöн.
Андрей Васильевич Шахов чужис Сьöдтыдiнын. 1981 воын 10 класс помалöм бöрын лаборанталiс Пожöгса школаын. Россияса ДОСААФ-лöн Сыктывкарса юкöнын велöдчис радистö. Армияö босьтiсны 1982 вося ноябрын. Ашхабадын велöдчöм бöрын ыстiсны Ташкентö. Радиотелефонистсянь быдмис радиостанцияса начальникöдз. 1983 вося февральын ыстiсны колльöдны Афганистанö связьлысь техника да аппаратъяс. Кушка карын таможня бöрын мунiсны Кабулö, а сэсся Кандагарö, кöнi зэв жар да зэв тöла, а войнас кöдзыд. Ыстiс да примитiс радиограммаяс, кывкутiс Афганистанын миян часьтъяскöд йитöд вöсна.
Шахсиктын чужлöм Василий Владимирович Шахов 1997 вося июль 29 лунö юрсö пуктiс Югославияын. Батьыс казьтылiс:
— Школа бöрын велöдчис видз-му овмöс техникумын. 1995 вося мартын мöдöд во велöдчигöн босьтiсны армияö. Веськалiс Москва дорса Вадное карö, сынöдса десант войскалöн Севастопольса мотострелкöвöй бригадаö. 1996 вося гожöмын Псков карын веськалiс медся бур салдатъяс лыдö да вуджöдiсны Рязаньö 41450 часьтö, кодi пырис Туласа дивизияö. Сiйö жö гожöмын нуисны Югославияö, кöнi ООН-ö пырысь налöн торъя батальон страна пазалöм бöрын видзис да лöньöдiс сербъяс да хорватъяс костын зык-вен. Миян зонъяс отсалiсны кусöдны öзйылöмъяс, могмöдiсны челядьöс сёян-юанöн. Сербъяскöд вöлiны бур йитöдаöсь. Василий кыкысь волiс гортö — 1995 вося арын да 1997 вося гожöмын. 1997 вося июльын воис усьöм йывсьыс телеграмма.
Казьтыштам и Ичöт Кужйысь Сергей Егорович Тарабукинöс да Скöрöдумысь Александр Алексеевич Шомысовöс, кодъясöс Афганистанын усьöм бöрын пасйисны Гöрд Звезда орденöн.
Некодöс ог вунöдöй, кутам помнитны ставнысö.
Владимир ШОМЫСОВ,
Татьяна ИГНАТОВА.

Комментарии:

Добавить комментарий

Свежий выпуск: 28 марта

Осторожно — мошенники!