Абу сöрöм. Видзысь.

[ A+ ] /[ A- ]

Öльöксанлöн батьыскöд вöлi зэв бур пон. Сiйö зэв бура увтiс да туялiс уръясöс, туланъясöс, аничаясöс и сьöдбöжъясöс, эз пов йöраысь ни ошкысь. Колö жö лоны, мый веськалiс кöчлы пуктöм асланыс жö капканö да сюрис сöмын вежон мысти. Моздораныс и вайисны вöр керкаöдз. Батьыс бурдöдiс тöлысь чöж. Кутiс котравны бöр да локтан арнас кыйисны комын туланöс, мыйысь вичмöдiсны пыдди пуктан грамота да сьöмтор.
Öльöксанлы синъяс улас усис помидор да öгурцы быдтöм йылысь гижöд, кодъясöс сэки миянладорын эз на вöдитлыны. Вöчис лöсьыдiник быдтанiн, вевттис вöсньыдик дöраöн. Кöдзыд дырйи сиптылiс, а кор шоныд — восьтлiс. Пуктöмторъясыс кутiсны быдмыны, регыд артмисны ичöт öгурцыяс да помидоръяс. Мед найöс войнас некод эз вöрзьöд, видзысьнас лоис понйыс, кодi узьлiс керка бокын. Сэккостi выльторъясыс öтарö быдмисны, ая-пиа и гортын олысьяс нимкодясисны: коркö да и позяс сёйны.
Но усисны шогö, кор колхозса юралысьлöн индöдöн орччöн кыпöдiсны чипан видзанiн. Öльöксанлöн батьыс эськö видлiс колхозса юралысьсö пуксьöдны вежöрвыв, мед лöсьöдiсны чипан видзанiнсö мöдлаö, сы вöсна мый чипанъясыс кутасны пырны град вылö да ставсö кокавны, но юралысь кывзыны эз кöсйы: чипанъясыд пö кокалöны тусь, а оз капуста ли öгурцы. Сiдзкö кö пö, шуис батьыс, кытшовтöй видзанiнсö сеткаöн, но юралысь крапкис:
— Колö кö, кытшовтöд ачыд!
А кысь гöлиник мортлы сеткаыс да сы вылö сьöмыс?
Дыр эз ков виччысьны. Öти лунö, кор ветлiсны пуктыны турун, öти град пуртiкалöмаöсь кушöдз, позьö шуны, вöчöмаöсь сьöд няйтöдз. Весиг чашйöмаöсь сёркни, морков да картупель кор. Бур кöть сiйö, мый помидор-öгурцы быдтанiныс вевттьöма вöлi, да сэтчö абу сибавлöмаöсь.
Батьыс ёрччыштiс да пырис керкаö, а Öльöксан босьтчис мöвпавны, мый вöчны. И воис öд юрас. Пыралiс гортас, корсис кузь кöв да домалiс понсö керка бокас, мед, пырасны кö чипанъясыс, уськöдчас да повзьöдас.
Петiсны асывнас да гöгöр гатшасьöм чипанъяс, понйыс став пырысьсö джагйöдлöма. Регыд и локтiсны чипан видзысьяс, колхозса юралысь да милиционер. Лыддисны да лоис нелямын гöгöр чипан. Юралысь да милиционер грöзитiсны, мый пуксьöдасны Öльöксанлысь батьсö дзескыдiнö, но сiйö эз повзьы, вочавидзис:
— Ме жö тiянлы шулi, мед сеткаалiнныд, а тi сöмын сералiнныд. Понйöй со дом йылын, сiйö ассьыс удж тöдö: йöрö бокöвöйöс оз лэдз. Нинöм вöчны он вермöй, ми абу мыжаöсь.
Мöд лунас и сувтöдiсны сеткатö. Но поннысö регыд мысти лёк йöз виисны, челядь вöлi аддзылöмаöсь вöвъясöс видзанiн дорысь.
Иван ЛЮТОЕВ.
Керчомъя.


Комментарии:

Добавить комментарий

Свежий выпуск: за 24 мая