ЭЖВАЫСЬ ШЕДÌС … «ДИНОЗАВР»

Неважöн Кулöмдìнын паськалìс сёрни, мый 80 арöса нималана чери кыйысь Зинаида Ипполитовна Поповалы шедöма Эжваысь чери нисьö дзоляник динозавр.

Пасъям, мый 80 воысь 72-сö во гöгöр чöж кыйö чери. Ёна вотчö. Вöр-ватöг овны оз вермы. Сìйö сетö вын, дзоньвидзалун. Ёна радейтöны вöр-ва и Альбина да Ольга нывъясыс.

З.И.Попова аддзысьлìгöн висьталìс:

— Меным шедлìс быдсяма чери. Гырысьсö нулì пельпом вылын, бöжыс кыссис муöд. Но татшöм «чериыс» шедìс медводдзаысь, и медым эськö сэсся эз шед. А вöлì тадзи. Нёль час асылын ми Альбинакöд лэччим Эжва дорö вуграсьны. Ме босьтчи кыйсьыны кöлуй песласянìнсянь. Вуграси нидзулöн. Нылöй кыйсис бокын. Друг таб дорын ваыс вöрзис. Мися, матыстчис ыджыд чери, да пысалì медся кузь нидзувсö. Òтчыд табйöй вöйлìс ваас, но нинöм эз шед. Мöдысь лэптìгöн аддзи: пысасьöма код тöдас мый. Ваысь лэптöм бöрын ёна повзи. Кокъясöй тìрзисны да кынми места вылын, весиг бырис гöлöсöй. Горöдì нылöс. Но сìйö шуис, мый полö жö да оз лок. Кутì сюсьджыка видзöдны шедöмтор вылö. Сìйö вöлì телевизорын петкöдлан динозавр кодьöн. Кузьтаыс кöнкö 40 сантиметр. Юрыс кабыр ыджда. Кык син да кык дзоляник водзир. Голяыс вöсни да кузь. Òтар-мöдарас бордъяс. 12 кок. Найö кусыняöсь. Эм бöжтор. Вылìыс сьöд, кынöмыс еджыд. Кучикыс чорыд. Кыпöдì му вывсьыс, «динозавр» кутìс видзöдны ме вылö, öвтчис бордъяснас да мыйкö быттьö кöсйис висьтавны. Ме кöсйи петкöдлыны сìйöс вöвлöм милиционерлы, но керкасö эз восьт. Таркöдчылì мöд морт дорö, но сìйö узис жö, öд вöлì водз на. Бöр лэччи пыж дорö. Вачки шензьöданатортö пыж бокö, лэдзи муö, тувччи кокöн да перйи вугырöс. Водзö чери эг кыйöй, кайим гортö. Недыр мысти лэччылìм ва дорö. Лыа вылын тыдалìс кок туй. «Динозавр» лэччöма Эжваö.

— Ме ёна жö повзи, — содтìс мамыслöн висьталöм дорö нылыс — А.В.Чернявская. — Некымын лун эг лэччыв вуграсьны. Кöть и кадыс коли бура уна нин, но «динозавр» пыр на синъяс водзын.

Мама-ныла öнì жалитöны, мый эз снимайтны шедöмторсö. Снимоксö эськö позис петкöдлыны учёнöйяслы, мед вöчисны кывкöртöд.

Николай ЛЮТОЕВ.