Ме ола Кулöмдiнын да велöдча 8-öд классын. Ачымöс чайта шуда мортöн, öд таво веськавлi нималана «Артекö». Шойччи сэнi март 14 лунсянь апрель 3-öд лунöдз.
«Артекö» ветлöм йылысь вöзйöм воис арнас электроннöй дневник вылö. Колiс мöдöдны шойччанiнлöн сайт вылö аслам медтöдчана шедöдöмторъясысь грамотаяс. Мöдöдi, но эз босьтны. Шуи аслым: «Ме быть муна». Мöдöдi выльысь, и корисны локны.
Бура помнита сiйö лунсö. Вои гортö да мамöй юалiс: «Тэ кужан нимкодясьны?» и висьталiс бур юöр йылысь. Быттьö шöйöвошлi и сöмын асывнас гöгöрвои, кутшöм шуд усис. Интернет пыр «Артек» группаын тöдмаси тшöтш мунысьяскöд. Видзöдалi, кутшöм лагеръяс сэнi эмöсь, мöвпалi, кытчö веськала. Миян районысь ме вöлi öтнам, республикаысь 12-öн — Сыктывкарысь, Воркутаысь, Ухтаысь, Интаысь.
Ме веськалi «Артеклöн» «Морскöй» лагерö. Челядь вöлiны быдлаысь: Сыктывкарысь, Чебоксарыысь, Владивостокысь, Новосибирскысь, Тулаысь, медунаöн Москваысь. Ставнымлы сетiсны öткодь кöлуй: куртка, кык футболка, джинсы, шапка да с.в. Оланiнным вöлi саридз дорсянь медся матын — сöмын лэччыны ва дорö. Шусис «Изумруднöйöн». Вöлi ыркыдкодь, ветлöдлiм курткаясöн. Кымрасис.
«Морскöйын» вöлi сюрсысь унджык морт. Тайö сöмын джынйыс, мыйта вермис тöрны, сы вöсна мый дзоньтасисны. Оланiнным вöлi нёль судта. Быд судтаын ворсанiн. Быд жырйын зэв ыджыд, мича серпаса öшиньяс. Олiм сизимöн. Вердiсны зэв чöскыда луннас витысь, ветлöдлан да ачыд бöръян, мый кöсъян. Зэв чöскыдöн вöлi плов.
«Артекын» олiм 21 лун. Вöлi кык туйвизь — геология да теннис. Велöдiм кыкнансö.
Асыв пансьылiс ки-кок песöмсянь, мунiс зэв гажаа шылад улö. Сэсся ворсiм теннисöн. Та бöрын котöртлiм зэв ыджыд, мича, матö 400 жыръя школаö. Велöдiсны сöмын роч кыв, математика, химия да физика. Быд лун вöлi нёль урок. Школа бöрын пажнайтлiм, сэсся позис узьыштны. Тшöкыда дасьтысим кутшöмкö ордйысьöм кежлö. Лунтырöн вöлi сы мындатор, мый рытланьыс ёна мудзлiм.
Водлiм пыр сёрöн, а чеччылiм водз. Вöлi Алиса ныв, кодöс садьмöдны вöлi некыдз. Чеччыштлiс пырысьтöм-пыр сöмын «Армия, подъём!» горöдiгöн.
Тайö ветлöмыс коляс менам сьöлöмын дыр кежлö. Аддзи уна выль бур ёртöс. Ёна велалiм öта-мöд дорö. Ме эска, мый ставöн аддзысьлам на. Тöдмалi унатор аслам велöдан туйвизь кузя. Лои асшöрджыкöн. Велалi бурджыка сёрнитны йöзкöд. Меным сетiсны «Медбур картограф» да «Медбур петрограф» грамотаяс, сы вöсна мый Крымлысь карта вöчöмöн лои медбуръяс лыдын. Гижöд дорö медбура серпасасьöмысь сетiсны диплом.
Пыр кежлö казьтыланаöн коляс саридз. Ми эг варччылöй, сы вöсна мый вöлi кöдзыд, ветлöдлiм уяланiнö.
Миянöс нулывлiсны зоопаркö, ветлiм Симферопольса чужан му туялан музейö, Севастопольö, Херсонесö, «Лукоморьеын» ветлöдлыштiм дзугöм туйяс вывтi. Аддзылiм ыджыд аквариумысь мича чериясöс. Сэнi жö уялiсны акулаяс. Лэдзлiсны ньöбны гортö казьтыланторъяс. Пыралiм Артеклöн музейö.
Ме медся ёна ёртаси Сыктывкарысь Алёнакöд. Ветлывлiм сыкöд саридз дорö, чукöртлiм изъяс.
«Артекö» веськавны сьöкыд, но позьö, бура кö велöдчан либö сямман мыйкö вöчны: сьывны, йöктыны, серпасасьны, петкöдчыны спортын.
Медся бöръя луныс лоис медся казьтыланаöн. Ми, Комиысь воысьяс, мунiм бöръяяс лыдын да вермим ставнысö колльöдны. Топöдлiм öта-мöднымöс, кöсйысим бара аддзысьлыны, быдмöм бöрын волыны öта-мöд дорö. Öнiöдз рытъяснас гижасям интернет пыр. Колисны уна казьтылöмъяс да сьöлöмкылöмъяс.
Пыр на синъяс водзынöсь менам муса ёртъяс, гажа лунъяс, мича серпасъяс, саридз, гажъяс дырйи мичасьыс-мича салют. Зэв лöсьыда сэнi пасйöны челядьлысь чужан лун, пöжалöны торт, сетöны козинъяс.
Меным сэтчö позьö ветлыны нöшта, сöмын во мысти. Öнi ме пуктi ас водзын мог бура велöдчыны, чукöртны грамотаяс да бара ветлыны мусмöм «Артекö».
Сэтчö ветлöм бöрын окота код вöсна кö тöждысьны, овны ыджыд чукöрöн. «Артек» матыстö дзик тöдтöм йöзöс, сэнi челядьлöн уна öткодьтор, гöгöрвоöны öта-мöдсö, унаторйö велалöны. Уна нывка да зонка воссисны сэнi, лоисны быдлаö писькöдчысь йöзöн. Ставсö висьтавны он вермы, колö аслыд ветлыны да аддзывны.
Аурика СЕЛЕЗНЕВА.
Кулöмдiн.
Интернетысь босьтöм снимок вылын:
Аурика Селезнёва.